తండ్రితో గొడవ పడి బ్లేడు మింగేసిన 20 ఏళ్ల యువకుడు

డిప్రెషన్‌కు గురైన అనేక మంది ఇంట్లో ఎప్పుడూ మూడీగా, ఏడుస్తూ కూర్చుంటారు. ఏదో కోల్పోయినట్లు, వారి జీవితమే ముగిసిపోయినట్లుగా మొహం పెడుతుంటారు. అలాగే ముఖం పెట్టాడు ఢిల్లీకి చెందిన 20 ఏళ్ల యువకుడు. ఎంతో ఉత్సాహంగా ఉండాల్సిన అతడు మూడీగా ఉండడం చూసి తండ్రి ఏమైందని ప్రశ్నించాడు. కానీ యువకుడు మాత్రం చప్పుడు చేయలేదు. దీంతో తండ్రి తిట్టగా.. ఇద్దరి మధ్య వాగ్వాదం చెలరేగింది. దీంతో తండ్రిపై కోపంతో ప్రాణాలు తీసుకోవాలనుకున్నాడు.

అనుకున్నదే తడవుగా ఇంట్లోకి వెళ్లి చనిపోయేందుకు ఏమైనా దొరుకుతుందా అని వెతికాడు. ఈక్రమంలోనే షేవింర్ రేజర్ కనిపించగా.. దాన్ని రెండు ముక్కలు చేశాడు. ఆపై ఒక దాని తర్వాత ఒకదాన్ని తీసుకుని మింగేశాడు. ఎంతో కష్టంగా వాటిని మింగగా.. ఒకటి పెద్ద పేగులో తట్టుకుంది. మరొకటి కడుపులో ఇరుక్కుపోయింది. దీంతో తీవ్రమైన కడుపు నొప్పి రాగా యువకుడు ఏడవడం ప్రారంభించాడు. విషయం గుర్తించిన తల్లి ఏమైందని ప్రశ్నించగా జరిగిందంతా చెప్పాడు. దీంతో ఆమె హుటాహుటిన అతడిని స్థానిక ప్రైవేటు ఆస్పత్రికి తీసుకు వెళ్లింది.

వెంటనే వైద్యులు స్కానింగ్ చేసి కడుపులో ఏయే భాగాల్లో రెండు బ్లేడులో ఉన్నాయో గుర్తించారు. ఒక్కో దాన్ని ఒక్కో ఆపరేషన్ చేసి తీసేస్తే బాగుంటుందని భావించారు. ఇదే విషయాన్ని యువకుడి తల్లితండ్రులకు చెప్పగా.. వారు కూడా ఓకే చెప్పారు. ఇలా రెండు సార్లు ఆపరేషన్ చేసిన వైద్యులు యువకుడి కడుపులో నుంచి రెండు బ్లేడు ముక్కలను తొలగించారు. అలాగే యువకుడు మానసికంగా వేదనకు గురవుతున్నాడని.. చికిత్స అవసరం అని సూచించారు.

తీవ్ర డిప్రెషన్‌కు గురి కావడం వల్లే అతడు ఆత్మహత్యాయత్నం చేసుకున్నాడని కూడా వైద్యులు చెప్పుకొచ్చారు. డిప్రెషన్ పూర్తిగా తగ్గే వరకు చికిత్స ఇప్పిస్తేనే అతడు ప్రాణాలతో ఉంటాడని.. లేకపోతే అతడిని బతికించడం కష్టం అని వివరించారు. అది విన్న తల్లి వైద్యులకు కృతజ్ఞతలు తెలిపింది. తన కుమారుడి కడుపులో ఉన్న బ్లేడులను తొలగించి కొడుకుని కాపాడడం తనకు ఎంతో సంతోషాన్ని ఇచ్చిందని వివరించింది. అలాగే ముందు ముందు మరింత జాగ్రత్తగా ఉండి తమ కుమారుడి డిప్రెషన్ పోగొట్టేందుకు ఏమైనా చేస్తానని వెల్లడించింది.