కోల్‌కతా ఆర్జీకర్ మెడికల్ కాలేజీ డాక్టర్‌ హత్యాచార కేసు.. కోర్టు సంచలన తీర్పు

గతేడాది ఆగస్ట్ 9వ తేదీన పశ్చిమ బెంగాల్ రాజధాని కోల్‌కతాలోని ఆర్జీకర్ మెడికల్ ఆస్పత్రిలో అర్ధరాత్రి జూనియర్ డాక్టర్‌పై జరిగిన అత్యాచారం, హత్య ఘటన.. కొన్ని నెలల పాటు యావత్ దేశాన్ని తీవ్రంగా కుదిపేసింది. ఈ ఘటనతో కోల్‌కతాలోని జూనియర్ డాక్టర్లు మాత్రమే కాకుండా.. దేశవ్యాప్తంగా జూడాలు తీవ్ర ఆందోళనలు, నిరసనలు చేపట్టారు. ఈ ఘటనకు కారణమైన దోషులను వీలైనంత త్వరగా పట్టుకుని శిక్షించాలని డిమాండ్లు చేస్తూ.. దీక్షలు, నిరసనలు చేశారు. ఈ క్రమంలోనే ఈ కేసును మొదట కోల్‌కతా పోలీసులు విచారణ జరపగా.. ఆ తర్వాత కోల్‌కతా హైకోర్టు ఆదేశాలతో సీబీఐ రంగంలోకి దిగింది. ఇందులో భాగంగానే సంజయ్ రాయ్‌ని ప్రధాన నిందితుడిగా పేర్కొనగా.. ఆర్జీకర్ మెడికల్ ఆస్పత్రి మాజీ ప్రిన్సిపల్ సందీప్ ఘోష్‌ సహా పలువురిని నిందితులుగా చేర్చారు.

ఈ క్రమంలోనే తాజాగా ఈ కేసులో కోల్‌కతా సీల్దా కోర్టు సంచలన తీర్పును ఇచ్చింది. ఈ కేసులో ప్రధాన నిందితుడిగా ఉన్న సంజయ్‌ రాయ్‌ను దోషిగా తేల్చింది. ఈ నేపథ్యంలోనే అతడికి సోమవారం రోజున శిక్షను ఖరారు చేయనున్నట్లు తెలిపింది. ఇక ఈ కేసులో ప్రత్యేక కోర్టుకు సీబీఐ ఛార్జిషీట్ సమర్పించింది. ఈ కేసులో ప్రధాన నిందితుడిగా ఉన్న సంజయ్‌ రాయ్‌ పేరును మాత్రమే ఛార్జ్‌షీట్‌లో చేర్చింది. అయితే జూనియర్ డాక్టర్‌పై సామూహిక అత్యాచారం జరిగినట్లు ఛార్జిషీటులో సీబీఐ ఎక్కడా ప్రస్తావించలేదు. ఆస్పత్రి ఆవరణలోని సీసీటీవీలో నమోదైన దృశ్యాల ఆధారంగా సంజయ్‌ రాయ్‌ని.. ఆగస్టు 10వ తేదీన కోల్‌కతా పోలీసులు అరెస్ట్‌ చేశారు.

మరోవైపు.. ఈ కేసులో మరికొంత మందిని కూడా అరెస్ట్ చేశారు. ఆర్జీకర్ మాజీ ప్రిన్సిపల్ సందీప్ ఘోష్.. తాలా పోలీస్‌ స్టేషన్‌ మాజీ ఆఫీసర్‌ ఇంఛార్జ్ అభిజిత్‌ మండల్ కూడా అరెస్ట్ అయ్యారు. సాక్ష్యాలు తారుమారు చేశారన్న ఆరోపణలపై వారు అరెస్ట్ కాగా.. తర్వాత వారికి ప్రత్యేక కోర్టులో బెయిల్ వచ్చింది. వారు అరెస్ట్ అయిన దగ్గరినుంచి 90 రోజుల్లో అనుబంధ ఛార్జ్‌షీట్‌ను ఫైల్‌ చేయడంలో విఫలం కావడంతో వారికి బెయిల్ లభించింది.