మార్చి 22 నుంచి ఐపీఎల్ ,,,ఒక్కచోటుకు చేరుతున్న సీఎస్కే ఆటగాళ్లు

ఓ పక్క ఛాంపియన్స్ ట్రోఫీ జోష్ కొనసాగుతుండగానే భారత్‌లో ఐపీఎల్ హీట్ ప్రారంభం అవుతోంది. ఇప్పటికే షెడ్యూల్ కూడా విడుదలైంది. మార్చి 22 నుంచి మే 25 వరకు ఐపీఎల్ 2025 సీజన్ జరగనుంది. ఇందుకోసం ఇప్పటికే దాదాపు అన్ని జట్లు ప్రాక్టీస్ ప్రారంభించాయి. చాలా జట్లు ప్రత్యేక శిబిరాలను ఏర్పాటు చేశాయి. అంతర్జాతీయ క్రికెట్, దేశవాళీ క్రికెట్ షెడ్యూల్ లేని ఆటగాళ్లు ఇందులో పాల్గొంటున్నారు.

ఇక ఐపీఎల్‌లో అత్యధిక మంది ఫ్యాన్స్‌ను కలిగి ఉన్న జట్లలో ఒకటిగా ఉన్న చెన్నై సూపర్ కింగ్స్ కూడా సన్నాహకాలు ప్రారంభించింది. ఇవాళ్టి (ఫిబ్రవరి 25) నుంచి ఆ జట్టు ఆటగాళ్లు ఒక్క దగ్గరకు చేరనున్నారు! ఐపీఎల్ 2025 కోసం చెన్నై సూపర్ కింగ్స్ జట్టులో ఉన్న ఆటగాళ్లంతా.. కలుసుకోనున్నట్లు తెలుస్తోంది. మరో నాలుగు వారాల్లో ప్రారంభం కానున్న లీగ్‌ కోసం వారంతా ఇప్పటి నుంచే కలిసి సాధన చేయనున్నారు.

మహేంద్ర సింగ్ ధోనీ, కెప్టెన్ రుతురాజ్ గైక్వాడ్ సహా అందుబాటులో ఉన్న ప్లేయర్లంతా ఈ నెలలోనే జట్టుతో చేరనున్నారు. అంతర్జాతీయ ప్లేయర్లు మాత్రం ఛాంపియన్స్ ట్రోఫీ ముగిశాక జట్టుతో కలుస్తారు. అంటే మార్చి రెండో వారంలో రవీంద్ర జడేజా, రచిన్ రవీంద్ర, డెవాన్ కాన్వే లాంటి ప్లేయర్లు సీఎస్కే శిబిరంలో చేరనున్నారు.

గత సీజన్‌లో మాదిరిగానే ఈసారి కూడా లీగ్‌ దశలో 70 మ్యాచ్‌లు జరగనున్నాయి. ప్లే ఆఫ్స్, ఫైనల్‌తో కలిపి మొత్తం 74 మ్యాచ్‌లు ఉంటాయి. ఇక చెన్నై సూపర్ కింగ్స్ జట్టు తన తొలి మ్యాచ్‌లో మార్చి 23న ముంబై ఇండియన్స్‌తో తలపడనుంది.

ఐపీఎల్ 2025 కోసం చెన్నై సూపర్ కింగ్స్ జట్టు:ఎంఎస్ ధోనీ, రుతురాజ్ గైక్వాడ్, రవీంద్ర జడేజా, మథీశ పథిరన, శివమ్ దూబే, డెవాన్ కాన్వే, రాహుల్ త్రిపాఠి, రచిన్ రవీంద్ర, రవిచంద్రన్ అశ్విన్, ఖలీల్ అహ్మద్, నూర్ అహ్మద్, విజయ్ శంకర్, సామ్ కర్రన్, షేక్ రషీద్, అన్షుల్ కాంభోజ్, ముకేశ్ చౌదరి, దీపక్ హుడా, గురుజప్నీత్ సింగ్‌, నాథన్ ఎలీస్‌, జేమీ ఓవర్టన్, కమలేష్ నాగర్‌కోటి, రామకృష్ణ ఘోష్‌, అండ్రీ సిద్దార్థ్ , వన్ష్ బేడీ, శ్రేయస్ గోపాల్