రానికి 60 గంటలపైన పనితో.. ఆరోగ్య సమస్యలు

ప్రస్తుతం దేశవ్యాప్తంగా ఉద్యోగుల పని గంటల విషయంపై పెద్ద ఎత్తున చర్చ కొనసాగుతోంది. ఇంట్లో కూర్చోకుండా ఆదివారాలూ ఆఫీసులకు వచ్చి పని చేయాలంటూ పలువురు దిగ్గజ సంస్థల అధినేతలు మాట్లాడుతున్నారు. ఇలాంటి సమయంలో జనవరి 31వ తేదీన పార్లమెంటులో ప్రవేశపెట్టిన ఆర్థిక సర్వే 2025 కీలక వివరాలు వెల్లడించింది. వారానికి 60 అంత కంటే ఎక్కువ పని గంటలు ఉంటే ఆరోగ్య సమస్యలు తలెత్తే అవకాశాలు ఎక్కువగా ఉంటాయని ఆందోళన వ్యక్తం చేసింది. ఆఫీసులో రోజుకు 12 గంటలు ఆపైన ఎక్కువ టైం గడుపుతున్న ఉద్యోగుల్లో మానసిక సమస్యలు ఏర్పడే అవకాశం ఉందని ఆర్థిక సర్వే తెలిపింది.

సాధారణంగా ఉత్పాదకతకు పని గంటలనే కొలమానంగా పరిగణిస్తారు. అంటే ఎంత ఎక్కువ టైం పని చేస్తే అంత ఉత్పాదకత ఉంటుందని భావిస్తారు. అయితే, ప్రపంచ ఆరోగ్య సంస్థ డబ్ల్యూహెచ్ఓ ఐఎల్ఓ సంస్థల నివేదికల ప్రకారం వారానికి 55 నుంచి 60 గంటలు పని దాటితే సదరు ఉద్యోగి ఆరోగ్యంపై ప్రతి కూల ప్రభావం పడుతుందని తేలింది. మానసికంగా కుంగిపోయే ప్రమాదం ఉందని పేర్కొన్నాయి. ఇదే విషయాన్ని 2024-25 ఆర్థిక సర్వే సైతం స్పష్టం చేసింది. మానవుడి మెదడు, మనసుపై సపియన్ ల్యాబ్స్ నిర్వహించిన పరిశోధనను ఉటంకించింది. ఎవరైతే ఆఫీసుల్లో 12 గంటలు అంత కంటే ఎక్కువ పని చేస్తారో వారి మానసిక పరిస్థితి, సాధారణ టైం పని చేసే వారి కన్నా 100 పాయింట్లు తక్కువగా ఉంటుందని పేర్కొంది.

మరోవైపు.. కార్యాలయ వాతావరణ, సహోద్యోగులతో సత్సంబంధాలు కూడా ఉత్పాదకతను సానుకూలంగా ప్రభావితం చేస్తాయని ఆర్థిక సర్వే తెలిపింది. నెలకు కనీసం 2, 3 రోజులు కుటుంబ సభ్యులు, బంధువులతో గడపాల్సిన అవసరం ఉందని, అలా చేయడం వల్ల ఉద్యోగుల్లో ఒత్తిడి, మానసిక సమస్యలు తొలిగిపోతాయని, దీంతో మెరుగైన జీవనశైలి సాధ్యపడుతుందని ఆర్థిక సర్వే పేర్కొంది. డబ్ల్యూహెచ్ఓ వివరాల ప్రకారం ప్రపంచ వ్యాప్తంగా ఉద్యోగులపై ఒత్తిడి, ఆందోళన కారణంగా భారీ నష్టం వాటిల్లే ప్రమాదాన్ని ఆర్థిక సర్వే ఎత్తి చూపింది.

కొద్ది రోజుల క్రితమే ఉద్యోగులు వారానికి 90 గంటలు పని చేయాలని ఎల్ అండ్ టీ ఛైర్మన్ ఎన్ సుబ్రహ్మణ్యన్ వ్యాఖ్యలు చేశారు. అది పెద్ద ఎత్తున చర్చకు దారి తీసింది. పలువురు ఉద్యోగులు, పారిశ్రామికవేత్తలు, సనీ నటుల తీవ్ర అభ్యంతరం వ్యక్తం చేశారు. అంతకు ముందు ఇన్ఫోసిస్ సహ వ్యవస్థాపకులు ఎన్ఆర్ నారాయణ మూర్తి సైతం ఇలాంటి వ్యాఖ్యలే చేశారు. ఉద్యోగులు వారానికి 70 గంటలు పని చేయాలని, అప్పుడే ప్రపంచంతో పోటీ పడుతూ దేశం ముందుకు వెళ్తుందని పలు వేదికలుగా మాట్లాడారు. ప్రముఖులో ఇలాంటి వ్యాఖ్యలు చేయడంతో భిన్నాభిప్రాయాలు వ్యక్తమవుతున్నాయి. ఇప్పుడు ఆర్థిక సర్వే కుండబద్దలు కొట్టింది. 60 గంటలు దాటి పని చేస్తే ఆరోగ్య సమస్యలు ఉంటాయని తెలిపింది.