మహాకుంభమేళాలో గౌతమ్ అదానీ.. స్వహస్తాలతో వంటలు చేసి మరీ భక్తులకు వడ్డిస్తూ

ఉత్తర ప్రదేశ్‌లోని ప్రయాగ్‌రాజ్‌లో జరుగుతున్న మాహా కుంభమేళా గురించి దేశ వ్యాప్తంగా ఉన్న ప్రజలకు ప్రత్యేకంగా చెప్పాల్సిన అవసరం లేదు. ఈ అద్భుతమైన ఆథ్యాత్మిక కార్యక్రమానికి కోట్లాది మంది భక్తులు హాజరు అవుతున్నారు. ముఖ్యంగా ప్రతీ రోజూ కోటి మందికి పైగా భక్తులు అక్కడకు వెళ్తూ.. త్రివేణీ సంగమం వద్ద పుణ్య స్నానాలు ఆచరిస్తున్నారు. దేశంలోని ప్రముఖులే కాకుండా విదేశాలకు చెందిన సెలబ్రిటీలు సైతం మహాకుంభమేళాలో పాల్గొంటున్నారు. అయితే తాజాగా ఇక్కడకు అదానీ గ్రూప్ ఆఫ్ కంపెనీస్ ఛైర్మన్ గౌతమ్ అదానీ వచ్చారు. ఆయన వెంట భార్య ప్రీతి అదానీ కూడా ఉన్నారు. ఆ పూర్తి వివరాలు మీకోసం.

ప్రయాగ్‌రాజ్‌లో జరుగుతున్న మహా కుంభమేళాకు అదానీ గ్రూప్ ఆఫ్ కంపెనీస్ ఛైర్మన్ గౌతమ్ అదానీ మంగళవారం రోజు వచ్చారు. ముఖ్యంగా ఆయన భార్య ప్రీతి అదానీతో కలిసి కుంభమేళాకు వచ్చిన ఆయన ప్రత్యేక పూజలు నిర్వహించారు. అనంతరం సతీమణితో కలిసే అనేక సేవా కార్యక్రమాల్లో పాల్గొన్నారు. ముఖ్యంగా కుంభమేళాలోని ఇస్కాన్ టెంపుల్ వాళ్లు ఏర్పాటు చేసిన ప్రసాద వితరణ కేంద్రానికి వెళ్లారు. అక్కడే సిబ్బందితో కలిసి ప్రసాదాన్ని తయారు చేశారు. ముఖ్యంగా గౌతమ్ అదానీ తన స్వహస్తాలతో ప్రసాదం తయారు చేసి.. ఆపై భక్తులకు తన చేతులతో వడ్డించారు.

ముఖ్యంగా వందలాది మంది అక్కడ భోజనం చేసేందుకు రాగా.. అక్కడే చాలా సేపు నిలబడి మరీ గౌతమ్ అదానీ, ఆయన భార్య ప్రతీ అదానీలు భక్తులకు భోజనాలు పెట్టారు. ఈ సందర్భంగానే మాట్లాడుతూ.. గౌతమ్ అదానీ అనేక విషయాలు వెల్లడించారు. ఇస్కాన్ టెంపుల్ నిర్వాహకులతో పాటు అదానీ గ్రూపు కూడా ఈ అన్నదాన కార్యక్రమాల్లో పాలు పంచుకుంటుందని చెప్పారు. ముఖ్యంగా జనవరి 13వ తేదీ నుంచి మహా కుంభమేళా పూర్తయ్యే వరకూ అంటే ఫిబ్రవరి 26వ తేదీ వరకు తమ క్యాంపులో ప్రసాద వితరణ జరుగుతుందని వివరించారు.

ప్రస్తుతం గౌతమ్ అదానీ, ఆయన భార్య ప్రతీ అదానీకి సంబంధించిన ఈ వీడియోలు నెట్టింట వైరల్‌గా మారాయి. భక్తులకు ఉచితంగా భోజనాలు అందిస్తూ మంచి పని చేస్తున్నారంటూ చాలా మంది నెటిజెన్లు కామెంట్లు చేస్తున్నారు. మీరు చేసే సేవలకు ఆ దేవుడు మీకు ఎప్పుడూ మంచే చేస్తారంటూ వివరిస్తున్నారు. ఇదంతా ఇలా ఉండగా.. ఇప్పటి వరకు మహా కుంభమేళాకు మొత్తం 8.81 కోట్ల మంది భక్తులు హాజరు అయినట్లు సమాచారం. మొదటి 8 రోజుల్లోనే ఇంత మంది వచ్చారంటే కుంభమేళా పూర్తయ్యేసరికి 40 కోట్లకు పైగా భక్తులు వచ్చే అవకాశం ఉందని తెలుస్తోంది.