పెద్దగా హారన్ కొడుతున్న బస్సు డ్రైవర్‌లకు ట్రాఫిక్ పోలీస్ తగిన శిక్ష

రోడ్డుపై వెళ్తున్న ప్రతీ ఒక్కరూ ఏదో ఒక సందర్భంలో వెనుక నుంచి వచ్చే పెద్ద హారన్ శబ్దం విని తీవ్రంగా భయపడి ఉంటారు. ముఖ్యంగా ఎంత చిరాకు వేసినా ఓసారి అలా వెనక్కి చూసి మళ్లీ ఇటువైపు తిరిగి లోలోపలే వాళ్లను తిట్టుకుంటుంటారు. కానీ వాళ్లు మాత్రం దాన్ని ఆపకుండా అలాగే శబ్దాలు చేస్తూ రచ్చ చేస్తుంటారు. సరిగ్గా ఇలాగే చేశారో ఇద్దరు బస్సు డ్రైవర్లు. అనసవర సందర్భంలో కూడా భారీ చప్పుడు చేసే హారన్‌ను మోగించారు. పదే పదే అలా చేయడంతో విసిగిపోయిన ట్రాఫిక్ పోలీస్.. వారికికి తగిన శిక్ష వేశాడు. జీవితంలో మళ్లీ ఇంకోసారి వారలా చేయడానికి భయపడేలా చేశాడు. ఆ పూర్తి వివరాలు మీకోసం.

కర్ణాటక జిల్లా శివమొగ్గ జిల్లాకు చెందిన ఓ ట్రాఫిక్ కానిస్టేబుల్ ఉదయం నుంచి విధులు నిర్వహిస్తూనే ఉన్నాడు. అయితే కొన్ని వాహనాలను ఆపిన అతడు.. మరోవైపు నుంచే వాహనాలను దారి మళ్లిస్తున్నాడు. ఈ క్రమంలోనే అతడి వెనకాల ఉన్న ఓ ప్రైవేటు కళాశాల బస్సు డ్రైవర్ సహా మరో ఆర్టీసీ బస్సు డ్రైవర్ అదే పనిగా హారన్ మోగించారు. విపరీతమైన శబ్దం కల్గిన ఆ హారన్.. పదే పదే మోగుతుండడంతో ట్రాఫిక్ పోలీస్ సహా స్థానికులు, తోటి ప్రయాణికులంతా తీవ్ర అసహనానికి గురయ్యారు.

అందరూ హారన్ మోగిన ప్రతీసారి బస్సు డ్రైవర్ల వైపు తిరిగి చూస్తూ.. వాళ్లలో వాళ్లే తిట్టుకుంటున్నారు. ఇదంతా గమనించిన ట్రాఫిక్ కానిస్టేబుల్ మాత్రం వెంటనే వాళ్ల వద్దకు వెళ్లాడు. ఎందుకలా పెద్ద పెద్ద చప్పుళ్లతో హారన్ మోగిస్తున్నావని అడుగుతూనే.. ముందుగా ఓ డ్రైవర్‌ను కిందకు పిలిచాడు. వెంటనే కిందకు వచ్చిన ఆ డ్రైవర్‌ను బస్సు ముందుకు తీసుకెళ్లి.. హారన్ శబ్దం వచ్చే చోట చెవి పెట్టించాడు. ఆపై బస్సులో ఉన్న హారన్‌ను పదే పదే కొట్టాడు ట్రాఫిక్ కానిస్టేబుల్. దీంతో విపరీతమైన శబ్దం రాగా.. వెంటనే పక్కకు వచ్చేశాడు బస్సు డ్రైవర్.

ఇది గమనించిన కానిస్టేబుల్.. అతడి వద్దకు వచ్చి బస్సులో ఉన్న వాళ్ల చేత హారన్ మోగిస్తూ అతడిని అక్కడే మోకాళ్లపై కూర్చోబెట్టి చప్పుడు వినిపించాడు. దీంతో డ్రైవర్ వద్దు సార్, వద్దు సార్ అంటూ చెప్పగా.. పర్లేదు వినమంటూ వివరించాడు ట్రాఫిక్ పోలీస్. అపై అతడిని పైకి లేపి ఇలా భారీ శబ్దాలు చేస్తుంటే అందరికీ అంతే విసుగ్గా ఉంటుందని వివరించే ప్రయత్నం చేశాడు. ఆపై మరో బస్సు డ్రైవర్‌ను కూడా పిలిచి ఇదే తరహా పనిష్మెంట్ ఇచ్చాడు. మరోసారి ఇలా చేస్తే అస్సలే బాగోదని ఆ ఇద్దరి డ్రైవర్‌లను హెచ్చరించి వెనక్కి పంపాడు. ప్రస్తుతం సోషల్ మీడియాలో ఈ వీడియో వైరల్‌గా మారగా.. చూసిన ప్రతీ ఒక్కరూ భలే బుద్ధి చెప్పారు సార్ అంటూ కామెంట్లు చేస్తున్నారు.

ఇలాంటి డ్రైవర్లందరికీ ఇలాగే బుద్ధి చెప్పాలని కొందరు నెటిజెన్లు కామెంట్లు చేస్తుండగా.. ఎన్ని సార్లు ఇలాంటి వాళ్లకు పనిష్మెంట్ ఇవ్వాలనుకున్నానో మీరిచ్చి నా మనసు స్థిమితమయ్యేలా చేశారంటూ మరో వ్యక్తి చెప్పుకొచ్చాడు. మీరు కూడా ఈ వీడియో చూసి ఏమనిపిస్తుందో చెప్పేసేయండి.