300 అడుగుల లోయలో పడ్డ ఆర్మీ వాహనం.. ఐదుగురు జవాన్లు మృతి
national | Suryaa Desk | Published : Tue, Dec 24, 2024, 09:05 PM
జమ్మూ కాశ్మీర్‌లో ఆర్మీ వాహనం ఘోర ప్రమాదానికి గురైంది. పూంఛ్ జిల్లాలో సైనికులతో వెళ్తున్న ఓ వాహనం.. బాల్నోయ్ ప్రాంతంలో అదుపు తప్పి.. 300 అడుగుల లోతు ఉన్న భారీ లోయలో పడిపోయింది. ఈ ఘటనలో ఇప్పటివరకు ఐదుగురు సైనికులు ప్రాణాలు విడిచారు. మరో 8 మంది జవాన్లకు తీవ్ర గాయాలు అయ్యాయి. ఈ ఘటనకు సంబంధించిన సమాచారం అందుకున్న సైనిక ఉన్నతాధికారులు, సిబ్బంది హుటాహుటిన సంఘటనా స్థలానికి చేరుకున్నారు. సహాయక చర్యలు ముమ్మరం చేసిన అధికారులు.. గాయపడిన వారిని సమీపంలోని ఆర్మీ ఆస్పత్రికి తరలించి చికిత్స అందిస్తున్నారు.
సైన్యం చేస్తున్న సహాయక చర్యలకు జమ్మూ కాశ్మీర్ పోలీసులు కూడా సాయం చేస్తున్నారు. ఇక ఈ ఘటన ఎలా జరిగింది అనే దానిపై ఆర్మీ ఉన్నతాధికారులు విచారణ జరుపుతున్నారు. 11 మద్రాస్ లైట్ ఇన్‌ఫ్యాంట్రీకి చెందిన సైనిక వాహనంగా అధికారులు గుర్తించారు. 18 మంది సైనికులతో కూడిన ఈ ఆర్మీ వాహనం నీలం హెడ్ క్వార్టర్స్ నుంచి బాల్నోయ్ ఘోరా పోస్ట్‌కు వెళ్తుండగా.. మార్గం మధ్యలో ఈ ప్రమాదం చోటు చేసుకున్నట్లు సైనిక అధికారులు తెలిపారు. ఈ ఘటనలో 11 మద్రాస్ లైట్ ఇన్‌ఫ్యాంట్రీకి చెందిన రెస్క్యూ బృందాలు సహాయక చర్యలు చేపట్టింది. ఇక ఈ ఘటనపై వైట్ నైట్ కార్ప్స్ సంతాపం తెలిపింది.
సరిగ్గా ఇలాంటి ఘోర ప్రమాదమే గత నెలలో కూడా చోటు చేసుకుంది. నవంబర్‌ 4వ తేదీన రాజౌరీ జిల్లాలోని బడాగ్ ప్రాంతంలో సైనికులతో వెళ్తున్న వాహనం భారీ లోయలో పడిపోయింది. ఈ ఘటనలో ఒక జవాన్ మృతి చెందగా మరో సైనికుడికి తీవ్ర గాయాలు అయ్యాయి.
|
|