కర్నూలులో బెంచ్ ఏర్పాటుపై.. ఏపీ హైకోర్టు కీలక వ్యాఖ్యలు

కర్నూలులో హైకోర్టు బెంచ్ ఏర్పాటుపై ఏపీ హైకోర్టు కీలక వ్యాఖ్యలు చేసింది. కర్నూలులో హైకోర్టు బెంచ్‌ ఏర్పాటు చేయాలన్న ఆంధ్రప్రదేశ్ ప్రభుత్వం ప్రతిపాదనను సవాల్ చేస్తూ ఏపీ హైకోర్టులో పిల్ దాఖలైంది. ఈ పిల్ మీద విచారణ జరిపిన ఏపీ హైకోర్టు.. ఆసక్తికర వ్యాఖ్యలు చేసింది. హైకోర్టు బెంచ్ ఏర్పాటుపై తమదే తుది నిర్ణయమని ఆంధ్రప్రదేశ్ హైకోర్టు స్పష్టం చేసింది. న్యాయ కార్యదర్శి పంపిన లేఖ తమపై ప్రభావం చూపదని.. స్వతంత్రంగా నిర్ణయం తీసుకుంటామని హైకోర్టు స్పష్టం చేసింది. హైకోర్టు బెంచ్ ఏర్పాటు విషయంలో వేర్వేరు రాష్ట్రాల నుంచి వివరాలు తెప్పించుకున్నట్టు తెలిపింది. ఏపీలో బెంచ్ ఏర్పాటు చేయాల్సిన అవసరం ఉందా లేదా అనే దానిపైనా, ఇతర అంశాలపైనా సమాచారం తెప్పించుకుంటున్నట్లు తెలిపింది.

మరోవైపు కర్నూలులో శాశ్వత హైకోర్టు బెంచ్ ఏర్పాటు కోసం ప్రయత్నాలు జరుగుతున్న సంగతి తెలిసిందే. న్యాయమూర్తులకు కావాల్సిన సౌకర్యాలపై పూర్తి వివరాలు ఇవ్వాలని హైకోర్టు రిజిస్ట్రార్‌ సైతం ఇటీవల కర్నూలు కలెక్టర్‌కు లేఖ రాశారు. దీంతో కర్నూలు కలెక్టర్ సైతం అధికారులతో చర్చించి.. నివేదికను సమర్పించినట్లు తెలిసింది. మరోవైపు కర్నూలులో హైకోర్టు బెంచ్ ఏర్పాటు చేస్తామని టీడీపీ కూటమి ఎన్నికల సమయంలో హామీ ఇచ్చింది. ఇక ఇచ్చిన మాట ప్రకారం అధికారంలోకి రాగానే.. కర్నూలులో హైకోర్టు బెంచ్ ఏర్పాటుపై ఏపీ కేబినెట్ తీర్మానం కూడా చేసింది. అనంతరం అసెంబ్లీలో తీర్మానం కూడా చేశారు. ఆ తర్వాత కర్నూలులో హైకోర్టు బెంచ్‌ ఏర్పాటు ప్రతిపాదనపై అభిప్రాయాలు తెలుసుకునేందుకు కాంపిటెంట్‌ అథారిటీ ముందు ఈ అంశాన్ని ఉంచాలంటూ రాష్ట్ర న్యాయశాఖ కార్యదర్శి గతేడాది అక్టోబరులో హైకోర్టు రిజిస్ట్రార్‌ జనరల్‌‌కు లేఖ రాశారు.

మరోవైపు కర్నూలులో హైకోర్టు బెంచ్‌ ఏర్పాటుపై హైకోర్టు సీనియర్‌ న్యాయమూర్తులతో కమిటీ ఏర్పాటైంది. నలుగురు సీనియర్ న్యాయమూర్తులతో ప్రధాన న్యాయమూర్తి ఈ కమిటీని ఏర్పాటు చేశారు. ఇక హైకోర్టు బెంచ్ ఏర్పాటు కోసం కర్నూలులో వివిధ ప్రాంతాలను పరిశీలిస్తున్నారు. దిన్నెదేవరపాడులోని ఏపీఈఆర్‌సీ భవనాన్ని పరిశీలిస్తున్నారు. ఈ భవనాన్ని నూతనంగా నిర్మించడంతో పాటుగా ఇందులో విశాలమైన హాళ్లు, ప్రత్యేక గదులు అందుబాటులో ఉన్నాయి. అలాగే ఓ అతిథిగృహం, నాలుగు సూట్‌ రూములలు కూడా ఉన్నాయి. దీంతో పాటుగా బి.తాండ్రపాడు, మునగాలపాడు ప్రాంతాలను కూడా అధికారులు పరిశీలిస్తున్నారు.