రోడ్డు నిబంధనల్ని పాటించకపోతే కఠిన చర్యలు తప్పవు

విశాఖపట్నం అంటే పర్యాటకంగా ఎంతో సుందరమైన నగరం. ఇక్కడికి పర్యాటకులు రెగ్యులర్‌గా వచ్చి విశాఖ అందాలను ఆస్వాదిస్తూ ఉంటారు. పర్యాటక ప్రదేశంగా విశాఖ బీచ్ రోడ్డు చాలా ప్రాముఖ్యత చెందింది. ఇటు ఆర్కే బీచ్ మొదలుపెట్టి అటు భీమిలి వరకు దాదాపుగా 30 కిలోమీటర్లు మేర బీచ్ రోడ్డు ఉంది. ఈ బీచ్ రోడ్‌లో రాకపోకలు సాగించడానికి యువత.. అలాగే మధ్య వయస్సు గల ప్రజలు చాలా ఆసక్తి చూపిస్తూ ఉంటారు. బీచ్ రోడ్‌లో ఒక పక్క సముద్ర తీర ప్రాంతాలను చూస్తూ.. అలా అందాలను ఆస్వాదిస్తూ వెళుతుంటే ఆ కిక్కే వేరు. ఈ నేపథ్యంలో చాలామంది బీచ్ రోడ్‌లో వెళ్లడానికి ఇష్టపడుతూ ఉంటారు. సీజన్ ఏదైనా బీచ్ రోడ్‌లో ప్రయాణం అంటే చాలా ఇష్టపడతారు. అయితే బీచ్ రోడ్‌లో ప్రయాణం సజావుగా జరగాలని ఎలాంటి ప్రమాదాలు జరగకూడదని అందరూ హాయిగా రాకపోకలు సాగించాలని పోలీసులు నిబంధనలు ఏర్పాటు చేశారు. ముఖ్యంగా బీచ్ రోడ్‌లోకి వెళ్తున్న ప్రతి ఒక్కరూ ద్విచక్ర వాహనం అయితే హెల్మెట్ ధరించాలని.. కార్ అయితే సీట్ బెల్ట్ పెట్టుకోవాలని ఇలా కొన్ని నిబంధనలు పరిమితులు తెలియజేశారు. ప్రమాదాల నివారణ చర్యల్లో పోలీసులు ప్రత్యేక చర్యలు చేపట్టారు. రోడ్డు ప్రమాదాల నివారణలో భాగంగా ప్రత్యేక అవగాహన కార్యక్రమాలను ఏర్పాటు చేస్తున్నారు. ఇందులో ప్రత్యేకంగా ద్విచక్ర వాహనాలపై వెళ్లే వారికి హెచ్చరికలు జారీ చేస్తున్నారు. ద్విచక్ర వాహనం నడిపేవారు కచ్చితంగా హెల్మెట్ ధరించాలంటూ ప్రత్యేక అవగాహన కార్యక్రమాలను చేపడుతున్నారు. కేంద్ర, రాష్ట్ర ప్రభుత్వాల ఆదేశాల మేరకు, హైకోర్టు ఉత్తర్వుల మేరకు, విశాఖ నగర పోలీస్ కమిషనర్ ఆదేశాల మేరకు ప్రమాదాల నియంత్రణలో భాగంగా ద్విచక్ర వాహనం నడిపేవారు తప్పనిసరిగా హెల్మెట్ ధరించాల్సిందే అని ట్రాఫిక్ ఎస్ఐ విజయ్ కుమార్ అంటున్నారు.