3 ఏళ్లలోనే హైరిటర్న్స్.. లిస్ట్‌లో హెచ్‌డీఎఫ్‌సీ స్కీమ్.. టాప్-5 మిడ్ క్యాప్ ఫండ్స్ ఇవే

మ్యూచువల్ ఫండ్స్‌లో గత మూడేళ్ల కాలంలో ఫండ్స్‌ పని తీరు గమనిస్తే మిడ్ క్యాప్ మ్యూచువల్ ఫండ్స్ మెరుగైన పనితీరును కనబరచాయి. సగటున 32 శాతం చొప్పున వార్షిక రిటర్న్స్ అందించాయి. దీంతో ఇన్వెస్టర్లకు కాసుల వర్షం కురిసిందని చెప్పవచ్చు. ఎందుకంటే మ్యూచువల్ ఫండ్స్‌లో కాంపౌండింగ్ మ్యాజిక్ అనేది పని చేస్తుంది. వడ్డీపైన వడ్డీ జమ అవుతుంటుంది. వీటిలో టాప్-5 లో నిలిచిన ఫండ్స్ వివరాలు ఓసారి పరిశీలిద్దాం. అందులో మోతీలాల్ ఓస్వాల్ మిడ్ క్యాప్ ఫండ్ అగ్రస్థానంలో నిలిచింది. అయితే, ఇన్వెస్టర్లు గత రిటర్న్స్ చూసి పెట్టుబడి పెట్టవద్దు. భవిష్యత్తులో అదే రాబడులు వస్తాయనేందుకు గ్యారెంటీ ఉండదు. టాప్-5 ఫండ్స్ గురించి తెలుసుకుందాం.

మోతీలాల్ ఓస్వాల్ మ్యూచవల్ ఫండ్స్ సంస్థ తీసుకొచ్చిన మోతీలాస్ ఓస్వాల్ మిడ్ క్యాప్ ఫండ్ అనేది గడిచిన మూడేళ్లలో మంచి పనితీరును కనబరిచింది. మూడేళ్లలో సగటున 32.41 శాతం మేర వార్షిక రాపబడులు అందించింది. దీంతో మిడ్ క్యాప్ ఫండ్లోనే టాప్‌లో నిలిచింది. ఇక ఆ తర్వాత రెండో స్థానంలో హెచ్‌డీఎఫ్‌సీ మ్యూచువల్ ఫండ్ ఏఎంసీకి చెందిన హెచ్‌డీఎఫ్‌సీ మిడ్ క్యాప్ ఫండ్ ఆపర్చునిటీస్ ఫండ్ నిలిచింది. ఈ స్కీమ్ గడిచిన మూడేళ్లలో చూస్తే సగటున 26.17 శాతం చొప్పున వార్షిక రాబడులు అందించింది.

ఇక మూడో స్థానంలో నిప్పాన్ ఇండియా ఏఎంసీకి చెందిన నిప్పాన్ ఇండియా గ్రోత్ మిడ్ క్యాప్ ఫండ్ నిలిచింది. ఈ స్కీమ్ గడిచిన మూడేళ్ల కాలంలో మెరుగైన పనితీరుతో సగటున 24.14 శాతం వార్షిక రాబడులు అందించింది. ఇక నాలుగో స్థానంలో ఎడెల్విస్ మిడ్ క్యాప్ ఫండ్ నిలిచింది. ఈ మిడ్ క్యాప్ ఫండ్ సైతం గత మూడేళ్లలో హైరిటర్న్స్ అందించింది. సగటున ఏడాదికి 24.04 శాతం చొప్పున రాబడులు అందించింది. ఇక టాప్-5లో ఇన్వెస్కో ఇండియా ఏఎంసీకి చెందిన ఇన్వెస్కో ఇండియా మిడ్ క్యాప్ ఫండ్ నిలిచింది. ఈ స్కీమ్ గత మూడు సంవత్సరాల్లో చూస్తే ఏడాదికి సగటున 23.17 శాతం చొప్పున రాబడులు ఇచ్చి ఐదో స్థానాన్ని దక్కించుకుంది.