సంక్రాంతికి గ్యాస్ట్రిక్ సమస్యలకు చెక్ పెట్టే చిట్కాలు, ఏది తిన్నా ఆరాయించుకుంటారు

సంక్రాంతి.. రెండు తెలుగు రాష్ట్రాల్లో అతి పెద్ద పండగ. ఈ పండగను మూడు రోజుల పాటు అంగరంగ వైభవంగా జరుపుకుంటారు. భోగి, మకర సంక్రాంతి, కనుమ.. ఇలా ప్రతి రోజూ కూడా ప్రాధాన్యతను సంతరించుకుంది. ముత్యాల ముగ్గులు, నవధాన్యాలు, గంగిరెద్దుల విన్యాసాలు, గాలి పటాలు, కోడి పందేలు, హరిదాసుల కీర్తనలు, బొమ్మల కొలువులు ఇలా ప్రతి ఇంటా ఆనందాన్ని నింపే పర్వదినమే సంక్రాంతి. ఇక, రెండు తెలుగు రాష్ట్రాల్లో ఈ పండుగకి స్కూళ్లతో పాటు కాలేజీలకు కూడా సెలవులు ఇచ్చారు. వివిధ ప్రాంతాల్లో పనిచేసేవారు ఈ పర్వదినానికి సెలవులు పెట్టి పల్లె లోగిళ్లలో వాలిపోతారు. సంక్రాంతి సెలబ్రేషన్స్‌లో పిండి వంటలు గురించి ప్రత్యేకంగా చెప్పుకోవాలి. రకరకాల పిండి వంటలు అందర్నీ నోరూరిస్తాయి.

ఇంకేముంది సంక్రాంతి సెలబ్రేషన్స్‌లో ఓ పట్టు పట్టేస్తున్నారు. ఇంట్లో తయారుచేసిన పిండి వంటకాల్ని కూడా లాగించేస్తున్నారు. అయితే, ఈ సమయాల్లో ఆరోగ్యం మీద దృష్టి పెట్టడం సాధ్యం కాదు. ఎక్కువగా స్పైసీ ఉన్న ఫుడ్, స్నాక్స్, వేయించిన ఆహారాలు తీసుకోవడం వల్ల గ్యాస్ట్రిక్ సమస్యలు ఎదుర్కోవచ్చు. అయితే, పండుగ సమయాన్ని ఎంజాయ్ చేయాలంటే కొన్ని చిట్కాలు పాటించాలి. ఈ చిట్కాలతో మీరు హాయిగా తినవచ్చు. ఈ చిట్కాలేంటో ఇక్కడ తెలుసుకుందాం.

స్పైసీ ఫుడ్ తినడం వల్ల వచ్చే సమస్యలు

సంక్రాంతికి చాలా మంది పిండి వంటలతో పాటు స్పైసీ ఫుడ్స్, మసాలా ఆహారాలు, బిర్యానీలు తింటుంటారు. అయితే, వీటిని ఎక్కువ మోతాదులో తినడం వల్ల కొన్ని రకాల ఆరోగ్య సమస్యల్ని ఎదుర్కోవచ్చు. అందులో ప్రధానంగా గ్యాస్ట్రిక్ సమస్య ఒకటి. సంక్రాంతి సమయంలో చాలా మంది ఆరోగ్యంపై దృష్టి పెట్టరు. దీంతో.. ఎక్కువగా వేయించిన ఫుడ్స్ తినడం వల్ల కడుపు, జీర్ణక్రియకు సంబంధించిన అనేక సమస్యలు సంభవిస్తాయి. ఈ సమస్యలలో కడుపు నొప్పి, పేలవమైన జీర్ణక్రియ, ఆమ్లత్వం, గ్యాస్, మలబద్ధకం, కడుపు, ఛాతీలో మంట, వాంతులు, విరేచనలు వంటివి ఉన్నాయి. కొన్ని చిట్కాలతో ఈ సమస్యలకు చెక్ పెట్టవచ్చు.

