తిరుమలలో యానిమల్‌ రేడియో కాలర్‌ సిస్టం ఏర్పాటుకు సన్నాహాలు

తిరుమల శ్రీవారి దర్శనార్థం వచ్చే భక్తులకు అడవి జంతువుల నుంచి రక్షణ కల్పించే దిశగా టీటీడీ ప్రయత్నాలు చేస్తోంది. కాలినడక మార్గాలతో పాటు ఘాట్‌రోడ్లలో ప్రయాణించే వాహనదారులకు చిరుతలు, ఏనుగులు, ఎలుగబంట్ల నుంచి ఎలాంటి ఇబ్బందీ కలగకుండా యానిమల్‌ రేడియో కాలర్‌ సిస్టంను ఏర్పాటు చేయాలని యోచిస్తోంది. దీనికోసం వైల్డ్‌లైఫ్‌ అధికారుల అనుమతి కోరింది. 2023 ఆగస్టు 12న అలిపిరి కాలిబాటలో నెల్లూరు జిల్లా కోవూరుకు చెందిన లక్షిత అనే చిన్నారిపై చిరుత దాడిచేసి దారుణంగా చంపింది. అదే ఏడాది జూన్‌ 22న ఆదోనికి చెందిన కౌశిక్‌ అనే నాలుగేళ్ల బాలుడిపైనా చిరుత దాడి చేసింది. ఇలా గత పదిహేనేళ్లుగా అలిపిరి, శ్రీవారిమెట్టు కాలిబాటలతో పాటు తిరుపతి నుంచి తిరుమలకు చేరుకునే రెండో ఘాట్‌, తిరుమల నుంచి తిరుపతికి చేరుకునే మొదటి ఘా ట్‌ రోడ్డులో చిరుతలు కనిపిస్తూనే ఉన్నాయి. పైగా, మొదటి ఘాట్‌లోని ఏడో మైలు వద్ద, పార్వేటమండపం, శ్రీవారిపాదాల మార్గంలో ఏనుగుల గుంపు కూడా సంచరిస్తున్న క్రమంలో భక్తులు నిత్యం భయాందోళనకు గురవుతున్నారు. ఈ నేపథ్యంలో అడవి జంతువుల నుంచి భక్తులకు ఎలాం టి రక్షణ కల్పించాలనే అంశంపై ఇప్పటికే టీటీడీ... వైల్డ్‌లైఫ్‌ అఽధికారులను సంప్రదించింది. ఈ క్రమంలో టీటీడీ ‘రేడియో కాలర్‌ సిస్టం’ అనే ఆలోచన ను వైల్డ్‌లైఫ్‌ అఽధికారుల ముందుంచింది. ఘాట్‌రోడ్లు, కాలిబాట మార్గాలు, తిరుమల పరిసర ప్రాంతాల్లో నిత్యం సంచరించే చిరుతలు, ఏనుగులు, ఎలుగుబంట్లతో పాటు జింకలకు కూడా ‘రేడియో కాలర్‌ సిస్టం’ను ఏర్పాటు చేయాలని కోరింది.వీటి ద్వారా ఆయా జంతువులు జనసంచారం సమీపాని కి వస్తే వెంటనే అలర్ట్‌ కావడానికి సౌకర్యంగా ఉంటుందనే అభిప్రాయాన్ని టీటీడీ ఫారెస్ట్‌ అధికారులు వ్యక్తపరిచారు. దేశంలోని పలు ప్రాంతాల్లో అనుసరిస్తున్న ఈ విధానాన్ని తిరుమలలోనూ అమలు చేసేందుకు వైల్డ్‌లైఫ్‌ అధికారులు కూడా సానుకూలంగా స్పందించినట్టు తెలిసింది.