మణిపూర్ ముఖ్యమంత్రి బీరెన్ సింగ్ రాజీనామా.. గవర్నర్ చేతికి లేఖ

మణిపూర్ రాజకీయాల్లో ఆసక్తికర పరిణామం చోటుచేసుకుంది. మణిపూర్ ముఖ్యమంత్రి బీరెన్ సింగ్ రాజీనామా చేశారు. ముఖ్యమంత్రి పదవికి రాజీనామా చేసిన బీరెన్ సింగ్.. రాజ్‌భవన్‌లో గవర్నర్ అజయ్ కుమార్ భల్లాను కలిసి తన రాజీనామా లేఖను అందజేశారు. జాతుల మధ్య వైరంతో గత కొన్ని నెలలుగా మణిపూర్‌లో అల్లర్లు జరుగుతున్న సంగతి తెలిసిందే. అయితే అల్లర్లను అరికట్టడంలో బీరెన్ సింగ్ విఫలమయ్యారంటూ ఆయనపై విమర్శలు వెల్లువెత్తాయి. మణిపూర్‌లో జరుగుతున్న హింసాకాండ దేశవ్యాప్తంగా చర్చనీయాంశమైంది. అయినప్పటికీ బీజేపీ అధిష్టానం ఆయనపై ఎలాంటి చర్యలు తీసుకోలేదు.

కానీ మణిపూర్‌లో తాజా రాజకీయ పరిస్థితులు, గత కొన్ని రోజులుగా పార్టీలో అంతర్గతంగా జరుగుతున్న చర్చల నేపథ్యంలో బీరెన్ సింగ్ ముఖ్యమంత్రి పదవికి రాజీనామా చేశారు. ఆదివారం ఉదయం ఢిల్లీలో.. కేంద్ర హోం మంత్రి అమిత్‌ షాతో బీరెన్ సింగ్ భేటీ అయ్యారు. అనంతరం బీజేపీ ఎంపీ సంబిత్ పాత్రా, రాష్ట్ర మంత్రులు, ఎమ్మెల్యేలతో కలిసి మణిపూర్ గవర్నర్ అజయ్ కుమార్ భల్లాను కలిశారు. తన రాజీనామా లేఖను గవర్నర్ చేతికి అందజేశారు.

తన రాజీనామా లేఖలో బీరెన్ సింగ్ కేంద్ర ప్రభుత్వానికి ధన్యవాదాలు తెలియజేశారు. మణిపూర్‌లోని ప్రతి పౌరుడి ప్రయోజనాలను కాపాడటం కోసం సకాలంలో చర్యలు తీసుకోవటంతో పాటుగా అవసరమైన సమయంలో జోక్యం చేసుకుంటూ.. అభివృద్ధి పనులు, వివిధ ప్రాజెక్టులు అమలు చేసినందుకు రాజీనామా లేఖలో కేంద్ర ప్రభుత్వానికి బీరెన్ సింగ్ కృతజ్ఞతలు తెలిపారు. కేంద్ర ప్రభుత్వం, మణిపూర్ ప్రభుత్వానికి ఎల్లప్పడూ ఇలాగే తన మద్దతును కొనసాగించాలని ఆయన కోరారు. అలాగే పలు ప్రాధాన్య అంశాలను ప్రస్తావించారు.

మణిపూర్ నాగరికత, చరిత్ర గొప్పది, విభిన్నమైనదన్న బీరెన్ సింగ్ .. మణిపూర్ ప్రాదేశిక సమగ్రతను కాపాడుకోవాలని సూచించారు. సరిహద్దు చొరబాట్లను అరికట్టడం సహా అక్రమ వలసదారులను పంపించే విధానాన్ని రూపొందించాలని సూచించారు. డ్రగ్స్, మాదకద్రవ్యాలు సహా నార్కో టెర్రరిజంపై పోరాటాన్ని కొనసాగించాలని రాజీనామా లేఖలో కోరారు. బయోమెట్రిక్ పర్యవేక్షణతో రివైజ్డ్ ఫ్రీ మూవ్‌మెంట్ రిజైమ్‌ని కఠినంగా అమలు చేయాలని కోరారు. సరిహద్దు ప్రాంతాల్లో మౌలిక సదుపాయాల ప్రాజెక్టులను సకాలంలో పూర్తి చేయాలని కోరారు. మరోవైపు మణిపూర్ సీఎం బీరెన్ సింగ్ రాజీనామాపై గవర్నర్ అజయ్ కుమార్ భల్లా త్వరలోనే నిర్ణయం తీసుకోనున్నారు.