సీఎం మమతా బెనర్జీ సాక్ష్యాలను తారుమారు చేశారు..: ఆర్జీకార్ బాధితురాలి తండ్రి

దేశవ్యాప్తంగా సంచలనం రేపిన ఆర్జీ కార్ హత్యాచార కేసులో దోషిగా తేలిన సంజయ్ రాయ్‌కు తాజాగా న్యాయస్థానం జీవిత ఖైదు విధించిన విషయం అందరికీ తెలిసిందే. దీనిపై పశ్చిమ బెంగాల్ ముఖ్యమంత్రి మమతా బెనర్జీ.. దోషికి మరణ శిక్ష విధించాలని కోరుతూ.. హైకోర్టును ఆశ్రయించింది. దీనిపై బాధితురాలి తండ్రి స్పందించారు. సీఎం మమతా బెనర్జీ తీరును తీవ్రంగా తప్పుపట్టారు. ఈ వ్యవహారంలో దీదీ ఎలాంటి తొందరపాటు చర్యలు తీసుకోవాల్సిన అవసరం లేదని చెప్పారు. ఆమె ఈ కేసులో సాక్ష్యాలను మాయం చేసిందంటూ ఆరోపించారు. ఆ పూర్తి వివరాలు మీకోసం.

ఆగస్టు 9వ తేదీన నార్త్ కోల్‌కతాలోని ఆర్జీ ప్రభుత్వ ఆస్పత్రిలో విధులు నిర్వహిస్తున్న ఓ ట్రైనీ వైద్యురాలిపై హత్యాచారం జరిగింది. ముఖ్యంగా వైద్యురాలిపై అదీ ఆస్పత్రిలోనే అతికిరాతంగా అత్యాచారం చేసి హతమార్చడంతో కేసు దేశ వ్యాప్తంగా సంచలనం సృష్టించింది. ఈ కేసును దర్యాప్తు చేసిన పోలీసులు సీసీకెమెరాల ఆధారంగా దోషి సంజయ్ రాయ్‌ను అరెస్ట్ చేశారు. ఆ తర్వాత ఈ కేసును సీబీఐకి బదిలీ చేశారు. ఈక్రమంలోనే విచారణ జరిపిన సీబీఐ.. బాధితురాలి మృతదేహంపై అనేక మంది డీఎన్ఏ దొరికినా.. ఛార్జీషీట్‌లో మాత్రం సంజయ్ రాయ్ పేరును మాత్రమే నమోదు చేసింది.

ఈక్రమంలోనే విచారణ జరిపిన న్యాయస్థానం డిసెంబర్ 19వ తేదీ రోజు సంజయ్ రాయ్‌ను దోషిగా తేల్చి.. ఆ తర్వాతి రోజు జీవితఖైదు విధించింది. అయితే ఈ కేసులో దోషికి మరణ శిక్ష పడాలని తామంతా కోరుకున్నామని.. కానీ కోర్టు జీవితఖైదు విధించిందంటూ పశ్చిమ బెంగాల్ సీఎం మమతా బెనర్జీ చెప్పారు. ఈక్రమంలోనే దోషికి మరణ శిక్ష విధించాలంటూ హైకోర్టును ఆశ్రయించారు. అయితే ఈ ఘటనపై తాజాగా బాధితురాలి తండ్రి స్పందించారు. సీఎం మమతా బెనర్జీ తీరును తప్పు పట్టారు. ఆమె ఎలాంటి తొందరపాటు నిర్ణయాలు తీసుకోవాల్సి అవసరం లేదని.. ఏం చేయాలి, ఎలా చేయాలనేదే తామే నిర్ణయించుకుంటామని వెల్లడించారు.

ముఖ్యంగా తీర్పు కాపీ తమ చేతికి వచ్చాకా ఏం చేయాలో నిర్ణయించుకుంటామని స్పష్టం చేశారు. అప్పటి వరకు సీఎం మమతా బెనర్జీ సైలెంటుగా ఉండాలని అన్నారు. గతంలో ఎన్నో మాటలు చెప్పిన ఆమె.. సాక్ష్యాలను తారుమారు చేశారంటూ బాధితురాలి తండ్రి ఆరోపించారు. ఈ సాక్ష్యాధారాలను తారుమారు చేసిన వాళ్లలో పోలీస్ కమిషనర్, ఇతరుల ప్రమేయం కూడా ఉందంటూ వివరించారు. ఇవన్నీ ముఖ్యమంత్రి మమత చూడలేదా అని సూటిగా ప్రశ్నించారు. అలాగే సీబీఐ సరైన సాధ్యాధారాలు సమర్పించకపోవడం వల్లే న్యాయస్థానం దోషికి జీవిత ఖైదు విధించిందని పేర్కొన్నారు.