చింతమనేనిపై చంద్రబాబు సీరియస్

దెందులూరు ఎమ్మెల్యే చింతమనేని ప్రభాకర్‌పై సీఎం చంద్రబాబు అసహనం వ్యక్తం చేసినట్టు తెలుస్తోంది. దెందులూరులోని ఓ వివాహ కార్యక్రమానికి చింతమనేని ప్రభాకర్‌ ఇటీవల హాజరయ్యారు. అయితే అదే పెళ్లికి వైసీపీ మాజీ ఎమ్మెల్యే అబ్బయ్య చౌదరి కూడా రాగా.. అబ్యయ్య చౌదరి కారు డ్రైవర్‌పై చింతమనేని ప్రభాకర్ బూతులతో విరుచుకుపడిన వీడియో వైరల్ అయిన సంగతి తెలిసిందే. తన కారు బయటికి వెళ్లకుండా అబ్బయ్య చౌదరి కారును ఆయన డ్రైవర్ అడ్డుగా ఉంచడంతో పాటు.. కారు అడ్డం తీయమని తన కారు డ్రైవర్ అడిగితే అతడు దుర్భాషలాడాడని చింతమనేని ప్రభాకర్ ఆరోపిస్తున్నారు. అందుకే, తాను అబ్బయ్య చౌదరి కారు డ్రైవర్‌పై కోపంతో మాటతూలానని చెబుతున్నారు. అయితే, చింతమనేని ప్రభాకర్ బూతులు తిట్టడం వివాదాస్పదమైంది. దీనిపై మాజీ మంత్రి అంబటి రాంబాబు సైతం స్పందించారు. చింతమనేని ప్రభాకర్ దుర్భాషలాడడమే కాకుండా తిరిగి అబ్బయ్య చౌదరిపై కేసు పెట్టడం విడ్డూరంగా ఉందంటూ వ్యాఖ్యానించారు. కూటమి నేతలకు పోలీసులు సహకరిస్తున్నారని ఆరోపించారు. ఈ నేపథ్యంలో చింతమనేని ప్రభాకర్‌కు సీఎం చంద్రబాబు నుంచి పిలుపు వచ్చింది. ఈ వివాదం గురించి చంద్రబాబుకు వివరించేందుకు ప్రభాకర్‌ శుక్రవారం మంగళగిరిలోని టీడీపీ కేంద్ర కార్యాలయానికి వెళ్లారు. ఉద్దేశపూర్వకంగా, ఘర్షణకు పురిగొల్పేలా వైసీపీ నేతలు ప్రవర్తించారని చంద్రబాబుకు చింతమేని ప్రభాకర్ వివరించారట. అయితే, చింతమనేని దుర్భాషలాడిన వీడియో సోషల్ మీడియాలో వైరల్ కావడం గురించి చంద్రబాబు ఒకింత అసహనం వ్యక్తం చేశారని సమాచారం. ‘‘మనం అధికారంలో ఉన్నామని గుర్తుంచుకోండి. సహనంతో వ్యవహరించండి. మీరు ఇలా మాట్లాడితే ఎలా’’ అని చింతమనేనికి చంద్రబాబు అక్షింతలు వేసినట్టు తెలుస్తోంది. భవిష్యత్తులో ఇలాంటివి జరగకుండా చూసుకోవాలని చంద్రబాబు హెచ్చరించినట్లు సమాచారం.