కుక్కను ఢీకొన్న కారు.. శునకం రివేంజ్ మామూలుగా లేదుగా, తలపట్టుకున్న ఓనర్.

సాధారణంగా కుక్కలు చాలా విశ్వాసంతో ఉంటాయి అని చెబుతారు. ఒకసారి దాని భోజనం పెడితేనే.. మనకు అవి విధేయత చూపుతాయి. అయితే చాలా మంది కుక్కలను పెంచుకునే వారు.. తమకు ఏదైనా ఊహించని ఆపద ఎదురైతే.. తమ శునకాలు రక్షిస్తాయని నమ్ముతారు. అందుకే వాటిని తమ సొంత పిల్లల్లా చూసుకుంటూ ఉంటారు. అంతేకాకుండా వాటికి ఫుడ్ దగ్గరి నుంచి మెడిసిన్ వరకు అన్నీ ఖర్చులు భరిస్తారు. అయితే అలాంటి శునకాలకు కోపం వస్తే మాత్రం ఏం చేస్తాయో వాటికి మాత్రమే తెలుసు. ఎందుకంటే తాజాగా జరిగిన ఓ సంఘటన చూస్తే అలాగే అనిపిస్తుంది. రోడ్డు పక్కన కూర్చున్న కుక్కకు పొరపాటున ఒక కారు తగిలింది. దీంతో ఆ కుక్క.. కారుపై ప్రతీకారం తీర్చుకుంది.

మధ్యప్రదేశ్‌లోని సాగర్ జిల్లాలోని తిరుపతిపురం కాలనీలో ఉండే ప్రహ్లాద్ సింగ్ ఘోషీ అనే వ్యక్తి.. తన కుటుంబంతో జనవరి 17వ తేదీన మధ్యాహ్నం 2 గంటలకు కారులో ఒక పెళ్లికి బయల్దేరాడు. ఈ క్రమంలోనే వారు బయల్దేరిన తర్వాత వారి ఇంటి నుంచి 500 మీటర్ల దూరంలో ఒక ఘటన చోటు చేసుకుంది. అక్కడ రోడ్డు పక్కన ఓ కుక్క కూర్చొని ఉంది. ప్రహ్లాద్ సింగ్ ఘోషీ కారు నడుపుతూ.. పొరపాటున చూసుకోకుండా ఆ కుక్కను ఢీకొంటూ కారును పోనిచ్చాడు. దీంతో ఆ కుక్క ఒక్కసారిగా ఉలిక్కిపడి లేచి పక్కకు వెళ్లింది. దీంతో ఆ కుక్క ప్రాణాపాయం నుంచి తప్పించుకుంది.

అయితే ఆ కుక్క ఈ ఘటనను అంతటితో మరిచిపోలేదు. అరుస్తూ.. ఆ కారును కొద్ది దూరం వరకు వెంబడించింది. కానీ కారు వేగంగా వెళ్లిపోవడంతో ఆగిపోయింది. అనంతరం ప్రహ్లాద్ సింగ్ ఘోషి.. పెళ్లి ముగించుకుని రాత్రి ఒంటి గంటకు తిరిగివచ్చారు. రాత్రి అపార్ట్‌మెంట్‌లో పార్క్ చేసి.. ఇంట్లోకి వెళ్లారు. ఆ తర్వాత ఆ కుక్క అక్కడికి చేరుకుంది. ఆ కారును గుర్తించి.. దానిపై మొత్తం గీతలు గీసింది. దాని ముందు కాళ్లను కారు బానెట్‌పై పెట్టి.. గీతలు పడేలా చేసింది. అనంతరం పక్కకు వచ్చి.. ఆ కారును పరిశీలించింది.

ఉదయం లేచి చూసిన ప్రహ్లాద్ సింగ్ ఘోషి.. కారు మొత్తం గీతలు పడి ఉండటం చూసి షాక్ అయ్యాడు. వెంటనే సీసీటీవీ ఫుటేజీని పరిశీలించగా.. అసలు విషయం వెలుగులోకి వచ్చింది. రాత్రి కారు పార్క్ చేసిన తర్వాత.. కుక్క వచ్చి కారుకు మొత్తం గీతలు గీసినట్లు గుర్తించాడు. మొదట ఆ కుక్క అలా ఎందుకు చేశాడో అర్థం కాలేదు. తర్వాత ఆలోచించగా.. అంతకుముందు రోజు మధ్యాహ్నం పెళ్లికి వెళ్తూ కారు కుక్కను ఢీకొట్టిన విషయం గుర్తు చేసుకున్నాడు. ఈ నేపథ్యంలోనే ఆ కుక్క తన కారుపై పగ తీర్చుకుందని భావించాడు. దీనికి సంబంధించిన వీడియో ప్రస్తుతం సోషల్ మీడియాలో తెగ వైరల్ అవుతోంది.