తిరుపతి తొక్కిసలాట ఘటన.. ప్రభుత్వం కీలక నిర్ణయం.. ఆరు నెలలు డెడ్‍లైన్..

తిరుపతి తొక్కిసలాట ఘటనపై ఏపీ ప్రభుత్వం న్యాయ విచారణకు ఆదేశించింది. హైకోర్టు రిటైర్డ్ జడ్జి జస్టిస్ సత్యనారాయణ మూర్తిని ఇందుకు నియమించింది. జస్టిస్ సత్యనారాయణ మూర్తి నేతృత్వంలో జ్యుడిషియల్ విచారణకు ఆదేశిస్తూ ఆంధ్రప్రదేశ్ ప్రభుత్వం ఈ మేరకు ఉత్తర్వులు జారీ చేసింది. ఆరు నెలల్లో ఈ ఘటనపై విచారణ జరిపి నివేదిక సమర్పించాలని ఉత్తర్వుల్లో పేర్కొంది. మరోవైపు తిరుపతి తొక్కిసలాట ఘటన రెండు తెలుగు రాష్ట్రాలలో చర్చనీయాంశమైన సంగతి తెలిసిందే. వైకుంఠ ద్వార దర్శనం టోకెన్ల కోసం వచ్చిన భక్తులు తొక్కిసలాటలో ప్రాణాలు కోల్పోయారు. ఈ ఘటనతో టీటీడీపై విమర్శలు సైతం వ్యక్తమయ్యాయి.

వైకుంఠ ఏకాదశిని పురస్కరించుకుని టీటీడీ ఏటా తిరుమల శ్రీవారి ఆలయంలో వైకుంఠ ద్వార దర్శనాలు కల్పిస్తూ వస్తోంది. ఈ క్రమంలోనే ఈ సారి కూడా జనవరి 10 నుంచి 19 వరకూ ద్వార దర్శనాలు కల్పించింది. వైకుంఠ ద్వార దర్శనాల కోసం తిరుపతి, తిరుమలలో శ్రీవారి భక్తులకు ఎస్ఎస్‌డీ టోకెన్లు అందించారు. తిరుపతిలో 8 చోట్ల, తిరుమలలో ఒకచోట ఇందుకు కౌంటర్లు ఏర్పాటు చేశారు. మొత్తం 9 కేంద్రాలలోని 94 కౌంటర్ల ద్వారా వైకుంఠ ద్వార దర్శన టోకెన్లు పంపిణీ చేశారు. అయితే తొలిరోజే వైకుంఠ ద్వార దర్శనం చేసుకోవాలనే ఉద్దేశంతో జనవరి 8వ తేదీన టోకెన్ల కోసం భక్తులు భారీగా తరలివచ్చారు. తిరుపతిలోని కేంద్రాల వద్దకు భారీగా చేరుకున్నారు. ఈ క్రమంలోనే బైరాగిపట్టెడ కేంద్రం వద్ద తొక్కిసలాట జరిగింది.

తిరుపతి తొక్కిసలాట ఘటనలో ఆరుగురు భక్తులు చనిపోయారు. మరికొందరికి గాయాలయ్యాయి. దీంతో ప్రభుత్వం సీరియస్ అయ్యింది. అధికారులపై చర్యలు కూడా తీసుకుంది. ఆంధ్రప్రదేశ్ ముఖ్యమంత్రి నారా చంద్రబాబు నాయుడు, డిప్యూటీ సీఎం పవన్‌ కల్యాణ్‌ ఈ ఘటనను తీవ్రంగా పరిగణించారు. తొక్కిసలాట ఘటన జరిగిన ప్రాంతాలను సీఎం, డిప్యూటీ సీఎం వేర్వేరుగా పరిశీలించారు. తిరుపతి తొక్కిసలాట ఘటన జరిగిన తీరుపై అధికారులను అడిగి వివరాలు తెలుసుకున్న సీఎం నారా చంద్రబాబు నాయుడు.. న్యాయ విచారణకు ఆదేశిస్తామని అప్పట్లోనే ప్రకటించారు.

ఈ క్రమంలోనే తిరుపతి తొక్కిసలాటపై జ్యుడిషియల్‌ విచారణకు ఆదేశిస్తూ తాజాగా ఆంధ్రప్రదేశ్ ప్రభుత్వం ఉత్తర్వులు జారీ చేసింది. హైకోర్టు విశ్రాంత న్యాయమూర్తి జస్టిస్‌ సత్యనారాయణమూర్తి నేతృత్వంలో న్యాయవిచారణ జరగనుంది. ఈ నేపథ్యంలో తొక్కిసలాటపై పూర్తి వివరాలు పరిశీలించనున్న జస్టిస్ సత్యనారాయణ మూర్తి.. ప్రభుత్వానికి నివేదిక సమర్పిస్తారు. అనంతరం ఈ నివేదిక ఆధారంగా ప్రభుత్వం చర్యలు తీసుకునే అవకాశం ఉంది.