ట్రంప్ అమెజాన్ కార్ట్‌ లిస్ట్ రివీల్ చేసిన ఎరిక్ ట్రంప్.. ఏమేమున్నాయో తెలుసా?

ఇటీవలే అమెరికా అధ్యక్ష ఎన్నికల్లో విజయం సాధించి.. మరోసారి అగ్రరాజ్యం అధినేతగా పదవీ బాధ్యతలు స్వీకరించబోతున్నారు రిపబ్లికన్ నేత డొనాల్డ్ ట్రంప్. అయితే నెల రోజుల తర్వాత ప్రమాణ స్వీకారం చేయబోతున్న ఈయన.. ఇప్పుడే ఏమేం చేస్తారో ప్రజలకు వివరిస్తున్నారు. ముఖ్యంగా ఆయన చేసే పనులు అనేక దేశాలను భయపెట్టడంతో పాటు ఆశ్చర్యానికి గురి చేస్తున్నాయి. ఇటీవలే కెనడా, పనామా కాలువ, గ్రీన్‌ల్యాండ్‌ను కొనుగోలు చేస్తానని ట్రంప్ కామెంట్లు చేయగా.. ఆయన కుమారుడు ఎరిక్ ట్రంప్ మరో షాకింగ్ పోస్టు పెట్టారు. అదేంటో మనం ఇప్పుడు తెలుసుకుందాం.

ఆదివారం రోజే డొనాల్డ్ ట్రంప్.. గ్రీన్‌ల్యాండ్ కొనుగోలు చేస్తామని చెప్పారు. అంతకు ముందు కెనడాను 51 రాష్ట్రంగా పేర్కొని షాకిచ్చారు. దానికంటే ముందు కూడా ఆయన పనామా కాలువను తమ అధీనంలోకి తెచ్చుకుంటామని ప్రకటించారు. ఈ వ్యాఖ్యలతోనే అంతా భయపడిపోతుండగా.. తాజాగా ఆయన కుమారుడు ఎరిక్ ట్రంప్ ఎక్స్ వేదికగా ఓ పోస్టు పెట్టాడు. అందులో ట్రంప్.. ఈ కామర్స్ సైట్ అయిన అమెజాన్‌లో కార్ట్ చేసిన కొన్నింటి జాబితాను చూపించారు. అందులో వస్తువులకు బదులుగా పలు ప్రాంతాలు ఉన్నాయి.

అయితే ముందుగా కెనడా, తర్వాత గ్రీన్‌ల్యాండ్, అటు పిమ్మట పనామా కెనాల్‌లను కార్ట్‌లో పెట్టినట్లు చూపించారు. వీటిని త్వరలోనే ఆర్డర్ కూడా పెట్టి కొనుగోలు చేయబోతున్నట్లు ఆ ఫొటోలో వివరించారు. అంతేకాకుండా ఫొటోతో పాటు మేం మళ్లీ వచ్చేశాం అని క్యాప్షన్ కూడా ఇచ్చారు. ఎరిక్ ట్రంప్ షేర్ చేసిన ఈ ఫొటో నెట్టింట తెగ వైరల్ అవుతోంది. దీనిపై ఒక్కొక్కరూ ఒక్కో విధంగా స్పందిస్తున్నారు. మీరు గ్రీన్‌ల్యాండ్ కొనుగోలు చేస్తే నేను ముందుగా అక్కడికే వెళ్లిపోతానంటూ ఓ నెటిజెన్ చెప్పుకొచ్చాడు.

కొందరేమో కార్ట్‌లో పెట్టగలిగారు కానీ కొనలేరంటూ వివరిస్తున్నారు. మరికొందరు అయితే ఇదో పెద్ద జోక్ అంటూ స్మైలీ ఎమోజీలను జోడిస్తున్నారు. ఎవరూ ఊహించని విధంగా ఓ నెటిజెన్.. ముందుగా పనామా కెనాల్ కొనమని, ఆ తర్వాత గ్రీన్‌ల్యాండ్ కొనుగోలు చేయమని చెప్పారు. ఆ తర్వాతే కెనడా వద్దకు వెళ్లాలని సూచించారు. చూడాలి మరి ఏం జరగనుంది అనేది.