పాఠశాలలో బంగ్లాదేశ్ పిల్లలుంటే వెంటనే చెప్పండి.. ఢిల్లీ బడులకు సర్కార్ ఆదేశాలు!

దేశరాజధాని ఢిల్లీలోని బడుల్లో బంగ్లాదేశ్ పిల్లలు ఎవరైనా చదువుతుంటే వెంటనే తమకు తెలియజేయాలని ఢిల్లీ మున్సిపల్ కార్పోరేషన్ అక్కడి పాఠశాలలకు సర్క్యులర్ జారీ చేసింది. అక్రమ వలసదారులకు చెందిన పిల్లలు ఎవరైనా చదువుతుంటే గుర్తించాలని బడులకు సూచించింది. అంతేకాకుండా వారికి జనన ధ్రువీకరణ పత్రాలు జారీ అయ్యాయా లేదా అనేది కూడా తెలుసుకోవాలని వివరించింది. త్వరలోనే ఎన్నికలు ఉండడం.. ఇదే సమయంలో అక్రమ వలసదారులపై సర్కారు సర్క్యులర్ జారీ చేయడంతో సర్వత్రా ఆసక్తి నెలకొంది.

అడ్మిషన్లు ఇస్తున్నప్పుడు జాగ్రత్తగా గుర్తించండి!

ఢిల్లీలో అక్రమంగా ఉంటున్న బంగ్లాదేశ్ వలసదారులను అక్కడి నుంచి పంపించి వేయాలని మున్సిపల్ కార్పోరేషన్ ఇప్పటికే జోన్‌లను ఆదేశించింది. డిసెంబర్ 31వ తేదీలోగా ఎంసీడీ డిప్యూటీ కమిషనర్ ద్వారా యాక్షన్ టేకప్ రిపోర్టు సమర్పించాలని కోరింది. ఢిల్లీలోని ప్రభుత్వ పాఠశాలల్లో అడ్మిషన్లు ఇస్తున్నప్పుడు అక్రమ బంగ్లాదేశీ వలసదారులను గుర్తించడానికి విద్యాశాఖ తగిన నివారణ చర్యలు తీసుకుంటుందని డిప్యూటీ కమిషనర్ పేర్కొన్నారు. అలాగే బంగ్లాదేశ్ నుంచి అక్రమంగా వలస వచ్చిన వారి పిల్లలను గుర్తించేందుకు ప్రత్యేక డ్రైవ్ చేపట్టాలని కోరినట్లు తెలిపారు.

బంగ్లాదేశీయులు, రోహింగ్యాలతో.. పూర్వాంచాలీలను కలపొద్దు..!

ఈ అదేశాలపై ఆప్ ఎంపీ సంజయ్ సింగ్ స్పందిస్తూ.. అక్రమ వలదారుల పేరుతో పూర్వాంచల్ నుంచి వలస వచ్చిన ప్రజలను అవమాన పరిచేందుకే మున్సిపల్ కార్పోరేషన్ ఈ నిర్ణయం తీసుకుందని ఆరోపించారు. అలాగే బీజేపీ జాతీయ అధ్యక్షుడు జేపీ నడ్డా.. ఉత్తర ప్రదేశ్, బిహార్ నుంచి వచ్చిన పేద ప్రజలు పూర్వాంచాలీలీలను.. బంగ్లాదేశీయులతో సమానం చేశారని వ్యాఖ్యానించారు. ముఖ్యంగా ఎమ్‌సీడీ ఈ నిర్ణయం ద్వారా పూర్వాంచాలీలను, వారి పిల్లలను బెదిరించి.. వారి దుకాణాలు, ఇళ్లను అక్రమంగా కూల్చేయాలని చూస్తోందని ఆరోపించారు.

రోహింగ్యాలతో పాటు బంగ్లాదేశీయులు ఉండేది బుక్కర్‌వాలాలోనే..!

అలాగే బంగ్లాదేశ్ ప్రజలు, రోహింగ్యాలు ఎక్కడ ఉన్నారో బీజేపీకి చాలా బాగా తెలుసు అని చెప్పుకొచ్చారు. వారంతా బుక్కర్‌వాలాలో ఉన్నారని మీరు నేరుగా అక్కడికే వెళ్లండంటూ ఎంపీ సంజయ్ సింగ్ కామెంట్లు చేశారు. పూర్వాంచాలీలు.. తూర్పు ఉత్తర ప్రదేశ్, బిహార్ నుంచి వలస వచ్చినవారు. ఢిల్లీ ఓటర్లలో వీళ్లు దాదాపుగా 42 శాతం ఉన్నారు. ముఖ్యంగా బురారీ, లక్ష్మీ నగర్, ద్వారక వంటి కీలక ప్రాంతాల్లో సహా ఢిల్లీలోని 70 అసెంబ్లీ నియోజక వర్గాల్లో దాదాపు సగం మంది పూర్వాంచాలీలే ఉన్నారు. ఎంపీ సంజయ్ సింగ్ చెప్పినట్లుగా.. బంగ్లాదేశీయులు, రోహింగ్యాలు ఎక్కువగా బుక్కర్‌వాలాలోనే ఉంటారు.