వినూత్న రీతిలో ఛాంపియన్స్ ట్రోఫీకి జట్టును ప్రకటించిన కివీస్

వచ్చే నెలలో పాకిస్థాన్, యూఏఈలో జరగనున్న ఛాంపియన్స్ ట్రోఫీ 2025 కోసం న్యూజిలాండ్ క్రికెట్ బోర్డు తమ జట్టును ప్రకటించింది. ఈ మేరకు 15 మంది సభ్యులతో కూడిన జట్టును వినూత్న రీతిలో ప్రకటించింది. ఐసీసీ టోర్నీలకు వినూత్న రీతిలో జట్టును ప్రకటించడం అలవాటుగా చేసుకున్న కివీస్.. ఈసారి కూడా అదే పునరావృతం చేసింది. ఇందులో భాగంగా కెప్టెన్ మిచెల్ శాంట్నర్ వచ్చి మైదానంలో కూర్చుని ఉంటాడు. అతడే జట్టులోని ఒక్కొక్కరి పేర్లను రివీల్ చేశాడు. ఇందుకు సంబంధించిన వీడియోను న్యూజిలాండ్ క్రికెట్ బోర్డు పంచుకుంది.

అయితే ఈ జట్టులో కివీస్ పలు అనూహ్య నిర్ణయాలు తీసుకుంది. వన్డే ఫార్మాట్‌లో కివీస్ తరఫున ఒక్క మ్యాచ్ కూడా ఆడని 26 ఏళ్ల పేసర్ బెన్ సీర్స్‌ను ఈ ట్రోఫీ కోసం ఎంపిక చేసింది. అతడితో పాటు ఆల్‌రౌండర్ నాథన్ స్మిత్‌ను కూడా జట్టులోకి తీసుకుంది. మ్యాట్ హెన్రీ, లుకీ ఫెర్గుసన్‌తో కూడిన పేస్ దళం పటిష్టంగా కనిపిస్తోది. ఇక బ్యాటింగ్‌లో కేన్ విలియమ్సన్, టామ్ లాథమ్, డెవాన్ కాన్వేలు ఉన్నారు. ఆల్ రౌండర్ల కోటాలో కెప్టెన్ శాంట్నర్, గ్లెన్ ఫిలిప్స్, రచిన్ రవీంద్ర, మైకెల్ బ్రేస్‌వెల్‌లు జట్టులో ఉన్నారు.

ఛాంపియన్స్ ట్రోఫీ కోసం న్యూజిలాండ్ జట్టు:

మిచెల్ శాంట్నర్ (కెప్టెన్), మైకెల్ బ్రేస్‌వెల్, మార్క్ చాప్‌మన్, డెవాన్ కాన్వే, లుకీ ఫెర్గుసన్, మ్యాట్ హెన్రీ, టామ్ లేథమ్, డేరిల్ మిచెల్, విల్ ఓ రుర్కే, గ్లెన్ ఫిలిప్స్, రచిన్ రవీంద్ర, బెన్ సీర్స్, నాథన్ స్మిత్, కేన్ విలియమ్సన్, విల్ యంగ్

ఛాంపియన్స్ ట్రోఫీకి ముందు పాకిస్థాన్, న్యూజిలాండ్, దక్షిణాఫ్రికా జట్ల మధ్య ట్రై సిరీస్ జరగనుంది. ఈ సిరీస్‌లోనూ.. ఇదే జట్టుతో కివీస్ బరిలోకి దిగనుంది. కాగా ఛాంపియన్స్ ట్రోఫీకి ఫిబ్రవరి 19న తెరలేవనుంది. పాకిస్థాన్, యూఏఈ వేదికగా మ్యాచ్‌లు జరగనున్నాయి. భారత్ ఆడే మ్యాచులు అన్నీ యూఏఈ వేదికగా జరగనున్నాయి. ఫైనల్ మార్చి 9న జరగనుంది.

మొత్తంగా ఈ టోర్నీలో 8 జట్లు పాల్గొంటాయి. . వీటిని 2 గ్రూప్‌లుగా విభజించారు. అందులో గ్రూప్‌-ఏలో పాకిస్థాన్, భారత్‌, న్యూజిలాండ్‌, బంగ్లాదేశ్‌ జట్లు ఉన్నాయి. గ్రూప్‌-బిలో దక్షిణాఫ్రికా, ఆస్ట్రేలియా, అప్ఘానిస్థాన్‌, ఇంగ్లాండ్‌లు ఉన్నాయి. భారత్‌లో జరిగిన వన్డే ప్రపంచకప్ 2023 పాయింట్ల పట్టికలో టాప్‌-8 స్థానాల్లో ఉన్న జట్లు ఛాంపియన్స్ ట్రోఫీ 2025 ఆడేందుకు అర్హత సాధించాయి. న్యూజిలాండ్ తన తొలి మ్యాచ్‌లో ఫిబ్రవరి 19న ఆతిథ్య పాకిస్థాన్‌తో తలపడనుంది.