12 ఏళ్ల బాలిక బౌలింగ్‌‌కు సచిన్ ఫిదా.. జూనియర్ జహీర్ ఖాన్ అంటూ కితాబు, వీడియో వైరల్

టీమిండియా క్రికెట్ దిగ్గజం సచిన్ టెండూల్కర్ ఓ బాలిక బౌలింగ్ చూసి మంత్రముగ్దుడయ్యారు. ఈ మేరకు సోషల్ మీడియాలోని తన అధికారిక ఖాతాలో సచిన్ సదరు బాలిక బౌలింగ్ చేస్తున్న వీడియోను షేర్ చేశారు. అంతేకాదు.. ఆమె అచ్చం భారత మాజీ పేసర్, 2011 వన్డే ప్రపంచకప్ విన్నింగ్ టీమ్‌లోని సభ్యుడు జహీర్ ఖాన్ లాగే బౌలింగ్ చేస్తోందంటూ.. క్యాప్షన్ ఇచ్చారు. తన పోస్టులో జహీర్ ఖాన్‌ను కూడా ట్యాగ్ చేశారు.

"సరళమైన, సులభమైన.. చూడటానికి ఎంతో మధురమైన యాక్షన్ ఇది. సుశీల మీనా బౌలింగ్ యాక్షన్‌లో నీ షేడ్స్ కనిపిస్తున్నాయ్ జహీర్ ఖాన్.. ఈ వీడియో చూశావా" అని సచిన్ టెండూల్కర్ ట్విట్టర్‌లో పోస్టు పెట్టారు. మీరు సరిగ్గా గుర్తించారు. ఆమె బౌలింగ్ యాక్షన్.. చాలా సరళంగా ఆకట్టుకునేలాఉంది. ఆమె భవిష్యత్‌పై ఆశలు రేపుతోంది" అని జహీర్ ఖాన్ రిప్లే ఇచ్చారు.

కాగా 12 ఏళ్ల సుశీల రాజస్థాన్‌లోన ప్రతాప్‌గఢ్‌కు జిల్లాలోని రామేర్ తలాబ్‌ అనే గ్రామానికి చెందింది. ఆమె తండ్రి ఓ సామాన్య రైతు. సుశీల తండ్రి రతన్ లాల్ మీనా, తల్లి శాంతి బాయి మీనా. ఆర్థిక పరిస్థితులు అంతంత మాత్రంగానే ఉన్నప్పటికీ సుశీలకు మాత్రం క్రికెట్‌ ఆంటే ఎంతో ఇష్టం. అందుకే ఆమె వీలు దొరికినప్పుడల్లా.. స్థానిక పిల్లలతో క్రికెట్ ఆడుతోంది. ముఖ్యంగా ఆమెకు బౌలింగ్ అంటే అమితాసక్తి. లెఫ్డ్ హ్యాండ్ బౌలింగ్ చేసే ఈ బాలిక.. అచ్చం జహీర్ ఖాన్ స్టైల్‌లోనే బౌలింగ్ చేస్తోంది.

ఆమె బౌలింగ్‌ స్లో మోషన్ వీడియోను చూసిన.. క్రికెట్ ఫ్యాన్స్.. జహీర్ ఖాన్‌ను గుర్తుచేస్తుందని పేర్కొంటున్నారు. ఆమె లాంటి టాలెంటెడ్ ప్లేయర్లకు బీసీసీఐ కాస్త ప్రోత్సాహం అందిస్తే.. భవిష్యత్‌లో భారత క్రికెట్ తరఫున కూడా ఆడుతుందని జోస్యం చెబుతున్నారు.

కాగా 16 ఏళ్ల వయసులోనే భారత్ తరఫున అరంగేట్రం చేసిన సచిన్ టెండూల్కర్.. క్రికెట్ దిగ్గజంగా ఎదిగాడు. తన ప్రతిభతో భారత జట్టుకు మరుపులేని విజయాలు అందించాడు. 2011 వన్డే ప్రపంచకప్ గెలిచిన భారత జట్టులో సభ్యుడిగా ఉన్నాడు. 24 ఏళ్ల కెరీర్‌కు వీడ్కోలు పలుకుతూ.. 2013లో సచిన్ టెండూల్కర్ రిటైర్మెంట్ ప్రకటించాడు.