హెచ్‌డీఎఫ్‌సీ స్కీమ్ అదుర్స్.. రూ. లక్ష పెట్టుబడితో చేతికి ఏకంగా రూ. 1.88 కోట్లు.. ఎన్నేళ్లు పట్టిందంటే

పెట్టుబడులు పెట్టేందుకు మనకు ఎన్నో ఆప్షన్లు ఉన్నాయి. రిస్క్ లేకుండా మంచి రిటర్న్స్ కోసం అయితే.. బ్యాంక్ ఫిక్స్‌డ్ డిపాజిట్లు, కేంద్ర ప్రభుత్వ పథకాలు, సావరిన్ గోల్డ్ బాండ్స్ ఇలా ఎన్నో ఉంటాయి. అయితే కొన్నింటిలో రిస్క్ లేకుండా గ్యారెంటీ రిటర్న్స్ వస్తే.. మరికొన్నింటిలో మాత్రం రిస్క్ ఉన్నా పెద్ద మొత్తంలో రిటర్న్స్ వస్తాయి. ఇందులో స్టాక్ మార్కెట్లు, మ్యూచువల్ ఫండ్స్ వంటి వాటి గురించి ప్రధానంగా తెలుసుకోవాలి. ముఖ్యంగా మ్యూచువల్ ఫండ్స్ పథకాల్లో కాంపౌండింగ్ ఎఫెక్ట్ కారణంగా వడ్డీ ఏటా పెరుగుతూనే ఉంటుంది. ఆరంభ సంవత్సరాల్లో అంతలా రిటర్న్స్ రాకపోయినా.. కాలం గడుస్తున్న కొద్దీ సంపద పెరుగుతుంటుంది. అందుకే మ్యూచువల్ ఫండ్లలో ఇన్వెస్ట్ చేసే వారి సంఖ్య ఎక్కువగా ఉంటుందని చెప్పొచ్చు.

ఇప్పుడు ఇలా ఇన్వెస్టర్లకు బంపర్ రిటర్న్స్ అందించిన ఒక హెచ్‌డీఎఫ్‌సీ మ్యూచువల్ ఫండ్ గురించి చూద్దాం. ఇదే హెచ్‌‌డీఎఫ్‌‌సీ ఫ్లెక్సీ క్యాప్ ఫండ్. ఇది ఓపెన్ ఎండెడ్ డైనమిక్ ఈక్విటీ స్కీమ్. ఇది లార్జ్ క్యాప్, మిడ్ క్యాప్, స్మాల్ క్యాప్ స్టాక్స్ వంటి వాటిల్లో ఇన్వెస్ట్ చేస్తుంది. ఇది మ్యూచువల్ ఫండ్ ఇండస్ట్రీలో 30 ఏళ్లు పూర్తి చేసుకుంది.

ఈ స్కీమ్ 1995, జనవరి 1న ప్రారంభమైంది. ఇది వార్షిక ప్రాతిపదికన 19.13 శాతం చొప్పున రిటర్న్స్ అందించింది. దీంతో లాంగ్ టర్మ్ ఇన్వెస్టర్లకు అద్భుత స్థాయిలో లాభాలు అందాయి. ఇక్కడ నిఫ్టీ 500 TRI బెంచ్‌మార్క్‌గా తీసుకున్నారు. ఈ స్కీమ్ ప్రారంభంలో ఇందులో ఏకకాలంలో రూ. లక్ష పెట్టుబడి పెట్టిన వారికి చేతికి రూ. 1.88 కోట్లు అందాయి. అంటే 30 ఏళ్లలో లక్షకు ఈ స్థాయిలో రిటర్న్స్ వచ్చాయి.

ఇదే సమయంలో రూ. 10 వేల చొప్పున సిప్ చేసిన వారికి మొత్తం ఇన్నేళ్లకు పెట్టుబడి రూ. 35.90 లక్షలు కాగా.. 2024, నవంబర్ వరకు అది రూ. 20.65 కోట్లు అయింది. ఇది హెచ్‌‌డీఎఫ్‌సీ మ్యూచువల్ ఫండ్ నుంచి అందుబాటులో ఉన్న ఫ్లాగ్‌షిప్ ఈక్విటీ స్కీమ్. మ్యూచువల్ ఫండ్లలో పెట్టుబడులు పెట్టే ముందు కూడా ఆర్థిక నిపుణుల సలహా తీసుకోవాలి. మంచి పథకం ఎంచుకోవాల్సి ఉంటుంది. ఇక్కడ కూడా మార్కెట్ రిస్క్‌కు లోబడే పెట్టుబడులు ఉంటాయని గుర్తించాలి.