కుటుంబ సభ్యులపై పోలీస్ కానిస్టేబుల్ కాల్పులు.. భార్య మృతి, కొడుకు సహా మరో ఇద్దరికి గాయాలు

పోలీసులు.. దొంగలు, హంతకులపై కాల్పులు జరపడం గురించి మనకు తెలుసు. కానీ మనం చూడబోయే ఓ పోలీస్ కానిస్టేబుల్ మాత్రం అతడి కుటుంబ సభ్యులనే కాల్చేశాడు. ఈ ఘటనలో అతడి భార్య అక్కడికక్కడే ప్రాణాలు కోల్పోగా.. మరో ముగ్గురు తీవ్రంగా గాయపడ్డారు. ప్రస్తుతం వీరంతా ఆస్పత్రిలో చికిత్స పొందుతుండగా... కానిస్టేబుల్ కుమారుడి పరిస్థితి మరింత విషమంగా ఉన్నట్లు సమాచారం. అసలు ఈ పోలీస్ కానిస్టేబుల్ ఎందుకు ఇంతకు తెగించాడో మనం ఇప్పుడు తెలుసుకుందాం.

మహారాష్ట్రలోని హింగోలికి చెందిన 32 ఏళ్ల విలాస్ ముకడే... పోలీస్ కానిస్టేబుల్‌గా పని చేస్తున్నాడు. అదే ప్రాంతంలోని వస్మత్‌లో క్రైమ్ మోహ్రిల్‌గా పని చేస్తున్నాడు. అంటే పోలీస్ స్టేషన్‌లో ఉన్న ఆయుధాలు, మందుగుండ సామాగ్రిని నిల్వ చేయడంతో పాటు వాటిని సరిగ్గా చూసుకోవడం అతడి బాధ్యత. అయితే 6 సంవత్సరాల క్రితమే విలాస్ ముకడేకు.. ప్రగతి నగర్‌కు చెందిన మయూరితో వివాహం జరిగింది. వీరిద్దరి అన్యోన్య దాంపత్యానికి ప్రతీకగా రెండేళ్ల కుమారుడు కూడా ఉన్నాడు.

హాయిగా సాగుతున్న వీరి కాపురంలో మనస్పర్థలు వచ్చాయి. కొన్ని నెలల క్రితం నుంచే విపరీతంగా గొడవలు జరుగుతుండడంతో.. మయూరి కొడుకుని తీసుకుని పుట్టింటికి వచ్చేసింది. ప్రస్తుతం తల్లిదండ్రులతోనే జీవిస్తోంది. ఇక ఎప్పటికీ తిరిగి రానని మయూరి తేల్చి చెప్పడంతో.. విలాస్ ముకడే విడాకులు తీసుకుందామన్నాడు. బుధవారం విధుల నిమిత్తం పోలీస్ స్టేషన్‌కు వెళ్లాడు. అక్కడ ఉండగానే భార్య ఫోన్ చేసి సెటిల్‌మెంట్ చేసుకుందామని చెప్పింది. దీంతో అతడు మధ్యలోనే పోలీస్ స్టేషన్ నుంచి నేరుగా మయూరి పుట్టింటికి వెళ్లాడు. అక్కడే ఆమెతో చర్చలు జరిపాడు. కానీ మయూరి అతడితో సెటిల్‌మెంట్‌కు ఒప్పుకోలేదు.

మరోవైపు అత్తా, మామ, బావలు ముకడేపై ఆగ్రహం వ్యక్తం చేశారు. దీంతో తీవ్ర కోపోద్రిక్తుడైన విలాస్ ముకడే.. తన వద్ద ఉన్న 9MM పిస్తల్‌తో వారందరిపై కాల్పులు జరిపాడు. ఈ ఘటనలో విలాస్ భార్య మయూరి అక్కడికక్కడే ప్రాణాలు కోల్పోయింది. అతడి రెండేళ్ల కుమారుడితో పాటు అత్త, బావ తీవ్రంగా గాయపడ్డారు. పేలుడు శబ్దం రావడంతో స్థానికుల అంతా వారింటికి వచ్చారు. దీంతో ముకడే పారిపోయాడు. వెంటనే క్షతగాత్రులను ఆస్పత్రికి చేర్చిన స్థానికులు పోలీసులకు సమాచారం అందించారు. కేసు నమోదు చేసుకున్న పోలీసులు దర్యాప్తు ప్రారంభించారు.

క్షతగాత్రులు చెప్పిన వివరాలతో పోలీస్ కానిస్టేబుల్ ముకడేను అదుపులోకి తీసుకున్నారు పోలీసులు. ప్రస్తుతం ముకడే కుమారుడి పరిస్థితి విషమంగా ఉందని వైద్యులు చెబుతున్నారు. మరోవైపు అతడి అత్త, బావలకు కూడా చికిత్స అందిస్తున్నారు.