నష్టపరిహారం ఇవ్వం, పోలీసులనూ సస్పెండ్ చేయం..: కస్టడీ మృతిపై నిరసిస్తున్న కుటుంబానికి డీఎస్పీ షాక్

యూపీకి చెందిన ఓ వ్యక్తి ఇటీవలే పోలీసు కస్టడీలో మరణించాడు. పోలీసులే అతడిని కొట్టి చంపారంటూ అతడి కుటుంబ సభ్యులు ఆరోపిస్తున్నారు. ఈ ఘటనపై పోలీసు అధికారులు స్పందించాలని, తమకు నష్ట పరిహారంగా 30 లక్షల రూపాయాలు చెల్లించాలని, అంతేకాకుండా బాధిత పోలీసులను సస్పెండ్ చేయాలంటూ మృతదేహంతో సహా రోడ్డుపై బైఠాయించారు. అయితే వీరికి నచ్చజెప్పాల్సిన డీఎస్పీ మాత్రం వీరిపై ఫైర్ అయ్యారు. మీకు నచ్చినట్లుగా చేసుకోండి మేము ఎలాంటి చర్యలు తీసుకోమని తెగేసి చెప్పారు. ప్రస్తుతం ఈ వీడియో నెట్టింట వైరల్ అవుతుండగా.. సమాజ్ వాదీ పార్టీ అధినేత అఖిలేష్ యాదవ్ ఈ వీడియోను రీట్వీట్ చేశారు. బీజేపీ హృదయం లేని పార్టీ అంటూ రాసుకొచ్చారు. ఆ పూర్తి విశేషాలు ఏంటో మనం ఇప్పుడు తెలుసుకుందాం.

లిఖింపూర్ ఖేరీలోని హులాసి పూర్వా గ్రామానికి చెందిన రామచంద్ర మౌర్య.. గత కొంత కాలం క్రిత కట్టెల కోసం ఇంటి నుంచి బయలు దేరాడు. అయితే రామచంద్ర అక్రమంగా మద్యం ఉత్పత్తి చేస్తున్నాడంటూ మాజ్‌గై పోలీస్ స్టేషన్‌కు చెందిన పోలీసులు అతడిని అరెస్ట్ చేశారు. అయితే పోలీసుల కస్టడీలో ఉండగానే రామచంద్ర మృతి చెందాడు. గుండెపోటు వల్లే అతడు చనిపోయాడని పోలీసులు చెబుతున్నారు. కానీ అతడి కుటుంబ సభ్యులు మాత్రం పోలీసులు తీవ్రంగా హింసించడం వల్లే రామచంద్ర చనిపోయాడని వివరిస్తున్నారు.

ఈక్రమంలోనే బాధిత పోలీసులపై కఠిన చర్యలు తీసుకోవాలని కోరుతూ.. రామచంద్ర కుటుంబ సభ్యులు నిరసనకు దిగారు. ఆయన మృతదేహాన్ని తీసుకొచ్చి మరీ రోడ్డుపై బైఠాయించారు. ముఖ్యంగా నష్ట పరిహారంగా తమకు 30 లక్షల రూపాయలు చెల్లించాలని, అలాగే కుటుంబంలో ఒకరికి ప్రభుత్వ ఉద్యోగం ఇవ్వాలని డిమాండ్ చేశారు. అంతేకాకుండా బాధిత పోలీసులను సస్పెండ్ చేయాలని కోరారు. అయితే దీనిపై పోలీసులు ఏమాత్రం స్పందించకుండా.. బలవంతంగా వారి వద్ద నుంచి రామచంద్ర మృతదేహాన్ని పోస్టుమార్టం నిమిత్తం ఓ ప్రభుత్వాసుపత్రికి తీసుకు వెళ్లేందుకు ప్రయత్నించారు.

ఆ విషయం తెలుసుకున్న రామచంద్ర బంధువులు, గ్రామస్థులు వెంటనే రోడ్డుపై బైఠాయించారు. అతడి మృతదేహాన్ని తీసుకు వెళ్లేందుకు తాము ఒప్పుకోమంటూ పెద్ద ఎత్తున ధర్నా చేశారు. దీంతో స్థానిక డీఎస్పీ పీపీ సింగ్... వారికి నచ్చజెప్పాల్సింది పోయి వారిపైనే కోప్పడ్డాడు. కుటుంబానికి పెద్ద దిక్కును కోల్పోయి కన్నీటి పర్యంతం అవుతున్న ఆయన కుటుంబ సభ్యులకు అండగా నిలవకుండా.. అమానుషంగా ప్రవర్తించారు. మృతదేహాన్ని ఎక్కడికైనా తీసుకెళ్లండి, ఎన్ని రోజులైనా నిరసన చేపట్టమంటూ వ్యాఖ్యానించారు. అంతేకాకుండా మీకు నష్ట పరిహారం ఇవ్వమూ, పోలీసులపై ఎలాంటి చర్యలూ తీసుకోబోమని స్పష్టం చేశారు.

ఇందుకు సంబంధించిన వీడియో ప్రస్తుతం నెట్టింట వైరల్ అవుతోంది. అయితే దీనిపై సమాజ్ వాదీ పార్టీ అధినేత అఖిలేష్ యాదవ్ స్పందించారు. ఎక్స్ వేదికగా ఈ వీడియోను షేర్ చేస్తూ... బీజేపీ హృదయం లేని పార్టీ అంటూ రాసుకొచ్చారు. మరోవైపు ప్రియాంక గాంధీ కూడా దీనిపై స్పందించారు. భారత రాజ్యాంగం దళితులు, అణగారిని వారికి అన్యాయం జరిగితే ఏమాత్రం పట్టించుకోదని రాసుకొచ్చారు. అలాగే బీజేపీ పాలనలో అణగారిన వర్గాల హక్కులకు గౌరవం కల్పించదంటూ కామెంట్లు చేశారు.