కాంగ్రెస్‌కు బిగ్ షాక్.. ఢిల్లీ ఎన్నికల్లో ఇండియా కూటమి మద్దతు ఆమ్ ఆద్మీ పార్టీకే

రోజురోజుకూ ఇండియా కూటమిలో లుకలుకలు బయటపడుతున్నాయి. కాంగ్రెస్ పార్టీపై తీవ్ర అసంతృప్తి వ్యక్తం చేస్తున్న ఇండియా కూటమిలోని పార్టీలు.. హస్తం పార్టీకి షాక్ ఇస్తున్నాయి. ఇప్పటికే ఇండియా కూటమి నాయకత్వం కాంగ్రెస్ పార్టీకి కాకుండా మరో పార్టీకి అప్పగించాలనే డిమాండ్లు వెల్లువెత్తుతున్నాయి. ఆమ్ ఆద్మీ పార్టీ నేషనల్ కన్వీనర్ అరవింద్ కేజ్రీవాల్.. పశ్చిమ బెంగాల్ సీఎం, టీఎంసీ అధినేత్రి మమతా బెనర్జీకి ఇండియా కూటమి పగ్గాలు ఇవ్వాలని రోజుకో కూటమి పార్టీల నేతలు పేర్కొంటుండటం కాంగ్రెస్ పార్టీకి తీవ్ర ఇబ్బందికర పరిణామంగా మారింది. ఈ నేపథ్యంలోనే తాజాగా మరో ఎదురుదెబ్బ కాంగ్రెస్‌కు తగిలింది. ఇప్పటికే ఢిల్లీ అసెంబ్లీ ఎన్నికల్లో కాంగ్రెస్‌ను కాదని ఆమ్ ఆద్మీ పార్టీ ఒంటరిగా పోటీ చేస్తోంది.

ఇక ఢిల్లీ అసెంబ్లీ ఎన్నికల్లో హ్యాట్రిక్‌ విజయం కోసం తీవ్ర కసరత్తులు చేస్తున్న ఆమ్‌ ఆద్మీ పార్టీకి.. మమతా బెనర్జీ నేతృత్వంలోని తృణమూల్‌ కాంగ్రెస్‌ పూర్తి మద్దతు తెలిపింది. ఫిబ్రవరి 5వ తేదీన జరగనున్న ఢిల్లీ అసెంబ్లీ ఎన్నికలకు పశ్చిమ బెంగాల్‌ సీఎం మమతా బెనర్జీ మద్దతు ప్రకటించినట్లు ఆప్‌ కన్వీనర్‌, ఢిల్లీ మాజీ సీఎం అరవింద్‌ కేజ్రీవాల్‌ తెలిపారు. ఈ సందర్భంగా మమతా బెనర్జీకి కృతజ్ఞతలు తెలిపారు. ఈ మేరకు థాంక్యూ దీదీ అంటూ ట్విటర్‌లో కేజ్రీవాల్ పోస్ట్ చేశారు.

ఢిల్లీ ఎన్నికల్లో తమ పార్టీకి తృణమూల్‌ కాంగ్రెస్‌ పార్టీ మద్దతు ప్రకటించినందుకు దీదీకి వ్యక్తిగతంగా కృతజ్ఞతలు తెలుపుతున్నానని కేజ్రీవాల్‌ తెలిపారు. తమకు మంచి చెడుల్లో ఎల్లప్పుడూ అండగా నిలిచారని తెలిపారు. తాజాగా ఢిల్లీ అసెంబ్లీ ఎన్నికల్లో ఆప్‌కు టీఎంసీ మద్దతు తెలపడంతో.. కేజ్రీవాల్‌కు సపోర్ట్ చేస్తున్న ఇండియా కూటమి పార్టీల సంఖ్య పెరుగుతోంది. గతంలో సమాజ్‌వాదీ పార్టీ, శివసేన ఉద్ధవ్ ఠాక్రే పార్టీలు కేజ్రీవాల్‌కు మద్దతు తెలిపాయి.

గతేడాది జరిగిన లోక్‌సభ ఎన్నికల్లో ఢిల్లీలో కాంగ్రెస్‌ పార్టీతో పొత్తు పెట్టుకున్న ఆప్‌.. ఆ తర్వాత జరిగిన హర్యానా ఎన్నికల్లో ఒంటరిగానే పోటీ చేసింది. ఢిల్లీలో మొత్తం 70 అసెంబ్లీ స్థానాలు ఉండగా.. 2015లో 67 స్థానాలు గెలుచుకుని తొలిసారి ఆప్‌ అధికారంలోకి వచ్చింది. ఆ తర్వాత 2020లో జరిగిన ఎన్నికల్లో 62 సీట్లు గెలిచి.. రెండోసారి అధికారాన్ని నిలబెట్టుకుంది.