తిరుమల కొండపై చైన్ స్నాచర్ హల్ చల్

కలియుగ ప్రత్యక్షదైవం శ్రీనివాసుడు నెలవైన తిరుమలకు నిత్యం వేలాది మంది భక్తులు తరలివస్తుంటారు. వేలమంది భక్తులు, యాత్రికులతో తిరుమల కొండ కిటకిటలాడుతూ ఉంటుంది. అయితే ఇదే సమయంలో సందట్లో సడేమియాలా అప్పుడప్పుడూ చోరీలు, చిల్లర దొంగతనాలు చోటుచేసుకుంటూ ఉంటాయి. తాజాగా సోమవారం కూడా తిరుమల కొండపై ఓ చైన్ స్నాచర్ హల్‌చల్ చేశాడు. ఓ భక్తురాలి మెడలోని చైన్ చోరీ చేసే ప్రయత్నం చేశాడు. భక్తురాలి మెడలోని బంగారు గొలుసును లాక్కెళ్లేందుకు యత్నించాడు. ఊహించని పరిణామంతో భక్తురాలు షాక్ తిన్నది. వెంటనే గట్టిగా కేకలు వేసింది. దీంతో చుట్టుపక్కల ఉన్న జనం దొంగను పట్టుకున్నారు. ఘటన స్థలంలోనే చితకబాదారు. అనంతరం దొంగను విజిలెన్స్ సిబ్బందికి అప్పగించారు. ఈ ఘటన మాధవ నిలయంలో చోటుచేసుకుంది.

తిరుమల క్షేత్రపాలకుడికి అభిషేకం

ఫిబ్రవరి 26వ తేదీన తిరుమలలో క్షేత్రపాలకుడికి అభిషేకం నిర్వహించనున్నారు. మహా శివరాత్రి సందర్భంగా ఫిబ్రవరి 26వ తేదీన గోగర్భం సమీపంలోని క్షేత్రపాలకుడిగా ఉన్న రుద్రునికి ఘ‌నంగా అభిషేకం నిర్వహించనున్నారు. మహాశివరాత్రి సందర్భంగా ఏటా ఇక్కడ అభిషేకం నిర్వహించడం ఆనవాయితీ. కార్యక్రమంలో భాగంగా ముందుగా శ్రీవారి ఆలయం నుంచి ఆలయ మర్యాదలతో అధికారులు, అర్చకులు క్షేత్రపాలక శిల వద్దకు వస్తారు. అనంతరం మ‌ధ్యాహ్నం 3 గంట‌లకు సుగంధ‌ ద్రవ్యాలతో క్షేత్రపాలకునికి అభిషేకం చేసి నైవేద్యం సమర్పిస్తారు. అనంత‌రం భ‌క్తుల‌కు ప్రసాదాలు పంపిణీ చేస్తారు.

శేషాచ‌ల లింగేశ్వరస్వామి ఆల‌యంలో మ‌హాశివ‌రాత్రి ఉత్సవాలు

మహా శివరాత్రి పర్వదినాన్ని పురస్కరించుకుని ఫిబ్రవరి 25 నుంచి 27వ తేదీ వ‌ర‌కు శేషాచ‌ల లింగేశ్వరస్వామి ఆల‌యంలో మ‌హాశివ‌రాత్రి ఉత్సవాలు జరగనున్నాయి. చంద్రగిరి మండ‌లం కందుల‌వారిప‌ల్లిలో ఈ ఆలయం ఉంది. ఫిబ్రవరి 25న సాయంత్రం క‌ల‌శ స్థాప‌న‌, గ‌ణ‌ప‌తి, న‌వ‌గ్రహ, రుద్ర దుర్గ హోమాలు నిర్వహిస్తారు. ఫిబ్రవరి 26న మ‌హాశివ‌రాత్రి సంద‌ర్భంగా తెల్లవారుజామున విఘ్నేశ్వర‌స్వామి, సుబ్రమ‌ణ్యస్వామి, ఆంజ‌నేయ‌స్వామి, ఉమామ‌హేశ్వరస్వామికి అభిషేకం నిర్వహిస్తారు. శేషాచ‌ల లింగేశ్వరస్వామికి ఏకాద‌శ రుద్రాభిషేకం నిర్వహిస్తారు. సాయంత్రం మరోసారి అభిషేకం చేస్తారు. రాత్రి హ‌రిక‌థ‌, భ‌క్తి సంగీత కార్యక్రమాలు నిర్వహిస్తారు. ఫిబ్రవరి 27న మ‌హ‌న్యాస‌పూర్వక రుద్రాభిషేకం, స్వామివారి క‌ల్యాణోత్సవం నిర్వహిస్తారు.