ల్యాండయ్యే సమయంలో రన్‌వేపై మరో విమానం

అగ్రరాజ్యం అమెరికాలో ఇటీవల అనేక విమాన ప్రమాదాలు జరుగుతున్నాయి. రోజుల వ్యవధిలోనే అనేక విమానాలు ప్రమాదాలకు గురవుతుండగా.. పదుల సంఖ్యలు ప్రజలు ప్రాణాలు కోల్పోతున్నారు. అయితే తాజాగా కూడా మరో పెద్ద ప్రమాదం జరగబోతుండగా.. గుర్తించిన పైలెట్ చాకచక్యంగా దాన్ని తప్పించాడు. అనేక మంది ప్రాణాలను కాపాడాడు. ప్రస్తుతం ఇందుకు సంబంధించిన వీడియో నెట్టింట తెగ వైరల్ అవుతుండగా.. ప్రమాదం జరగకుండా అడ్డుకున్న పైలెట్‌కు సెల్యూట్ చేస్తున్నారు. ఆ పూర్తి వివరాలు మీకోసం.

అమెరికా కాలమానం ప్రకారం మంగళవారం రోజు ఉదయం 8.47 గంటలకు సౌత్‌వెస్ట్ ఎయిర్ లైన్స్‌కు చెందిన బోయింగ్ 737-800 విమానం ఒమాహా నుంచి చికాగో మిడ్ వే ఎయిర్ పోర్టుకు చేరుకుంది. అయితే రన్‌వే 31సీపై ఈ విమానం ల్యాండ్ అయ్యేందుకు సిద్ధం కాగా.. ముందుగా ఓ ప్రైవేట్ జెట్ అడ్డంగా వచ్చింది. ముఖ్యంగా ఛాలెంజర్ 350 ప్రైవేటు జెట్ అదే రన్‌వే పైనుంచి కుడివైపు వెళ్తుండగా.. సౌత్‌వెస్ట్ ఎయిర్ లైన్స్‌ పైలెట్ దీన్ని గుర్తించారు. వెంటనే అప్రమత్తమై ల్యాండయ్యే విమానాన్ని గాల్లోకి లేపారు. అప్పటికే విమాన చక్రాలు నేలను తాకగా.. మళ్లీ ఒక్కసారిగా లేచి గాల్లోకి వెళ్లింది.

ఆపై ముందున్న విమానం పూర్తిగా పక్కకు వెళ్లిపోయాకా ఈ విమానాన్ని సురక్షితంగా ల్యాండ్ చేశారు. పైలెట్ల అప్రమత్తత వల్లే ఈ విమాన ప్రమాదం తప్పగా.. ఇందుకు సంబంధించిన వీడియోలు నెట్టిటం వైరల్ అవుతున్నాయి. దీనిపై ఒక్కకొక్కరూ ఒక్కో విధంగా స్పందిస్తున్నారు. అడ్డుగా వచ్చిన ప్రైవేటు జెట్‌ను ఇష్టం వచ్చినట్లుగా తిడుతూనే.. సౌత్‌వెస్ట్ ఎయిర్ లైన్స్ పైలెట్లను పొగడ్తలతో ముంచెత్తుతున్నారు. అయితే ఈ వీడియో చూసిన ఫెడరల్ ఏవియేషన్ అడ్మినిస్ట్రేషన్ ఈ ఘటనపై దర్యాప్తు చేపట్టింది.

ఈక్రమంలోనే ఛాలెంజర్ 350 బిజినెస్ జెట్ ఎలాంటి అనుమతులు లేకుండానే రన్‌వే పైకి వచ్చినట్లు గుర్తించింది. వెంటనే దానిపై చర్యలకు ఉపక్రమించింది. అలాగే అందులోని పైలెట్లను కూడా పిలిచి మాట్లాడింది. వీరిపై ఎలాంటి చర్యలు తీసుకున్నామనేదాన్ని మాత్రం ఫెడరల్ ఏవియేషన్ అడ్మినిస్ట్రేషన్ అధికారికంగా ప్రకటించలేదు. కానీ గట్టి చర్యలే తీసుకునే అవకాశం ఉందని.. పైలెట్లపై నిషేధం కూడా విధించే అవకాశం ఉందని అంతా భావిస్తున్నారు.