యూట్యూబర్ ఫన్ బకెట్ భార్గవ్‌కు 20 ఏళ్లు జైలు శిక్ష.. విశాఖ కోర్టు సంచలన తీర్పు

టిక్ టాక్ స్టార్, యూట్యూబర్ ఫన్ బకెట్ భార్గవ్‌కు షాక్ తగిలింది. ఫన్ బకెట్ భార్గవ్‌కు విశాఖపట్నం పోక్సో కోర్టు 20 ఏళ్ల జైలు శిక్ష విధించింది. మైనర్ బాలికను గర్భవతిని చేశారంటూ ఫన్ బకెట్ భార్గవ్‌ మీద కేసు నమోదైంది. ఈ కేసులో భార్గవ్‌ను దోషిగా తేల్చిన విశాఖపట్నం పోక్సో కోర్టు.. 20 ఏళ్ల జైలు శిక్ష, 4 లక్షల రూపాయల జరిమానా విధిస్తూ శుక్రవారం తీర్పు వెల్లడించింది. ఈ కేసుకు సంబంధించిన వివరాల్లోకి వెళ్తే..

విజయనగరం జిల్లా కొత్తవలసకు చెందిన భార్గవ్ చిప్పాడ.. ఒక సాధారణ రైల్వే గేట్ మ్యాన్ కొడుకు. టిక్ టాక్ వీడియోల ద్వారా భార్గవ్ ఫేమస్ అయ్యారు. టిక్ టాక్ వీడియోల ద్వారా ఫన్ బకెట్ భార్గవ్‌గా గుర్తింపు సంపాదించుకున్నారు. అప్పట్లో భార్గవ్ చిప్పాడ ఒక సెన్సేషన్. ఒక దశలో 43 లక్షల వ్యూయర్‌షిప్‌తో దక్షిణ భారతదేశంలోనే మొదటి ర్యాంకులో నిలిచారు. ఇలా తన వీడియోల ద్వారా సోషల్ మీడియా ఇన్‌ఫ్లుయెన్సర్‌గా ఎదగడంతో ఫన్ బకెట్ భార్గవ్ పేరు మీడియాలో మార్మోగింది.

ఈ క్రమంలోనే ఫన్ బకెట్ భార్గవ్‌కు విశాఖపట్నంలోని సింహగిరికి చెందిన 14 ఏళ్ల బాలిక పరిచయమైంది. ఆన్‌లైన్ చాటింగ్‌ ద్వారా ఒకరికొకరికి పరిచయం అయ్యారు. మైనర్ బాలికకు కూడా టిక్ టాక్ వీడియోలంటే ఇఁట్రెస్ట్ ఉండటంతో ఇద్దరి మధ్య స్నేహం కుదిరింది. అయితే, ఈ స్నేహాన్ని అడ్డుపెట్టుకుని ఆ మైనర్ బాలికను ఫన్ బకెట్ భార్గవ్ గర్భవతిని చేశారంటూ ఆరోపణలు వచ్చాయి. దీనికి సంబంధించి బాలిక తల్లిదండ్రులు 2021 ఏప్రిల్ 16న పెందుర్తి పోలీసులకు ఫన్ బకెట్ భార్గవ్ మీద ఫిర్యాదు చేశారు. వెబ్ సిరీస్‌లలో అవకాశాలు ఇప్పిస్తానంటూ మోసం చేసి గర్భవతిని చేశారంటూ ఫిర్యా్దు చేశారు. దీంతో పెందుర్తి పోలీసులు భార్గవ్‌పై పోక్సో చట్టం కింద కేసు నమోదు చేశారు. ఆ తర్వాత ఈ కేసును విశాఖ సిటీ దిశ పోలీసులకు మార్చారు.

ఇక అప్పటి నుంచి ఫన్ బకెట్ భార్గవ్ కేసు విచారణ విశాఖపట్నం పోక్సో కోర్టులో కొనసాగుతూ వస్తోంది. ఈ కేసులో ఫన్ బకెట్ భార్గవ్‌ను పోలీసులు అరెస్ట్ చేశారు. మధ్యలో భార్గవ్ బెయిల్‌పై విడుదలయ్యాడు. దాదాపు మూడున్నరేళ్ల పాటు విచారణ సాగిన అనంతరం.. ఫన్ బకెట్ భార్గవ్‌ను దోషిగా తేలుస్తూ విశాఖపట్నం కోర్టు శుక్రవారం తీర్పు ప్రకటించింది. దీంతో ఈ కేసులో బెయిల్‌ మీద ఉన్న భార్గవ్ ఇప్పుడు మళ్లీ జైలుకి వెళ్లాల్సిన పరిస్థితులు ఉన్నాయి.. అయితే విశాఖపట్నం పోక్సో కోర్టు తీర్పుపై భార్గవ్ హైకోర్టును ఆశ్రయించే అవకాశం ఉంది.