ప్రియురాలిని చంపి ట్రాలీ బ్యాగులో కుక్కి, పొదల్లో పడేశాడు

ఆరేళ్లుగా వారిద్దరూ ఒకరినొకరు ప్రేమించుకున్నారు. అది నచ్చని యువతి తల్లిదండ్రులు వేరే వ్యక్తికి ఇచ్చి పెళ్లి చేయగా.. అక్కడి నుంచి ప్రియుడి కోసం వచ్చేసింది. ఉద్యోగం చేస్తూ ఓ ఇంటిని అద్దెకు తీసుకుని ప్రియుడితో కలిసి జీవిస్తోంది. అతడే ప్రాణంగా భావిస్తూ.. జీవితాన్ని పంచుకున్న ఆమెకు ప్రియుడితో చిన్న గొడవ జరిగింది. విపరీతమైన కోపం పెంచుకున్న అతడు ఆమెను చంపేశాడు. ఆపై ఓ ట్రాలీ బ్యాగులో ప్యాక్ చేసి చెట్ల పొదల్లో పడేశాడు. ఆపై తన పాపం కడుక్కోవాలని భావించి గుండు కొట్టించుకుని మరీ గంగానదిలో పుణ్య స్నానం ఆచరించాడు. అంతలోపే పోలీసులు ఎంట్రీ ఇచ్చి అతడిని అరెస్ట్ చేశారు. ఆ పూర్తి వివరాలు మీకోసం.

వారణాసిలోని రోహానియా పోలీస్ స్టేషన్ పరిధిలోని ముదదేవ్ తెహ్రి గ్రామానికి చెందిన అనన్య, విశాల్ 2019 నుంచి ప్రేమించుకుంటున్నారు. ఒకరంటే ఒకరకి విపరీతమైన ఇష్టం కాగా.. పెళ్లి చేసుకోవాలని కూడా భావించారు. కానీ ఇటీవలే వారి ప్రేమ గురించి తెలుసుకున్న అనన్య తల్లిదండ్రులు ఆమెకు వేరే పెళ్లి చేయాలని భావించారు. ఆమె వద్దని వారిస్తున్నా వినకుండా మరో వ్యక్తితో వివాహం జరిపించారు. ఈక్రమంలోనే ప్రియుడు విశాల్‌పై ప్రేమను చంపుకోలేకపోయిన ఆమె అతడి కోసం కట్టుకున్న వాడిని వదిలేసి వచ్చింది.

ఈక్రమంలోనే జౌన్‌పూర్‌లోని ఓ షాపింగ్ మాల్‌లో ఉద్యోగం చేస్తూ.. మచ్లిషహర్ ప్రాంతంలో ఓ గదిని అద్దెకు తీసుకుంది. అప్పుడప్పుడూ ఆ గదికి ప్రియుడు విశాల్ వచ్చేవాడు. ఇలా వీరిద్దరూ హాయిగా గడుపుతుండగా.. అనుకోని ఘటన జరిగింది. ముఖ్యంగా ఫిబ్రవరి 24వ తేదీన విశాల్ మచ్లిషహర్‌లోని అనన్య ఇంటికి వెళ్లాడు. అక్కడే వారికి ఏదో చిన్న విషయంపై గొడవ జరిగింది. ఈక్రమంలోనే విపరీతమైన కోపోద్రిక్తుడైన విశాల్.. వంటగదిలో దొరికిన ఓ పెనాన్ని తీసుకుని అనన్య తలపై కొట్టడం ప్రారంభించాడు. అనేక సార్లు బాదడంతో తీవ్ర రక్తస్రావమైన అనన్య ప్రాణాలు కోల్పోయింది.

విషయం గుర్తించిన విశాల్.. ఇంట్లో ఉన్న ఓ ట్రాలీ బ్యాగు తీసి ఆమెను అందులో కుక్కాడు. ఆపై ఆ బ్యాగును ఓ రిక్షా ద్వారా తీసుకెళ్లి జౌన్‌పూర్‌లోని ఓ ప్రముఖ ఆస్పత్రి ముందున్న చెట్లపొదల్లో పడేశాడు. ఆపై ఆ పాపాన్ని కడుక్కోవాలని భావించి వారణాసిలోని తన ఇంటికి వెళ్లాడు. ముందుగా గంగానది వద్దకు వెళ్లి గుండు కొట్టించుకుని ఆపై గంగానదిలో పుణ్యస్నానం చేశాడు. ఇంతలోపే పలువురు స్థానికులు ట్రాలీ బ్యాగులో అనన్య మృతదేహాన్ని గుర్తించి పోలీసులకు సమాచారం అందించారు.

సీసీటీవీ ఫుటేజీ ఆధారంగా దాన్ని పడేసింది విశాల్ అని గుర్తించి అతడి సెల్‌ఫోన్ సిగ్నల్ ఆధారంగా గంగానది వద్ద ఉన్నట్లు తెలుసుకుని అక్కడకు వచ్చారు. వెంటనే నిందితుడు విశాల్‌ను అదుపులోకి తీసుకుని విచారించగా తానే నేరం చేసినట్లు ఒప్పుకున్నాడు.