అధిక వడ్డీ.. రూ. 5 లక్షలు జమ చేస్తే ఎంతొస్తుందంటే?

దేశంలోనే ప్రభుత్వ రంగానికి చెందిన అతిపెద్ద బ్యాంకు.. స్టేట్ బ్యాంక్ ఆఫ్ ఇండియా (SBI) కొత్త సంవత్సరంలో రెండు కొత్త స్కీమ్స్ తీసుకొచ్చిన సంగతి తెలిసిందే. ఇందులో ఒకటి సరికొత్త ఫిక్స్‌డ్ డిపాజిట్ పథకం ఎస్బీఐ ప్యాట్రన్స్. ఇది కేవలం సూపర్ సీనియర్ సిటిజెన్లను ఉద్దేశించి లాంఛ్ చేసిన పథకమే. ఈ ఎస్బీఐ ప్యాట్రన్స్ స్కీమ్ కింద.. ఫిక్స్‌డ్ డిపాజిట్ ఇన్వెస్ట్‌మెంట్లపై సీనియర్ సిటిజెన్లకు వచ్చే దాని కంటే అధిక వడ్డీ వస్తుందని చెప్పొచ్చు. 80 ఏళ్లు, ఆపైబడిన భారత నివాసితులు ఎవరైనా ఈ పథకంలో చేరొచ్చు. ఈ పథకం కింద కనీసం రూ. 1000 నుంచి జమ చేసేందుకు వీలుంటుంది. గరిష్టంగా రూ. 3 కోట్ల వరకు డిపాజిట్ చేయాల్సి ఉంటుంది.

ఈ పథకంలో సింగిల్‌గా లేదా జాయింట్‌గా అకౌంట్ తెరవొచ్చు. జాయింట్ అకౌంట్ కింద అయితే ప్రైమరీ అకౌంట్ హోల్డర్ కచ్చితంగా 80 ఏళ్లు లేదా ఆపైబడి ఉండాలి. ప్రీమెచ్యూర్ విత్‌డ్రాయల్‌కు (ముందస్తు నగదు ఉపసంహరణ) అవకాశం ఉంటుంది. ఇక్కడ వడ్డీ రేట్లలో కాస్త కోత పడుతుందని చెప్పొచ్చు. ఇక్కడ ఫిక్స్‌డ్ డిపాజిట్ల మాదిరిగానే టెన్యూర్స్ ఉంటాయి.

ఇక్కడ సూపర్ సీనియర్ సిటిజెన్లు ఎస్బీఐ ప్యాట్రన్స్ స్కీమ్ గురించి ప్రత్యేకంగా దరఖాస్తు చేసుకోవాల్సిన పని లేదు. ఫిక్స్‌డ్ డిపాజిట్లు సాధారణంగా చేసే సమయంలోనే 80 ఏళ్లు, ఆపైబడి ఉంటే.. ఈ స్కీమ్ కింద అత్యధిక వడ్డీ రేట్లే వర్తిస్తాయి. వారి పుట్టిన తేదీని బట్టి ఇది ఆటోమేటిక్‌గా తీసుకుంటుందని చెప్పొచ్చు.

ప్రస్తుతం సీనియర్ సిటిజెన్లకు ఎస్బీఐలో ఉన్న వడ్డీ రేట్లపై అదనంగా 10 బేసిస్ పాయింట్ల మేర వడ్డీ అందుతుంది. 10 బేసిస్ పాయింట్లు అంటే 0.10 శాతం. 100 బేసిస్ పాయింట్లను ఒక శాతంగా పరిగణిస్తారు. సూపర్ సీనియర్ సిటిజెన్లకు దీని ప్రకారం ఇప్పుడు 4.10 శాతం నుంచి 7.60 శాతం వరకు వడ్డీ రేట్లు ఉన్నాయి. ఏడాది డిపాజిట్‌పై 7.40 శాతం, రెండేళ్ల డిపాజిట్‌పై అత్యధికంగా వీరికి 7.60 శాతం వడ్డీ రేట్లు ఉన్నాయి.

ఈ క్రమంలో ఈ పథకంలో 5 లక్షలు జమ చేసినట్లయితే ఏడాదికి 7.40 శాతం వడ్డీ రేటు కింద రూ. 34,361; ఇదే రెండేళ్లకు అయితే 7.60 శాతం వడ్డీ రేటు చొప్పున 5 లక్షలు జమ చేసినట్లయితే చేతికి రూ. 73,286 వడ్డీ వస్తుంది. మరోవైపు ఎస్బీఐ వీ కేర్ డిపాజిట్ స్కీమ్ కింద 5 నుంచి పదేళ్ల వ్యవధి డిపాజిట్లపై 7.50 శాతం వడ్డీ రేటు ఆఫర్ చేస్తోంది. అయితే ఎస్బీఐ అమృత్ వృష్టి స్పెషల్ స్కీమ్ కింద 444 రోజుల డిపాజిట్‌పై సీనియర్ సిటిజెన్లకు ఏకంగా 7.75 శాతం వడ్డీ రేటు ఆఫర్ చేస్తోంది. 400 రోజుల అమృత్ కలశ్ డిపాజిట్‌పై 7.60 శాతం వడ్డీ అందిస్తోంది.