బంగారం ధరలు తగ్గేందుకు.. కేంద్రం చర్యలు చేపట్టిందా? ఆర్థిక శాఖ క్లారిటీ

దేశీయ మార్కెట్లో స్వచ్ఛమైన బంగారం 10 గ్రాముల ధర ప్రస్తుతం రూ. 78 వేలపైన పలుకుతోంది. 2024 ప్రారంభం నుంచి చూసుకుంటే తులం బంగారం ధర ఏకంగా 30 శాతం పెరిగింది. గత ఏడాది క్రితం 24 క్యారెట్ల బంగారం రేటు రూ. 58,500 వద్ద ఉండగా అది ఇప్పుడు రూ. 78,700 దాటింది. అందుకు చాలా కారాణాలు ఉన్నాయి. అంతర్జాతీయ మార్కెట్లో ధరల పెరుగుదల, భౌగోళిక పరిస్థితులు, దేశాల మధ్య ఉద్రిక్తతలు, కేంద్ర బ్యాంకుల పాలసీల వంటివి చాలా అంశాలు ఉంటాయి. ఇక పండగలు, పెళ్లిళ్లు, శుభకార్యాల వంటి ప్రత్యేక సందర్భాల్లో గిరాకీ పెరిగి బంగారం ధరలు మరింత పెరుగుతాయి.

ఈ క్రమంలో బంగారం ధరల అంశం లోక్‌సభను తాకింది. బంగారం ధరలు తగ్గించేందుకు కేంద్రం ఏమైనా చర్యలు చేపట్టిందా? అని ఓ సభ్యుడు అడిగిన ప్రశ్నకు కేంద్ర ఆర్థిక శాఖ సహాయ మంత్రి పంకజ్ చౌదరి సమాధానమిచ్చారు. ' కేంద్ర ప్రభుత్వం ఇప్పటికే యూనియన్ బడ్జెట్ 2024-25 లోనే బంగారం దిగుమతులపై కస్టమ్స్ డ్యూటీని 15 శాతం నుంచి 6 శాతానికి తగ్గించింది. బంగారం, ఆభారణాలలో దేశీయ విలువ జోడింపును పెంపొందించడం, వినియోగదారులకు బంగారాన్ని మరింత సరసమైనదిగా చేయడమే ఈ నిర్ణయం లక్ష్యం.' అని తెలిపారు.

 మరోవైపు.. బంగారం ధరల పెరుగుదల పండగల సీజన్, పెళ్లిళ్ల సీజన్ కొనుగోళ్లపై ప్రభావం ఏలా ఉంటుందని అడగగా.. బంగారం ధరల పెరుగుదలను ప్రభుత్వం ఎప్పటికప్పుడు పరిశీలిస్తోదని తెలిపారు కేంద్ర మంత్రి పంకజ్ చౌదరి. కానీ, పండగల డిమాండ్‌పై ధరల పెరుగుదల ప్రభావంపై ఎలాంటి కచ్చితమైన అంచనాలు వేయలేదని పేర్కొన్నారు. అలాగే బంగారం ధరల కట్టడి చర్యలు చేపట్టాలనే ఎలాంటి ప్రణాళికలు లేవని స్పష్టం చేశారు. బంగారంపై రాయితీలు ఇచ్చే ఆలోచన సైతం ప్రభుత్వం వద్ద లేదని పేర్కొన్నారు.

ఈ ఏడాది జులైలో ప్రవేశపెట్టిన వవార్షిక బడ్జెట్‌లో బంగారం దిగుమతులపై కస్టమ్స్ సుంకాన్ని 9 శాతం మేర తగ్గించిన క్రమంలో దేశీయంగా బంగారం ధరలు భారీగా దిగివచ్చాయి. అలాంటి చర్యలు ఏవైనా తీసుకోవాలని డిమాండ్ పెరుగుతున్నాయి. ఈ క్రమంలో పార్లమెంట్ వేదికగా కేంద్ర మంత్రి క్లారిటీ ఇచ్చారు.