70 స్థానాలకు 699 మంది అభ్యర్థుల పోటీ.. ఢిల్లీ అసెంబ్లీ ఎన్నికల్లో గెలిచేదెవరు

దేశరాజధాని ఢిల్లీలో మరికొన్ని రోజుల్లోనే అసెంబ్లీ ఎన్నికలు నిర్వహించబోతున్నారు. ఈక్రమంలోనే ప్రధాన పార్టీలన్నీ పెద్ద ఎత్తున ప్రచారాలు చేస్తున్నాయి. ఇప్పటికే మేనిఫెస్టోలు విడుదల చేస్తూ.. ఈ ఎన్నికల్లో విజయం సాధించేందుకు శాయశక్తులా కృషి చేస్తున్నాయి. అయితే ఈ ఎన్నికల్లో మొత్తం 70 స్థానాలకు గాను 699 మంది అభ్యర్థులు బరిలో నిలిచినట్లు ఎన్నికల సంఘం అధికారులు తాజాగా వెల్లడించారు. గత అసెంబ్లీ ఎన్నికలతో పోలిస్తే ఈ సారి పోటీ చేసే వారి సంఖ్య ఎక్కువ అయినట్లు తెలిపారు. ఆ పూర్తి వివరాలు మీకోసం.

ఈసారి ఢిల్లీ అసెంబ్లీ ఎన్నికల్లో పోటీ చేసేందుకు మొత్తం 981 మంది అభ్యర్థులు నామినేషన్లు వేశారు. మొత్తంగా 1522 నామినేషన్ పత్రాలు రాగా.. పరిశీలించిన అధికారులు అందులో చెల్లని వాటిని తొలగించారు. ఆపై ఈసారి ఎన్నికల బరిలో పోటీ చేసే అభ్యర్థుల వివరాలను వెల్లడించారు. ముఖ్యంగా ఈసారి ఢిల్లీ అసెంబ్లీ ఎన్నికల్లో 70 స్థానాలకు గాను 699 మంది అభ్యర్థులు బరిలో నిలిచినట్లు ఢిల్లీ ఎన్నికల సంఘం ప్రధాన అధికారి తెలిపారు. అలాగే ఆ ఒక్క స్థానం నుంచే 23 మంది అభ్యర్థులో పోటీ చేస్తున్నట్లు చెప్పి అందరినీ ఆశ్చర్యపరిచారు.

ఆప్ అధినేత అరవింద్ కేజ్రీవాల్, బీజేపీ అభ్యర్థి పర్వేశ్ వర్మ, కాంగ్రెస్ అభ్యర్థి సందీప్ దీక్షిత్ పోటీ చేస్తున్న న్యూఢిల్లీ నుంచి.. మరో 20 మంది అధికంగా పోటీ చేస్తున్నట్లు తెలిపారు. ఈసారి ఎన్నికల్లో ఎక్కువ మంది పోటీ చేస్తున్న తొలి స్థానం ఇదేనని ప్రకటించారు. ఆ తర్వాత జనక్‌పురిలో 16 మంది అభ్యర్థులు బరిలో నిలిచారన్నారు. లక్ష్మీనగర్‌లో 15 మంది అభ్యర్థులు పోటీలో నిలవగా.. అత్యల్పంగా పటేల్ నగర్, కస్తూర్భా నగర్‌లలో 5 మంది అభ్యర్థుల చొప్పున మాత్రమే పోటీ చేస్తున్నట్లు వివరించారు.

ఈసారి ఎన్నికల్లో ఆమ్ ఆద్మీ పార్టీ, కాంగ్రెస్ అన్ని స్థానాల నుంచి పోటీ చేస్తుండగా.. బీజేపీ మాత్రం 2 స్థానాలను తన మిత్రపక్షాలకు వదిలి 68 స్థానాల్లో అభ్యర్థులను బరిలోకి దింపింది. అలాగే బీఎస్పీ 69 స్థానాల్లో పోటీలోకి దిగగా.. పలువురు ఇండిపెండెంట్ అభ్యర్థులు సైతం స్వతంత్రంగా పోటీ చేస్తున్నట్లు స్పష్టం చేశారు. ఫిబ్రవరి 5వ తేదీన ఢిల్లీ అసెంబ్లీ ఎన్నికలు నిర్వహిస్తుండగా.. ఆ తర్వాత మూడు రోజులకు అంటే 8వ తేదీన ఓట్ల లెక్కింపు చేపట్టబోతున్నారు. ఈక్రమంలోనే అన్ని పార్టీలు పెద్ద ఎత్తున ప్రచారాలు చేస్తున్నాయి. ఉచితాలు ప్రకటిస్తూనే.. ఓటర్లను ఆకట్టుకునేందుకు వరాల జల్లులు కురిపిస్తున్నాయి. చూడాలి మరి ఈ ఎన్నికల్లో ఎవరు విజయం సాధిస్తారనేది.