ఉక్రెయిన్‌ యుద్దంపై .. తన వైఖరి కుండబద్దలుకొట్టిన రష్యా

రష్యా- ఉక్రెయిన్‌ యుద్ధం ముగింపునకు అమెరికా రంగంలోకి దిగింది. మంగళవారం సౌదీ అరేబియా రాజధాని రియాద్‌ వేదికగా రష్యాతో అమెరికా చర్చలు ప్రారంభించింది. రియాద్‌లోని దిర్హియా ప్యాలెస్‌‌లో జరిగిన ఈ చర్చల్లో ఉక్రెయిన్‌ లేకుండానే అమెరికా, రష్యా విదేశాంగ మంత్రులు మార్కో రుబియో, సెర్గీ లవ్రోవ్ చర్చలు జరపడం గమనార్హం. యుద్ధాన్ని ఎలా ముగించాలనేది ప్రధానంగా చర్చకు వచ్చింది. ఈ చర్చలను మరింత ముందుకు తీసుకెళ్లేందుకు ఓ కమిటీని ఏర్పాటుచేయాలని నిర్ణయించారు.

ఉక్రెయిన్ సంఘర్షణతో పాటు అమెరికా-రష్యా మధ్య ఆర్థిక అంశాలు సహా ఇరుదేశాల సత్సంబంధాలపై సమాలోచనలు జరిగాయి. మూడేళ్ల తర్వాత మొదటిసారి రష్యా, అమెరికా మధ్య ఇలాంటి భేటీ జరగడం ఇదే మొదటిసారి. కానీ, డొనాల్డ్‌ ట్రంప్, వ్లాదిమిర్‌ పుతిన్‌ మధ్య జరిగే భేటీపై ఈ సమావేశంలో ఖరారు కాలేదు. ఇది చర్చల అరంభం కాదని, సంఘర్షణ ముగింపునకు రష్యా నిజంగా సిద్ధంగా ఉందో? లేదో? తెలుసుకోడానికే అని అమెరికా ప్రతినిధి పేర్కొన్నారు. దాని ఆధారంగా సమగ్ర చర్చలు ఉంటాయని స్పష్టం చేశారు.

‘‘ఈరోజు సుదీర్ఘమైన, కష్టతరమైన ప్రయాణంలో మొదటి అడుగు.. కానీ ముఖ్యమైంది.. యుద్ధంలో పాల్గొన్న ప్రతి ఒక్కరికీ ఆమోదయోగ్యమైన ఒప్పందమే లక్ష్యం.. ఉక్రెయిన్ సహా యూరప్‌లోని మా భాగస్వాములు, రష్యన్ వైపున ఉన్న దేశాలు ఉన్నాయి’’ అని తెలిపారు. అమెరికా తరఫున జాతీయ భద్రతా సలహాదారు మైక్ వాల్ట్జ్, పశ్చిమాసియా ప్రత్యేక రాయబారి స్టీవ్ విట్కాఫ్ ప్రతినిధులుగా హాజరయ్యారు. కాగా, ఈ చర్చల్లో రష్యా కీలక డిమాండ్లను తెరపైకి తీసుకొచ్చేందుకు సంకేతాలు ఇచ్చింది.

విదేశాంగ మంత్రిత్వ శాఖ ప్రతినిధి మరియా జఖరోవా మాట్లాడుతూ.. ఉక్రెయిన్‌ను సభ్యదేశంగా నాటో అంగీకరించరాదని అన్నారు. ఉక్రెయిన్ సభ్యదేశంగా చేరే విషయంలో 2008 బుకారెస్ట్‌ శిఖరాగ్ర సమావేశంలో నాటో కూటమి చేసిన తీర్మానానికి కట్టుబడి ఉండాలి... లేకపోతే, ఈ సమస్య ఐరోపాలో వాతావరణాన్ని విషపూరితం చేస్తూనే ఉంటుంది’ అని ఆమె నొక్కి చెప్పారు.

చర్చల అనంతరం మాస్కో ప్రతినిధి యూరీ యుషోవ్ మాట్లాడుతూ.. అమెరికాతో సంబంధాలు మెరుగుపడేందుకు ఇవి ఉపయోగపడతాయని ఆశాభావం వ్యక్తంచేశారు. ఈ చర్చలో సౌదీ యువరాజు మహమ్మద్‌ బిల్‌ సల్మాన్‌ కీలకపాత్ర పోషించారు. శాంతి చర్చలు, ద్వైపాక్షిక సంబంధాలు, విస్తృత సహకారం, వాషింగ్టన్, మాస్కోల్లోని దౌత్య కార్యాలయాల్లో సిబ్బంది పునర్నియామకాలపై ఇరుపక్షాలూ నిర్ణయం తీసుకున్నాయి.