పీఎం సూర్యఘర్‌ వివరాలివే

‘ప్రధానమంత్రి సూర్యఘర్‌’ పథకాన్ని కేంద్ర ప్రభుత్వం గత ఏడాది ఫిబ్రవరిలో ప్రారంంభించింది. ఈ పథకం కింద ఇళ్లపైన సోలార్‌ ప్యానల్స్‌ ఏర్పాటు చేసుకుని విద్యుత్‌ ఉత్పత్తి చేసుకోవచ్చు. సౌరవిద్యుత్‌ ప్యానళ్లు, ఇతర సామాగ్రికి అయ్యే వ్యయంలో కొంతమొత్తాన్ని కేంద్ర ప్రభుత్వం రాయితీగా ఇస్తున్నది. మిగిలిన సొమ్మును బ్యాంకు నుంచి రుణంగా తీసుకునే వెసులుబాటు కూడా వుంది. రూఫ్‌ టాప్‌ సోలార్‌ పవర్‌ ప్లాంట్లను మూడు కేటగిరీలుగా ప్రభుత్వం విభజించింది. నెలకు 120 యూనిట్లు ఉపయోగించేవారికి ఒక కిలోవాట్‌ సోలార్‌ పవర్‌ప్లాంటు ఏర్పాటు చేసేందుకు అనుమతిస్తారు. ఈ యూనిట్‌కు రూ.60 వేలు ఖర్చవుతుంది. అందులో రూ.30 వేలు రాయితీ వస్తుంది. నెలకు 240 యూనిట్లు వినియోగించేవారు రెండు కిలోవాట్ల సోలార్‌ పవర్‌ ప్లాంటు పెట్టుకోవచ్చు. దీనికి రూ.1.2 లక్షలు ఖర్చవుతుంది. అందులో రూ.60 వేలు రాయితీగా లభిస్తుంది. కాగా నెలకు 360 యూనిట్లు ఉపయోగిస్తే మూడు కిలోవాట్ల పవర్‌ ప్లాంటు పెట్టుకోవచ్చు. దీనికి రూ.1.8 లక్షలు పెట్టుబడి అవసరం. రాయితీ రూ.78 వేలు వస్తుంది. పది శాతం సొమ్మును లబ్ధిదారుడు భరిస్తే ప్రభుత్వం ఇచ్చేరాయితీ సొమ్ము పోను మిగిలింది బ్యాంకులు రుణంగా ఇస్తాయి. ఉదాహరణకు మూడు కిలోవాట్ల సోలార్‌ రూఫ్‌ టాప్‌ యూనిట్‌ ధర రూ.1.95 లక్షలు. లబ్ధిదారుడు తొలుత 10 శాతం... రూ.20,000 బ్యాంకులో జమ చేస్తే మిగిలిన రూ.1.75 లక్షలు బ్యాంకు రుణం మంజూరు చేస్తుంది. యూనిట్‌ ఏర్పాటు చేసిన రెండు నెలల తర్వాత కేంద్ర ప్రభుత్వం రాయితీ సొమ్ము రూ.78 వేలు లబ్ధిదారుని ఖాతాలో జమ చేస్తుంది. ఈ సొమ్మును బ్యాంకు రుణానికి జమచేస్తే అసలు, వడ్డీ భారం తగ్గుతుంది. సోలార్‌ రూఫ్‌ టాప్‌కి 25 సంవత్సరాలు గ్యారంటీ ఇస్తున్నారు. డీలర్లు ఐదేళ్లపాటు ఉచిత సర్వీసు అందిస్తున్నారు.ఇంటి శ్లాబ్‌ మీద 100 చదరపు అడుగుల స్థలం ఉంటే మూడు కిలోవాట్ల సోలార్‌ రూఫ్‌ టాప్‌ అమర్చుకోవచ్చు. ఒక కిలో వాట్‌ సౌర శక్తితో రోజుకి నాలుగు యూనిట్లు విద్యుత్‌ ఉత్పత్తి అవుతుంది. రెండు కిలో వాట్లకు ఎనిమిది యూనిట్లు చొప్పున నెలకు 240 యూనిట్లు, మూడు కిలో వాట్ల యూనిట్లు అయితే రోజుకి 12 యూనిట్ట చొప్పున నెలకి 360 యూనిట్లు విద్యుత్‌ ఉత్పత్తి అవుతుంది. సోలార్‌ రూఫ్‌ టాప్‌ యూనిట్‌ను బిగించేటప్పుడు పాత మీటర్‌ను తీసేసి ఈపీడీసీఎల్‌ అధికారులు కొత్తగా నెట్‌ మీటర్‌ బిగిస్తారు. సోలార్‌ ద్వారా ఉత్పత్తి అయ్యే విద్యుత్‌ రీడింగ్‌, వినియోగదారుడు వాడుతున్న విద్యుత్‌ రీడింగ్‌ కూడా నెట్‌ మీటరులోనే కనిపిస్తుంది. నెలలో గృహ విద్యుత్‌ వినియోగం పోను మిగిలిన విద్యుత్‌ యూనిట్‌ డబ్బులు లబ్ధిదారుని ఖాతాలో జమ అవుతాయి.