డొనాల్డ్ ట్రంప్, మస్క్‌లకు ఫెడరల్ కోర్టు భారీ షాక్

ప్రభుత్వ వ్యయాల తగ్గింపు ప్రణాళికల్లో భాగంగా పలు విభాగాల్లో పెద్దఎత్తున ఉద్యోగాల్లో ఎలాన్‌ మస్క్‌ నేతృత్వంలోని డోజ్‌ విభాగం కోతలు విధించింది. మస్క్ నిర్ణయానికి అమెరికా అధ్యక్షుడు డొనాల్డ్‌ ట్రంప్‌ కూడా మద్దతిస్తూ వేలాది మందిని విధుల నుంచి  తొలగిస్తూ ఉత్తర్వులు జారీ చేశారు. అయితే, ఈ ఉత్తర్వులను తాజాగా ఫెడరల్ జడ్జ్ నిలిపివేశారు. ట్రంప్‌ చర్యలపై మండిపడిన యూఎస్‌ డిస్ట్రిక్ట్‌ జడ్జి విలియం అల్సప్‌.. పర్సనల్‌ మేనేజ్‌మెంట్‌ కార్యాలయానికి అలాంటి అధికారాలు లేవని స్పష్టంచేశారు. తొలగింపు ఉత్తర్వులను తక్షణమే ఉపసంహరించుకోవాలని ఆయన ఆదేశించారు.

‘‘చరిత్రలో ఏ చట్టం కింద కూడా మరొక ఏజెన్సీలో ఉద్యోగులను నియమించుకోవడానికి, తొలగించడానికి పర్సనల్ మేనేజ్‌మెంట్ కార్యాలయానికి ఎటువంటి అధికారం లేదు.. ఉద్యోగ నియామకాలు, తొలగింపు అధికారాలు సంబంధిత ఏజెన్సీలకు కాంగ్రెస్ చట్టబద్దత కల్పించింది.. ఉదాహరణకు రక్షణ శాఖను తీసుకుంటే నియామకం, తొలగింపులో దానికి చట్టబద్ధమైన అధికారం ఉంది’’ అని న్యాయమూర్తి అల్సప్ స్పష్టం చేశారు.

ప్రభుత్వ వ్యయాలను తగ్గించేందుకు ట్రంప్ చేస్తోన్న ప్రయత్నాలకు తాజా తీర్పు ఎదురు దెబ్బ. శరణార్థుల ప్రవేశాలపై ట్రంప్ నిషేధాన్ని వెస్ట్ కోస్ట్‌లోని జిల్లా న్యాయమూర్తి నిలిపివేయగా.. అనంతరం, జన్మతః పౌరసత్వహక్కును రద్దుచేస్తూ ఆయన జారీ చేసిన కార్యనిర్వాహక ఉత్తర్వులను మరో కోర్టు సస్పెండ్ చేసింది. ప్రొబేషనరీ సిబ్బంది సహా అందరినీ తొలగించాలన్న చట్టవిరుద్ధమైన ఆదేశాలపై యూనియన్లు, న్యాయవాద సంఘాలు వేసిన దావాపై ఫెడరల్ కోర్టు గురువారం తీర్పు వెలువరించింది

ఒక ఫెడరల్ సిబ్బంది ఉద్యోగంలో చేరి మొదటి లేదా రెండో సంవత్సరంలో ఉండి.. జూనియర్ ర్యాంక్ నుంచి పదోన్నతి పొందినప్పటికీ ప్రొబేషనరీ పీరియడ్‌గా పరిగణిస్తారు. ట్రంప్ ఉత్తర్వులతో వేలాది మంది ప్రొబేషనరీ ఉద్యోగులపై ప్రభావం చూపుతుంది. ‘దేశ ఉపాధి చట్టాలను అమలు చేసే బాధ్యత కలిగిన సమాఖ్య సంస్థ ఓపీఎం.. అమెరికా చరిత్రలో అత్యంత భారీగా ఉద్యోగుల తొలగింపు చేపట్టింది.. ఉద్యోగుల నియమాకం, తొలగింపునకు కాంగ్రెస్ అధికారం ఇచ్చిన సమాఖ్య సంస్థల్లో ఉద్యోగులను తొలగించే రాజ్యాంగబద్ధమైన అధికారం ఓపీఎమ్‌కి లేదు’ అని తన ఉత్తర్వుల్లో యూఎస్‌ డిస్ట్రిక్ట్‌ జడ్జి విలియం అల్సప్‌ పేర్కొన్నారు.

ఇటీవల ఉద్యోగుల తొలగింపుపై ఉత్తర్వులు వెలువరించిన ట్రంప్.. ఫెడరల్‌ ప్రభుత్వం ఖరీదుగా.. అదే సమయంలో అసమర్థంగా మారిందని ఆరోపించారు. పీకల్లోతు అప్పుల్లో కూరుకుపోయి... అమెరికా పౌరులకు కావాల్సిన ఫలితాలను అందించడం లేదని ట్రంప్ తన ఆ మెమోలో వివరించారు. ఈ క్రమంలో అన్ని ఫెడరల్‌ విభాగాల చీఫ్‌లూ.. పెద్ద ఎత్తున సిబ్బంది తగ్గింపునకు తక్షణ సన్నాహక చర్యలు తీసుకోవాలని ఆయన ఆదేశించారు.