మీకు పీఎఫ్ అకౌంట్ ఉందా? డబ్బుల్ని ఎప్పుడెప్పుడు విత్‌ డ్రా చేయొచ్చు? ఎప్పుడు ఎంతొస్తుంది

మీకు పీఎఫ్ అకౌంట్ ఉందా? మరి అసలు పీఎఫ్ డబ్బులు ఎలా వస్తాయి.. ఎంతొస్తాయి.. వడ్డీ ఎంత.. ఎప్పుడెప్పుడు డబ్బులు తీసుకోవచ్చు.. ఎంతొస్తాయి. ఇలా క్లారిటీ ఉందా.? పీఎఫ్ గురించి అన్ని వివరాలు తెలుసుకోవాలి. అన్నింటిపై అవగాహన పెంచుకోవాలి. సంఘటిత రంగంలో పనిచేస్తు్న్న ఉద్యోగులకు పీఎఫ్ ఖాతా ఉంటుంది. దీనిని ఈపీఎఫ్ఓ నిర్వహిస్తుంటుంది. కంపెనీ ప్రతి నెలా మీ జీతంలో నుంచి 12 శాతం పీఎఫ్ అకౌంట్లో వేస్తుంది. కంపెనీ కూడా ఇంతే మొత్తం యాడ్ చేయాలి. ఇందులో పీఎఫ్ అకౌంట్లోకి 3 శాతానికిపైగా వెళ్తుంది. మరో 8 శాతానికిపైగా ఈపీఎస్ అకౌంట్లో యాడ్ అవుతుంది. ఇక ప్రతి ఆర్థిక సంవత్సరం చివర్లో.. పీఎఫ్ నిధులపై కేంద్రం వడ్డీ అందిస్తుంది. ప్రస్తుతం 8.25 శాతం వడ్డీ వస్తుంది.

ఈపీఎఫ్‌లో జమవుతున్న నగదు మొత్తం.. రిటైర్మెంట్ కోసం ఉద్దేశించిందే అయినప్పటికీ చందాదారులు కొన్ని సందర్భాల్లో పూర్తిగా లేదా పాక్షికంగా నగదు విత్‌డ్రా చేసుకునే అవకాశం కల్పిస్తోంది. వైద్య చికిత్సలు, ఇంటి రెనోవేషన్, వివాహం, చదువులు వంటి సందర్భాల్లో ఈ నిధుల నుంచి డబ్బులు తీసుకోవచ్చు. దీని గురించి చూద్దాం. ఆన్‌లైన్ లేదా ఆఫ్‌లైన్ ద్వారా పీఎఫ్ విత్‌డ్రా చేసుకోవచ్చు.

ఆన్‌లైన్ విత్‌డ్రా కోసం మీ దగ్గర యూఏఎన్ నంబర్, పాస్‌వర్డ్ ఉండాలి. ఇది యాక్టివేషన్లో ఉండాలి. కేవైసీ పూర్తి చేసి ఉండాలి. ఇ- నామినేషన్ ఫైల్ చేసి ఉండాలి. మొబైల్ నంబర్ కూడా అప్డేట్‌లో ఉండాలి. ఆధార్ సీడింగ్ పూర్తి చేసి ఉండాలి. ఇవన్నీ కచ్చితంగా ఉంటేనే.. విత్‌డ్రా కుదురుతుంది. ఆఫ్‌లైన్‌లో అయితే నేరుగా ఈపీఎఫ్ఓ కార్యాలయానికి వెళ్లి ఫారం నింపి.. రిలేటెడ్ డాక్యుమెంట్స్ సమర్పించి సబ్మిట్ చేయాల్సి ఉంటుంది.

>> ఉద్యోగం నుంచి రిటైర్ అయినప్పుడు.. రెండు నెలలు లేదా అంతకంటే ఎక్కువ కాలం నిరుద్యోగిగా ఉన్నప్పుడు పూర్తి మొత్తం విత్‌డ్రా చేసుకోవచ్చు. రిటైర్మెంట్ కంటే ముందే ఉద్యోగి మరణిస్తే.. కుటుంబసభ్యులు పీఎఫ్ విత్‌డ్రా చేసుకోవచ్చు.

>> వైద్య ఖర్చుల కోసం అయితే నెలవారీ బేసిక్ వేతనానికి 6 రెట్లు సమానమైన మొత్తం లేదా ఈపీఎఫ్‌కు జమ చేసిన దాంట్లో ఉద్యోగి వాటా (వడ్డీతో కలిపి) రెండింట్లో ఏది తక్కువ ఉంటే ఆ మొత్తం విత్‌డ్రా చేసుకోవచ్చు.

ఉద్యోగి తన లేదా తన కుటుంబ సభ్యుల పెళ్లి సందర్భాల్లో లేదా పిల్లల విద్య కోసం పీఎఫ్ బ్యాలెన్స్ నుంచి 50 శాతం వరకు నగదు తీసుకోవచ్చు. ఇంకా ఇంటి స్థలం కొనుగోలు లేదా ఇంటి నిర్మాణం కోసం, హోం లోన్ పేమెంట్స్ కోసం, రిపెయిర్ కోసం పరిమితి మేరకు పీఎఫ్ డబ్బులు తీసుకోవచ్చు. వీటిని కూడా ఇటీవల ఈపీఎఫ్ఓ .. ఆటో సెటిల్మెంట్ పరిధిలోకి తీసుకొచ్చింది. అంటే త్వరగానే క్లెయిమ్ సెటిల్ అవుతుందన్నమాట. ఇక పీఎఫ్ విత్‌డ్రా కోసం అడ్రస్ ప్రూఫ్, పీఎఫ్ అకౌంట్ నంబర్, పీఎఫ్ జాయినింగ్ డేట్, ఫారం- 19, బ్యాంక్ అకౌంట్ డీటెయిల్స్, రిటైర్మెంట్ డేట్, క్యాన్సిల్డ్ చెక్, ఫారం- 31, పాన్ కార్డు వంటివి అవసరం పడతాయి.