నాకైనా, లోకేష్‌కైనా ఆయన ఆశీర్వాదం ఉంటేనే పదవులు : వంగలపూడి అనిత

ఆంధ్రప్రదేశ్‌లో ప్రస్తుతం డిప్యూటీ సీఎం పదవిపై ఆసక్తికర చర్చ జరుగుతోంది. మంత్రి నారా లోకేష్‌ను డిప్యూటీ సీఎం చేయాలంటూ తెలుగుదేశం పార్టీ సీనియర్ నేతలు డిమాండ్ చేస్తున్నారు. టీడీపీ పొలిట్ బ్యూరో సభ్యులు శ్రీనివాసరెడ్డి నారా లోకేష్‌ను డిప్యూటీ సీఎం చేయాలంటూ ముఖ్యమంత్రి చంద్రబాబు నాయుడును కోరటంతో.. ఈ చర్చ మొదలైంది. ఆ తర్వాత సీనియర్ నేత సోమిరెడ్డి చంద్రమోహన్ రెడ్డి, పిఠాపురం ఎస్వీఎస్ఎన్ వర్మ, రఘురామకృష్ణరాజు వంటి నేతలు కూడా నారా లోకేష్‌ను డిప్యూటీ సీఎం చేయాలని రిక్వెస్ట్ చేశారు. ఈ పరిణామాల మధ్య నారా లోకేష్‌కు డిప్యూటీ సీఎం పదవిపై ఏపీ హోం మంత్రి వంగలపూడి అనిత ఆసక్తికర వ్యాఖ్యలు చేశారు.

సోమవారం ఉదయం సింహాచలం వరాహ లక్ష్మీనరసింహస్వామిని హోం మంత్రి వంగలపూడి అనిత కుటుంబసభ్యులతో కలిసి దర్శించుకున్నారు. ఈ సందర్భంగా హోం మంత్రికి దేవస్థానం అధికారులు ఆలయ మర్యాదలతో స్వాగతం పలికారు. లక్ష్మీనరసింహస్వామి దర్శనం అనంతరం వంగలపూడి అనితకు పండితులు వేద ఆశీర్వచనం అందించారు. తీర్థ ప్రసాదాలు అందజేశారు. అనంతరం మీడియాతో మాట్లాడిన వంగలపూడి అనిత.. నారా లోకేష్‌కు డిప్యూటీ సీఎం పదవి గురించి ఆసక్తికర వ్యాఖ్యలు చేశారు. విలేకర్లు ఈ విషయమై ప్రశ్నించగా.. హోంమంత్రి బదులిచ్చారు. తనకైనా, నారా లోకేష్‌కు అయినా దేవుడి ఆశీర్వాదాలు ఉంటేనే పదవులు వస్తాయని వంగలపూడి అనిత బదులిచ్చారు. తమతో పాటుగా అందరూ దేవుణ్ని కోరుకుంటే ఏ పదవులైనా వస్తాయంటూ వంగలపూడి అనిత వ్యాఖ్యానించారు.

మరోవైపు విశాఖపట్నం స్టీల్ ప్లాంట్‌కు కేంద్ర ప్రభుత్వం రూ.11,440 కోట్లు ప్రకటించడంపై వంగలపూడి అనిత హర్షం వ్యక్తం చేశారు. విశాఖపట్నం స్టీల్ ప్లాంట్ ప్రైవేటీకరణకు కేంద్రం ప్రకటించిన ప్యాకేజీయే సమాధానమని వంగలపూడి అనిత అన్నారు. అనంతరం గోపాలపట్నం పోలీస్ స్టేషన్‌ను వంగలపూడి అనిత ఆకస్మికంగా తనిఖీ చేశారు. సీసీ కెమెరాల నిర్వహణపై ఆరా తీశారు. అలాగే రౌడీ షీటర్ల వివరాలను పరిశీలించారు. గంజాయి రవాణాపై ఉక్కుపాదం మోపాలని.. ఎంతటి వారున్నా ఉపేక్షించవద్దని ఆదేశించారు.