హెచ్‌డీఎఫ్‌సీ కస్టమర్లకు అలర్ట్.. జనవరి 24, 25 తేదీల్లో ఈ సేవలు బంద్.. మొత్తం 16 గంటల పాటు

బ్యాంకులు కస్టమర్లకు ఎన్నో రకాల సేవలు అందిస్తుంటాయి. అకౌంట్లు ఓపెన్ చేయడం, డబ్బులు డిపాజిట్ చేయడం, విత్‌డ్రా చేసుకోవడం, చెక్ బుక్స్, ఫిక్స్‌డ్ డిపాజిట్లు, ప్రభుత్వ పథకాల్లో చేరేందుకు ఖాతాలు తెరవడం, రికరింగ్ డిపాజిట్లు, లోన్లు ఇలా చాలానే సేవలు అందిస్తుంటాయి. టెక్నాలజీ పెరిగిపోతున్న కొద్దీ.. డిజిటల్ హవా పెరిగిపోతున్న కొద్దీ.. అంతా ఆన్‌లైన్‌కు మారిపోయింది. ఇప్పుడు చాలా బ్యాంకులు కస్టమర్ల కోసం డిజిటల్ సేవల్ని తీసుకొస్తున్నాయి. ఇందులో భాగంగానే.. నెట్ బ్యాంకింగ్, మొబైల్ బ్యాంకింగ్, వాట్సాప్ బ్యాంకింగ్, టోల్ ఫ్రీ బ్యాంకింగ్.. ఇలా కొత్త కొత్త సేవల్ని లాంఛ్ చేస్తున్నాయి. పెద్ద పెద్ద బ్యాంకులకు వీటి నుంచి ఎక్కువగా కస్టమర్లు సేవల్ని వినియోగించుకుంటుంటారు. అయితే ఇప్పుడు ఇలాంటి డిజిటల్ సేవలకు సంబంధించి.. దేశంలోనే అతిపెద్ద ప్రైవేట్ బ్యాంక్.. హెచ్‌డీఎఫ్‌సీ కీలక ప్రకటన చేసింది.

బ్యాంకులు తరచుగా.. సిస్టమ్ మెయింటెనెన్స్ చెక్ చేసుకుంటూ ఉంటాయి. ఏమైనా సాఫ్ట్‌వేర్ అప్‌డేట్స్ సహా ఇతర లక్ష్యాల కోసం.. మెరుగైన సాంకేతికత కోసం కొన్ని సార్లు ఇలా తప్పనిసరిగా చేయాల్సి వస్తుంది. ఇప్పుడు కూడా కస్టమర్లకు దీనికి సంబంధించి హెచ్‌డీఎఫ్‌సీ బ్యాంక్ ఒక అలర్ట్ జారీ చేసింది. ఈ మెయింటెనెన్స్ పీరియడ్ సందర్భంగా.. వాట్సాప్ చాట్ బ్యాంకింగ్ సహా ఎస్ఎంఎస్ బ్యాంకింగ్, టోల్ ఫ్రీ బ్యాంకింగ్, ఐవీఆర్ ఫోన్ బ్యాంకింగ్ వంటి సేవలు వినియోగించుకోలేరని స్పష్టం చేసింది.

నిర్ణయించిన తేదీల్లో నిర్దిష్ట సమయాల్లో ఈ సమస్య ఉంటుందని పేర్కొంది. అయితే ఈ మెయింటెనెన్స్ పీరియడ్ ఉన్నప్పటికీ ఈ సమయంలో ఫోన్ బ్యాంకింగ్ ఏజెంట్ సర్వీసెస్ అందుబాటులో ఉంటాయని తెలిపింది. దాదాపు 16 గంటల పాటు ఈ సేవలకు అంతరాయం ఉండొచ్చని వెల్లడించింది. ఇది 2025, జనవరి 24న రాత్రి 10 గంటల నుంచి మళ్లీ జనవరి 25, మధ్యాహ్నం 2 గంటల వరకు షెడ్యూల్ ఉంటుందని తెలిపింది.

అందుకే ఆ నిర్దిష్ట సమయంలో సేవల్లో ఇబ్బందులు ఎదుర్కోవాల్సి వస్తుందని.. అందుకే ఏమైనా ఉంటే ముందుగానే చేసుకోవడం ఉత్తమం అని వెల్లడించింది. తన కస్టమర్లకు పూర్తి బ్యాంకింగ్ ఎక్స్‌పీరియన్స్ ఎలా ఉంది.. మరింత ఎలా మెరుగుపర్చాలనే దానిపై అధ్యయనం కోసం మెయింటెనెన్స్ పీరియడ్ నిర్వహిస్తున్నట్లు వివరించింది హెచ్‌డీఎఫ్‌సీ బ్యాంకు. ఈ సమయంలోనే హెచ్‌డీఎఫ్‌సీ నెట్ బ్యాంకింగ్ సేవలు కూడా పనిచేస్తాయని పేర్కొంది. ప్రత్యేకంగా యూపీఐ, ఐఎంపీఎస్, నెఫ్ట్‌పై ప్రభావం పడుతుందని చెప్పకపోయినప్పటికీ.. ఇక్కడ నెట్ బ్యాంకింగ్, మొబైల్ బ్యాంకింగ్ మాత్రం ఇబ్బందుల్లేకుండా వినియోగించుకోవచ్చని వివరించింది.