డాక్టర్ అంటే ఎవరు.. పరీక్షలో ఈ స్టూడెంట్ రాసిన ఆన్సర్ చూస్తే మతిపోవాల్సిందే..!

డాక్టర్లు అంటే ఎవరు అని ఎవరైనా అడిగితే ఏం చెప్తారు. రోగం నయం అయిన వారు కనిపించే దేవుళ్లు అంటారు.. అదే ఆస్పత్రిలో ప్రాణాలు పోయిన వారైతే మాత్రం డబ్బుల కోసం చంపేశారు అని తిడతారు. అయితే అందరు డాక్టర్లు అలా ఉండకపోయినా.. కొందరు డాక్టర్లు మాత్రం రోగులతో ప్రేమగా ఉంటారు. కొందరు పేషంట్లు డాక్టర్లతో మాట్లాడితేనే చాలు.. వారి రోగం సగం నయం అవుతుంది. ఇక రోగిని ప్రేమించలేని డాక్టర్.. రోగితో సమానం అని.. శంకర్ దాదా ఎంబీబీఎస్ సినిమాలో మెగాస్టార్ చిరంజీవి విసిరిన డైలాగ్.. ఇప్పటికీ ట్రెండింగ్‌లోనే ఉంటుంది అనే విషయం తెలిసిందే. ఈ నేపథ్యంలోనే ఇప్పుడు ఓ పరీక్షలో స్టూడెంట్ మాత్రం.. డాక్టర్ అంటే ఎవరు అనే ప్రశ్నకు ఇచ్చిన సమాధానం చూసి.. అతడి టీచర్ అవాక్కయ్యాడు. దీంతో ఆ ఆన్సర్‌ను సోషల్ మీడియాలో పోస్ట్ చేయగా.. నెటిజన్లు రకరకాల కామెంట్లు పెడుతున్నారు.

తాజాగా ఓ పరీక్షలో డాక్టర్ అంటే ఎవరు అని ఒక ప్రశ్న వచ్చింది. అయితే మిగితా స్టూడెంట్లు ఏం సమాధానాలు రాశారో తెలియదు కానీ.. ఒక విద్యార్థి రాసిన ఆన్సర్ మాత్రం ఇప్పుడు తెగ చర్చకు దారి తీస్తోంది. ఎందుకంటే అతడు ఇచ్చిన సమాధానం ఆ రేంజ్‌లో ఉంది మరి. "డాక్టర్ అంటే మొదట పిల్స్(గోళీల)తో మీ రోగాన్ని చంపేస్తారు.. ఆ తర్వాత బిల్లులతో మిమ్మల్ని చంపేస్తారు" అని ఆన్సర్ రాశాడు. ఇక ఆ సమాధానం చూసిన టీచర్‌కు ఏం చేయాలో అర్థం కాలేదు. చివరికి ఆ స్టూడెంట్ ఇచ్చిన ఆన్సర్‌కు ఫిదా అయిపోయి.. ఐదుకు ఐదు మార్కులు వేశాడు. అంతటితో ఆగకుండా వెరీ గుడ్ స్టూడెంట్ అంటూ రాశాడు. ఇక ఆ ఆన్సర్ షీట్‌ను అనే ట్విటర్ హ్యాండిల్‌ నుంచి షేర్ చేయడంతో అది కాస్తా ఇప్పుడు వైరల్ అవుతోంది.

ఇక ఆ ఆన్సర్ వైరల్ కావడంతో నెటిజన్లు రకరకాలుగా స్పందిస్తున్నారు. చిన్న పిల్లోడు అయినా సరిగ్గా చెప్పాడు అని కొందరు నెటిజన్లు ప్రశంసలు కురిపిస్తున్నారు. మరికొందరేమో రోగాలపై డాక్టర్లు పరిశోధనలు చేస్తుంటే.. ఈ బుడ్డోడు ఏకంగా డాక్టర్లపైనే పరిశోధన చేశాడు అని ఫన్నీగా కామెంట్లు పెడుతున్నారు. ఇంకొందరేమో అతడికి ఇలా ఎప్పుడైనా జరిగిందేమో అందుకే డాక్టర్లపై అలా పగ తీర్చుకున్నాడు అని పేర్కొంటున్నారు. ఇక అందరు డాక్టర్లు అలా ఉండరు.. కొందర్ని చూసి అందర్నీ అలాగే ఉంటారు అనుకోవడం మన పొరపాటే అంటూ మరికొందరు నెటిజన్లు తమకు ఇష్టం వచ్చిన రీతిలో కామెంట్ల వర్షం కురిపిస్తున్నారు.