అమెరికా వణికించిన సెక్స్ కుంభకోణంలో ఇవాంక ట్రంప్ పేరు

అగ్రరాజ్యం అమెరికాలో సంచలనం రేపిన సెక్స్ కుంభకోణం గురించి అందరికీ తెలిసిందే. 2005లో వెలుగులోకి వచ్చిన ఈ కుంభకోణంకు సంబంధించిన కీలక పత్రాలను ఆ దేశ జస్టిస్ డిపార్ట్‌మెంట్ తాజాగా విడుదల చేసింది. అందులో ప్రధాన నిందితుడు జెఫ్రీ ఎప్‌స్టీన్ కాంటాక్ట్ లిస్టు జాబితా, ఫ్లైట్‌లాగ్ సమాచారం ఉన్నాయి. అయితే ఇందులో అనేక మంది రాజకీయ, సినిమా ప్రముఖుల పేర్లు ఉండగా అంతా షాక్ అవుతున్నారు. ముఖ్యంగా అమెరికా అధ్యక్షుడు డొనాల్డ్ ట్రంప్ మాజీ భార్య ఇవానా ట్రంప్, కుమార్తె ఇవాంక ట్రంప్, ప్రముఖ గాయకుడు మైఖేల్ జాక్సన్, నటుడు అలెక్ బాల్డ్‌విన్ వంటి వాళ్లు సైతం ఉన్నారు. ఆ పూర్తి వివరాలు మీకోసం.

పేద, మధ్య తరగతి బాలికలు, అమ్మాయిలను లక్ష్యంగా పెట్టుకుని.. పెద్ద మొత్తంలో డబ్బులు చెల్లిస్తూ వారిపై అఘాయిత్యాలకు పాల్పడేవాడు జెఫ్రీ ఎప్‌స్టీన్. ముఖ్యంగా అమెరికాలోని ఫ్లోరిడా, న్యూయార్క్, వర్జిన్ ఐలాండ్స్, మెక్సికోల్లోనే తన నివాసాలకు పిలిపించుకుంటూ జల్సాలు చేసేవాడు. ముఖ్యంగా ముందుగా ఓ అమ్మాయికి డబ్బు ఆశ చూపించి లోబరుచుకుని.. ఆపై మరో అమ్మాయిని తీసుకు వస్తే మరింత కమిషన్ ఇస్తానంటూ చెప్పేవాడు. ఇలా వందలాది మంది ఈ కూపంలోకి దిగారు. అయితే 20 ఏళ్ల పాటు చాలా హాయిగా సాగిన ఈ దారుణం 2005లో వెలుగులోకి వచ్చింది.

విషయం గుర్తించిన పోలీసులు జెఫ్రీ ఎప్‌స్టీన్‌ను అరెస్టు చేసి కొన్ని నెలల పాటు జైల్లోనే ఉంచారు. ఆపై విడుదల కాగా మళ్లీ ఇదే తంతు కొనసాగించాడు. కానీ 2019లో "మీ టూ" ఉద్యమం సాగడంతో అనేక మంది జెఫ్రీ గురించి ఆరోపణలు చేశారు. దీంతో పోలీసులు మరోసారి అతడిని అరెస్ట్ చేశారు. అయితే జైల్లో ఉండగానే జెఫ్రీ అనుమానాస్పద స్థితిలో మృతి చెందగా.. పోలీసులు దాన్ని ఆత్మహత్యగా గుర్తించారు. ఆ తర్వాత ఇతడి స్నేహితురాలు మాక్స్‌వెల్ కూడా ఈ దారుణంలో పాలు పంచుకున్నారని తెలుసుకుని కోర్టులో హాజరు పర్చగా.. 20 ఏళ్ల జైలు శిక్ష పడింది.

ఇదంతా ఇలా ఉండగా.. ఈ కేసుకు సంబంధి అనేక పత్రాలను ఆ దేశ జస్టిస్ డిపార్ట్‌మెంట్ విడుదల చేస్తూ వస్తోంది. ఇప్పటికే అనేక పత్రాలు విడుదల కాగా.. తాజాగా ప్రధాన నిందితుడు జెఫ్రీ ఎప్‌స్టీన్‌కు సంబంధించిన కాంటాక్ట్ లిస్టు, ఫ్లైట్ లాగ్ సమాచారాన్ని బయటపెట్టారు. మొత్తం 200 పేజీలు కల్గిన ఈ జాబితాలో ఇంగ్లీష్ రాక్‌బ్యాండ్ రోలింగ్ స్టోన్ సభ్యుడు మైక్ జాగర్, దివంగత పాప్ ఐకాన్ మైఖేల్ జాక్సన్, నటుడు అలెక్ బాల్డ్‌విన్, మాజీ న్యూయార్క్ గవర్నర్ ఆండ్రూ క్యూమో, సూపర్ మోడల్ నవోమి క్యాంప్‌బెల్, సంగీతకారుడు కోర్ల్నీ లవ్ ఉన్నారు.

అలాగే అమెరికా ఆరోగ్య శాఖ మంత్రి ఆర్ఎఫ్ కెన్నడీ జూనియర్ తల్లి ఎథెల్ కెన్నడీ, కెర్రీ, టెడ్, అమెరికా అధ్యక్షుడు డొనాల్డ్ ట్రంప్ మాజీ భార్య ఇవాన ట్రంప్, కుమార్తె ఇవాంక ట్రంప్ పేర్లు కూడా ఉన్నాయి. అయితే వీరంతా ఎప్‌స్టీన్ కస్టమర్లు కాదని.. కాంటాక్స్ లిస్టులోని పేర్ల జాబితా మాత్రమేనని అధికారులు వివరిస్తున్నారు.