ఎక్కువ నీళ్లు తాగండి

సంక్రాంతి సమయంలో పిండి వంటకాల్ని ఓ పట్టు అయితే పడతాం కానీ.. ఎక్కువ నీళ్లు మాత్రం తాగం. మనం చేసే అతి పెద్ద తప్పు ఇదే. శరీరానికి ఎల్లప్పుడూ హైడ్రేషన్ అవసరం. అందుకే ప్రతి రోజూ నీరు ఎక్కువగా తాగాలి. అంతేకానీ.. తినడం మీద ఎక్కువ దృష్టి పెట్టి.. నీళ్లు తాగే లక్ష్యాన్ని మర్చిపోకూడదు. నీళ్లు ఎక్కువ తాగితే జీవక్రియ సరిగ్గా జరుగుతుంది. దీంతో.. చాలా సమస్యల దరి చేరవు.

వేయించిన ఆహారాన్ని అవాయిడ్ చేయండి

పండగ కదా అని చాలా మంది ఎలా పడితే అలా తింటుంటారు. అయితే, చాలా మంది చేసే తప్పు ఇదే. పండుగ సమయంలో ఎక్కువగా వేయించిన ఆహారం తినడాన్ని కంట్రోల్ చేసుకోవాలి. అంతేకాకుండా ఎక్కువగా తినకూడదు. మితంగా తింటే ఆరోగ్యానికి మంచిది. లేదంటే కాస్త గ్యాప్ ఇచ్చిన తర్వాత మరో చిరుతిండి తినవచ్చు. అయితే.. నూనెలో బాగా వేయించిన ఫుడ్స్ మాత్రం ఎక్కువ తినకూడదని గుర్తించుకోవాలి. దీంతో, గ్యాస్ సమస్యల్ని కంట్రోల్ చేయవచ్చు.​

ఫైబర్ ఫుడ్స్ ఎక్కువ తీసుకోండి

ఫెస్టివల్ టైంలో ఫైబర్ ఎక్కువగా ఉన్న ఆహారాల్ని తినండి. ఫైబర్ ఎక్కువగా ఉన్న ఫుడ్స్ తినడం వల్ల జీర్ణక్రియ మెరగవుతుంది. మలబద్ధకం సమస్య ఉన్నవారు ఫైబర్ ఫుడ్స్ ఎంత ఎక్కువ తీసుకుంటే అంత మంచిది .అయితే.. ఆహారంతో పాటు సలాడ్ కూడా తీసుకోవచ్చు.

అవసరమైన వ్యాయామాలు చేయండి

గ్యాస్ట్రిక్ సమస్యలను నివారించడానికి.. మీరు తిన్న తర్వాత కొన్ని అవసరమైన వ్యాయామాలు లేదా యోగా చేయాలి. పెద్ద పెద్ద వ్యాయామాలు అవసరం లేదు. తేలికపాటి నడక, ఈజీగా ఉండే యోగాసనాలు వేస్తే సరిపోతుంది. దీంతో.. మీరు తిన్నది సులభంగా జీర్ణమవుతుంది. అంతేకాకుండా గ్యాస్ట్రిక్ సమస్యలకు చెక్ పెట్టవచ్చు.

ఆహారాన్ని పూర్తిగా నమలండి

ఆహారాన్ని ఎంత బాగా నమిలితే.. అది అంత త్వరగా జీర్ణమవుతుంది. ఆహారాన్ని చిన్న చిన్న ముక్కలుగా చేసుకుని తింటే మంచిది. ఇలా తినడం వల్ల బాగా నమిలే అవకాశం ఉంటుంది. ఆహారాన్ని బాగా నమిలి తినడం వల్ల జీర్ణక్రియ మెరుగై.. గ్యాస్ సమస్యల్ని తగ్గిస్తుంది.

ధూమపానం, మద్యపానం చేయకండి..

చాలా మంది పండగ కదా అని మద్యపానం, ధూమపానం ఎక్కువగా చేస్తూ ఉంటారు. అయితే, ఇలాంటి పండగ సమయాల్లోనే వీటికి దూరంగా ఉండాలి. ఎందుకంటే పండుగ వేళల్లో మనం చాలా రకాల ఆహారాలు తింటూ ఉంటాం. ఈ సమయాల్లో వీటిని తీసుకుంటే.. ఆరోగ్యంపై ప్రభావం చూపే అవకాశం ఉంటుంది.