భార్య అలక తీర్చేందుకు గిఫ్టుగా లగ్జరీ కారు

భార్య అలక తీర్చడం కోసం భర్తలు చాలా ప్రయత్నాలే చేస్తుంటారు. వారికి నచ్చిన వంట చేయడమో, వేలల్లో డబ్బులు ఖర్చు పెట్టి చీరలు, నగలు వంటి తీసుకురావడమో చేసి సర్‌ప్రైజ్ ఇవ్వాలనుకుంటారు. కానీ వాళ్లు తెచ్చిన డిజైన్ నచ్చకో, కలర్ నచ్చకనో, ధర ఎక్కువైందనో భార్యలు మళ్లీ విసుక్కోవడంతో చిరాకు పడిపోతుంటారు. కొన్ని సార్లు అవి రిటర్న్ కూడా ఇచ్చిరమ్మంటూ భార్యలు వేదిస్తే.. భర్తలు పడే నరకయాతన మామూలుగా ఉండదు. అచ్చంగా ఇలాంటి పరిస్థితే వచ్చిందో భర్తకు. కానీ అతడు మాత్రం ఆమె చెప్పినట్లు చేయకుండా.. ఆమె కోసం తీసుకు వచ్చిన లగ్జరీ కారును చెత్తకుప్పలో పడేసి వెళ్లిపోయారు. ప్రస్తుతం ఈ వార్త నెట్టింట తెగ వైరల్ అవుతోంది. ఆపూర్తి వివరాలు మీకోసం.

రష్యా రాజధాని మాస్కో నగరానికి సమీపంలో ఉన్న ఓ ప్రాంతంలో మైటిష్చ్‌కు చెందిన ఓ జంట మధ్య తరచుగా గొడవలు వస్తున్నాయి. ఎంత సర్దుకు పోవాలనుకున్నా భార్యాభర్తల మధ్య సఖ్యత కుదరట్లేదు. దీనికి ఎలాగైనా సరే చెక్ పెట్టి భార్యతో ప్రేమగా ఉండాలనుకున్నాడు. ఇందుకోసం ఆమెకు నచ్చేది ఏదైనా పెద్ద బహుమతి తీసుకోవాలనుకున్నాడు. ఆమెకు కార్లు అంటే ఇష్టం అని ముందుగానే తెలియడంతో.. ఆమెకోసం ఓ లగ్జరీ కారు కొనుగోలు చేయాలనుకున్నాడు.

ముఖ్యంగా చాలా ఆలోచించి 27 లక్షల రూపాయల విలువ చేసే ఎస్‌యూవీ కారును తీసుకున్నాడు. దాన్ని ఫిబ్రవరి 14వ తేదీ ప్రేమికుల దినోత్సవం రోజున అందజేయాలనుకున్నాడు. అయితే కొనుగోలుకు ముందే ఈ కారును టెస్ట్ డ్రైవ్‌కు తీసుకెళ్లగా రోడ్డు ప్రమాదం జరిగింది. ఫలింతగా కారుపై కొన్నిచోట్ల డ్యామేజీలు అయ్యాయి. అవి పెద్దగా కనిపించకపోవడంతో బాగు చేయించకుండానే భార్యకు బహుమతిగా అందజేసేందుకు తీసుకెళ్లాడు. కారును బయటే పెట్టి భార్యను పిలిచాడు. సర్‌ప్రైజ్ అంటూ కారును చూపించాడు. దీంతో తెగ సంబురపడిపోయిన ఆమె వెంటనే వచ్చి కారును చూసింది. థాంక్స్ అంటూనే కారంతా చెక్ చేసింది.

ఈక్రమంలోనే కారుపై ఉన్న డ్యామేజీలను గుర్తించి.. ఇవేంటని ప్రశ్నించింది. ప్రమాదం జరిగిందని చెప్పగా.. ఛీ ఇలాంటి కారు నాకేమీ వద్దని తెగేసి చెప్పింది. దీంతో తీవ్ర కోపోద్రిక్తుడైన భర్త ఆ కారును తీసుకెళ్లి నేరుగా చెత్త కంటైనర్‌లో పడేశాడు. మరోవైపు భార్య ఇంట్లోకి వెళ్లిపోయి తలుపులేసుకుంది. ఇలా ఇద్దరూ కోపంగా వెళ్లిపోవడంతో కారు అక్కడే ఉండిపోయింది. అంత కొత్త కారు చెత్తకుప్పలో కనిపిస్తుండగా.. స్థానిక ప్రజలంతా ఆశ్చర్య పడిపోతున్నారు. ఇది ఎవరు వేశారని తెలుసుకునే ప్రయత్నాలు చేస్తున్నారు. రెండు వారాలు గడుస్తున్నా ఇప్పటికీ ఆ కారు అక్కడే ఉంది. చెత్తకుప్పలో కారు ఫొటోలు, వీడియోలు వైరల్ అవుతుండగా.. ప్రజలంతా దాన్ని చూసేందుకు వస్తున్నారు. అయితే దీనిపై అధికారులు ఇంకా స్పందించలేదు. కనీసం కారును అక్కడి నుంచి తరలించే ప్రయత్నం కూడా చేయట్లేదు.