ఆర్టీసీలో ఉద్యోగ విరమణ చేసిన వారికీ ప్రభుత్వం తీపికబురు
Andhra Pradesh Telugu | Suryaa Desk | Published : Fri, Jan 10, 2025, 04:20 PM
ఆర్టీసీలో 2020 తర్వాత ఉద్యోగ విరమణ చేసిన వారికి ఈహెచ్‌ఎస్‌ ద్వారా వైద్య సేవలు పొందేందుకు కూటమి ప్రభుత్వం గ్రీన్‌సిగ్నల్‌ ఇచ్చింది. 2020లో ఆర్టీసీని అప్పటి జగన్‌ సర్కార్‌ ప్రభుత్వంలో విలీనం చేసింది. కార్పొరేషన్‌లోని వారంతా ప్రభుత్వ ఉద్యోగులుగా మారడంతో తమకు ఎంతో ప్రయోజనం కలుగుతుందని ఆశపడ్డారు. కాని, 2020 తర్వాత ఉద్యోగ విరమణ చేసిన వారికి ఇకపై ఈహెచ్‌ఎస్‌ ఉండదని చెప్పడంతో నిరాశ చెందారు. వారంతా సొంత ఖర్చులతోనే వైద్య సేవలు పొందాల్సిన పరిస్థితి. అసలే పెన్షన్‌ తక్కువ. పైగా వైద్య సదుపాయం రద్దుతో ఆర్థికంగా ఇబ్బందులు పడుతున్నారు. వాస్తవంగా కార్పొరేషన్‌లో ఉన్నప్పుడు పదవీ విరమణ సమయంలో ఉద్యోగి నుంచి కొంత సొమ్మును ఈహెచ్‌ఎస్‌కు కట్టించుకుని భార్యాభర్తలకు రెండు లక్షల 50 వేల వరకు వైద్య ఖర్చులు భరించి సేవలందించేవారు. విలీనం తర్వాత దానిని రద్దు చేయడంతో అయోమయంగా మారింది. అంతకు ముందు ఉద్యోగ విరమణ చేసిన వారికి ఈ సేవలు యధావిధిగా అందుతున్నాయి. ఈ సమస్యలపై యూనియన్‌ నాయకులు ప్రభుత్వం దృష్టికి తీసుకువెళ్లడంతో సానుకూలంగా స్పందించారు.
|
|