టెక్ దిగ్గజం ఇన్ఫోసిస్ కీలక నిర్ణయం.. ఉద్యోగులు ఎగిరిగంతేసే వార్త.. ఫిబ్రవరి నుంచే

దేశీయ ఐటీ దిగ్గజాల్లో ఒకటైన ఇన్ఫోసిస్ తమ ఉద్యోగులకు త్వరలోనే అదిరే శుభవార్త చెప్పనుందని సమాచారం. ఉద్యోగులు ఎగిరిగంతేసే వార్త ఇదని చెప్పవచ్చు. వచ్చే నెల ఫిబ్రవరిలోనే వేతనాల పెంపును ప్రకటించే అవకాశం ఉందని తెలుస్తోంది. దీనికి సంబంధించి ఉద్యోగులకు త్వరలోనే సమాచారం అందించనుంది. ఈ మేరకు జాతీయ మీడియాల్లో పలు కథనాలు వెలువడుతున్నాయి. కోవిడ్ మహమ్మారి తర్వాత కుదేలైన ఐటీ, టెక్ రంగం ఇప్పుడిప్పుడే కోలుకుంటోంది. గతేడాది దేశీయ ఐటీ కంపెనీలు మంచి ప్రాజెక్టులు దక్కించుకున్నాయి. ఈ క్రమంలో ఈ ఏడాది ఉద్యోగులకు వేతనాల పెంపు, ప్రోత్సాహకాలు ఇచ్చేందుకు కంపెనీలు సిద్ధమవుతున్నట్లు తెలుస్తోంది.

టెక్ దిగ్గజం ఇన్ఫోసిస్‌లో వేతనాల పెంపు అనేది తొలుత జాబ్ లెవల్ 5 (JL 5) స్థాయి ఉద్యోగులకు ఇవ్వనున్నట్లు నేషనల్ మీడియా కథనాల ద్వారా తెలుస్తోంది. వీరికి ఫిబ్రవరి నెలలోనే వేతనాల పెంపు సంబంధిత లెటర్స్ జారీ చేయనున్నారట. అయితే, ఈ జీతాల పెంపు మాత్రం జనవరి 1వ తేదీ నుంచే అమలులోకి వస్తుందని తెలుస్తోంది. జేఎల్ 5 స్థాయిలో సాఫ్ట్‌వేర్ ఇంజినీర్లు, సీనియర్ ఇంజినీర్లు, సిస్టమ్ ఇంజినీర్లు, కన్సల్టెంట్ల వంటి ఉద్యోగులు ఉంటారు.

ఇక జాబ్ లెవల్ 6 ఆపైన స్థాయి లో ఉన్న వారికి మార్చి, 2025 నెలలో వేతనాల పెంపునకు సంబంధించిన లెటర్లు అందుతాయని తెలుస్తోంది. వీరికి ఏప్రిల్, 2025 నెల నుంచి వేతన పెంపు వర్తిస్తుందని కంపెనీ వర్గాలను ఉటంకిస్తూ పలు మీడియాలు కథనాలు వెలువరించాయి. అయితే, ఇప్పటి వరకు కంపెనీ నుంచి జీతాల పెంపు విషయంపై ఎలాంటి అధికారిక ప్రకటన రాలేదు. అంతర్గతంగా ఉద్యోగులకు వేతన పెంపు లెటర్లు జారీ చేసే సమయంలో ఈ విషయంపై క్లారిటీ వచ్చే అవకాశాలు ఉన్నాయని తెలుస్తోంది.

అయితే, ఇన్ఫోసిస్ వేతనాల పెంపుతో ఉద్యోగులకు శుభవార్త అందించనున్నప్పటికీ ఐటీ ఉద్యోగుల్లో ఆందోళనలు పోవడం లేదు. ఈ కొత్త ఏడాది 2025లోనూ ఉద్యోగాల కోతలు జరగనున్నట్లు తెలుస్తోంది. ఇప్పటికే ప్రపంచ స్థాయి టెక్ కంపెనీ మైక్రోసాఫ్ట్ ఉద్యోగాల తొలగింపులను ప్రకటించింది. అంతకు ముందే గూగుల్ సైతం ఇలాంటి ప్రకటనే చేసింది. పెద్ద కంపెనీలే ఉద్యోగులను తొలగించేందుకు సిద్ధమవుతున్న తరుణంలో చిన్న సంస్థల్లోనూ లేఆఫ్స్ ఉండవచ్చనే అంచనాలు ఉన్నాయి. దీంతో ఐటీ ఉద్యోగుల్లో మళ్లీ ఆందోళనలు మొదలయ్యాయని చెప్పవచ్చు.