మీ క్రెడిట్ స్కోర్ తక్కువున్నా.. ఇలా ఈజీగా లోన్ పొందొచ్చు

ఎలాంటి తనఖా లేకుండా వ్యక్తిపై నమ్మకంతోనే బ్యాంకులు వ్యక్తిగత రుణాలు ఇస్తుంటాయి. అందుకే చాలా విషయాలను బ్యాంకులు పరిశీలిస్తాయి. ముఖ్యంగా క్రెడిట్ స్కోర్ అడుగుతాయి. అయితే, క్రెడిట్ స్కోర్‌తో పాటు పలు ఇతర విషయాలను సైతం పరిగణనలోకి తీసుకుంటాయి. చాలా మంది తక్కువ క్రెడిట్ స్కోర్ ఉంటే బ్యాంకులను సంప్రదించడమే మానేస్తారు. తమ స్కోర్ తక్కువగా ఉందని, బ్యాంక్ కచ్చితంగా తన లోన్ అప్లికేషన్ తిరస్కరిస్తుందని భావిస్తారు. కానీ, క్రెడిట్ స్కోర్ తక్కువగా ఉన్నా ఇతర అంశాల ఆధారంగా బ్యాంకులు లోన్ మంజూరు చేస్తాయి. అవేంటో తెలుసుకుందాం.

స్థిరమైన ఆదాయం..

మీరు ఉద్యోగు చేస్తూ మంచి ఆదాయం పొందుతుంటే ఆ విషయాన్ని బ్యాంకులకు తెలియజేయాలి. మీ ఆదాయం మీ లోన్ రీపేమెంట్ సామర్థ్యాన్ని సూచిస్తుంది. బ్యాంకులు క్రెడిట్ స్కోర్ మాత్రమే కాకుండా స్థిరమైన ఆదాయాన్ని పరిగణనలోకి తీసుకుంటాయి. మంచి ఆదాయం ఉన్నప్పుడు క్రెడిట్ స్కోర్ పరిగణనించకుండా లోన్ ఇస్తాయి.

పెద్ద కంపెనీలో ఉద్యోగం

లోన్ తీసుకోవాలనుకునే వ్యక్తి ఎక్కడ, ఎలాంటి కంపెనీలో ఉద్యోగం చేస్తున్నారనేది సైతం బ్యాంకులు పరిశీలిస్తాయి. మంచి పేరున్న కంపెనీ, మంచి జీతభత్యాలు, క్రమశిక్షణతో ఉండే కంపెనీల్లోని ఉద్యోగులకు క్రెడిట్ స్కోర్ తక్కువగా ఉన్నా లోన్ ఇస్తాయి. పెద్ద కంపెనీల్లో పని చేస్తున్నట్లయితే మంచి జీతంతో పాటు క్రమ శిక్షణ ఉంటుందని భావిస్తాయి.

సహ దరఖాస్తుదారుడు..

సరైన ఉద్యోగం లేదని, క్రెడిట్ స్కోర్ తక్కువగా ఉందనే కారణంతో బ్యాంకులు లోన్ అప్లికేషన్ తిరస్కరిస్తాయని ఆందోళన పడాల్సిన పని లేదు. మెరుగైన క్రెడిట్ ప్రొఫైల్ ఉన్న సహ దరకాస్తుదారుడని జోడించడం ద్వారా రుణ అర్హతను మెరుగుపరుచుకోవచ్చు. సహ దరఖాస్తుదారుని కలుపుకోవడం వల్ల వ్యక్తిగత రుణాన్ని అధిక మొత్తంలో పొందే అవకాశం ఉంటుంది.

ఇతర ఆదాయాలు..

లోన్ తీసుకోవాలనుకునే వ్యక్తి జీతం మాత్రమే కాకుండా ఇతర ఏవైనా అద్దెలు, ట్యూషన్ చెప్పడం, ఫ్రీలాన్స్ ఆదాయాలు ఉంటే వాటిని రుణ సంస్థకు ఆదాయ వనరులుగా చెప్పవచ్చు. విభిన్న ఆదాయ మార్గాలున్న మిమ్మల్ని రుణ సంస్థలు మెరుగైన సంపాదనపరుడిగా పరిగణిస్తాయి. క్రెడిట్ స్కోర్ తక్కువ ఉన్నప్పుడు వీటి ద్వారా మీరు విశ్వసనీయతను పెంచుకోవచ్చు.

బ్యాంక్ ఖాతాదారుడు..

క్రెడిట్ స్కోర్ తక్కువగా ఉన్న సమయంలో ఇప్పటికే శాలరీ అకౌంట్, క్రెడిట్ కార్డు ఉన్న బ్యాంకును సంప్రదించడం మంచిది. మీ అకౌంట్ ఉన్న బ్యాంకులో మంచి సంబంధాలు, మెరుగైన ఆర్థిక లావాదేవీలు ఉన్నట్లయితే వ్యక్తిగత రుణం పొందడం సులభమవుతుంది. బ్యాంక్ ఖాతాదారులకు లోన్ ఇచ్చేందుకు బ్యాంకులు ముందుకొస్తాయి.