చైనాలో విస్తరిస్తున్న కొత్త వైరస్.. ఆందోళనల వేళ స్పందించిన భారత్

చైనాలో వెలుగుచూసిన హ్యామన్ మెటానిమోవైరస్.. ఇప్పుడు ప్రపంచం మొత్తాన్ని తీవ్రంగా భయపెడుతోంది. చైనా నుంచి ఇప్పటికే జపాన్, హాంకాంగ్ దేశాలకు వ్యాప్తి చెందిన ఈ హెచ్ఎంపీవీ వైరస్.. ఆసియా దేశాలకు విస్తరించనుంది అనే భయాలు నెలకొన్నాయి. ఇక చైనాలో ఈ హెచ్ఎంపీవీ వైరస్ బారిన పడి ఆస్పత్రుల ముందు క్యూ కడుతున్నారన్న వార్తలు వెల్లువెత్తుతున్న వేళ.. ఈ వ్యవహారంపై భారత్ స్పందించింది. చైనాలో వెలుగుచూసిన కొత్త వైరస్ కారణంగా భారత్‌లో ఆందోళన చెందాల్సిన అవసరం లేదని తేల్చి చెప్పింది. హ్యూమన్‌ మెటానిమోవైరస్‌ వ్యాప్తి పట్ల ఎవరూ భయపడాల్సిన అవసరం లేదని డీజీహెచ్‌ఎస్‌ ఉన్నతాధికారి డాక్టర్‌ అతుల్‌ గోయల్‌ విజ్ఞప్తి చేశారు.

చైనాలో మరో కొత్త వైరస్ వ్యాప్తి చెందుతున్న వార్తల నేపథ్యంలో భారత హెల్త్‌ ఏజెన్సీ.. డైరెక్టరేట్ జనరల్ ఆఫ్ హెల్త్ సర్వీసెస్-డీజీహెచ్‌ఎస్‌ స్పందించింది. ఈ హ్యూమన్‌ మెటానిమోవైరస్‌ వ్యాప్తి పట్ల ఎవరూ భయం గానీ, ఆందోళన గానీ పడాల్సిన అవసరం లేదని డీజీహెచ్‌ఎస్‌ ఉన్నతాధికారి డాక్టర్‌ అతుల్‌ గోయల్‌ సూచించారు. శ్వాసకోశ సంబంధిత ఇన్ఫెక్షన్ల నుంచి కాపాడుకునేందుకు ప్రజలు తగిన జాగ్రత్తలు తీసుకోవాలని హితవు పలికారు. ప్రస్తుతం ఉన్న పరిస్థితుల గురించి ఏ మాత్రం భయపడాల్సిన అవసరం లేదని ఆయన స్పష్టం చేశారు.

చైనాలో హెచ్‌ఎంపీవీ వైరస్‌ విజృంభిస్తున్నట్లు వార్తలు వస్తున్నాయని.. అతుల్ గోయల్ తెలిపారు. ఈ వైరస్‌ సాధారణ జలుబుకు కారణమయ్యే ఇతర శ్వాసకోశ వైరస్‌ల లాగే ఉంటుందని.. అయితే పిల్లలు, వృద్ధుల్లో ఫ్లూ వంటి లక్షణాలను చూపిస్తుందని పేర్కొన్నారు. భారత్‌లో శ్వాసకోశ సంబంధిత వైరస్‌ల వ్యాప్తికి సంబంధించిన సమాచారాన్ని ఇప్పటికే విశ్లేషించామని.. డిసెంబర్‌ వరకు ఉన్న డేటాలో ఎలాంటి భారీ మార్పులు కనిపించలేదని తెలిపారు. ఆరోగ్య సంస్థల నుంచి కూడా పెద్ద సంఖ్యలో నమోదైన కేసులేవీ రాలేదని అతుల్ గోయల్ స్పష్టం చేశారు.

ప్రస్తుతం నడుస్తున్న శీతాకాలంలో శ్వాసకోశ వైరస్ ఇన్‌ఫెక్షన్లు ఎక్కువగా వ్యాప్తి చెందుతాయని.. ఇందుకోసం ఆస్పత్రుల్లో వసతులు సమకూర్చుకోవాలని డీజీహెచ్ఎస్ అధికారి అతుల్ గోయల్ తెలిపారు. ఆస్పత్రుల్లో ఇతర సామగ్రి, పడకలను సిద్ధంగా ఉంచుకోవాలని సూచించారు. ముఖ్యంగా అన్ని శ్వాసకోశ ఇన్ఫెక్షన్ల నియంత్రణకు సాధారణ జాగ్రత్తలు తీసుకోవడం చాలా అవసరమని పేర్కొన్నారు. దగ్గు, జలుబు ఉన్నవారు ఎక్కువ మందితో కలవడం మంచిది కాదని తెలిపారు. మామూలుగా దగ్గు, తుమ్ములు వచ్చినప్పుడు టవల్‌ను అడ్డుగా పెట్టుకోవాలని సూచించారు. జలుబు, జ్వరం ఉంటే అవసరమైన మందులు తీసుకోవాలని తెలిపారు. ఇప్పుడు ఉన్న పరిస్థితి గురించి మాత్రం ఆందోళన చెందాల్సిన అవసరం లేదని అతుల్ గోయల్ పేర్కొన్నారు.