రూ. 2 వేల నోట్లపై ఆర్బీఐ కీలక ప్రకటన

రిజర్వ్ బ్యాంక్ ఆఫ్ ఇండియా (ఆర్బీఐ) 2023 మే నెలలో అప్పుడు పెద్ద నోటుగా ఉన్నటువంటి రూ. 2 వేల నోట్లను సర్క్యులేషన్ నుంచి ఉపసంహరించుకుంటున్నట్లు ప్రకటన చేసిన సంగతి తెలిసిందే. ఈ క్రమంలోనే ప్రజల్ని తమ దగ్గర ఉన్న ఈ పెద్ద నోట్లను వెనక్కి ఇచ్చేయాలని కోరింది. అప్పటినుంచి అవకాశం కల్పించినప్పటికీ.. ప్రజల దగ్గర ఇంకా రూ. 6400 కోట్లకుపైగా విలువైన రూ. 2 వేల నోట్లు ఉన్నట్లు ఆర్బీఐ తాజాగా ప్రకటించింది. దాదాపు 20 నెలలైనా ఇప్పటికీ పూర్తి స్థాయిలో రూ. 2 వేల నోట్లు.. సర్క్యులేషన్ నుంచి బ్యాంకింగ్ వ్యవస్థలోకి రాకపోవడం గమనార్హం. చలామణీలో ఉన్న మొత్తం రూ. 2 వేల నోట్లలో 98.18 శాతం నోట్లు తిరిగి బ్యాంకుల దగ్గరికి చేరినట్లు తెలిపింది కేంద్ర బ్యాంకు.

2023 సంవత్సరం మే 19న ఆర్బీఐ రూ. 2 వేల నోట్ల ఉపసంహరణ ప్రకటన చేసింది. అయితే.. అప్పటికి ఈ నోట్ల విలువ సర్క్యులేషన్‌లో రూ. 3.56 లక్షల కోట్లుగా ఉంది. వీటిని మొత్తం వెనక్కి రప్పించుకునేందుకు సిద్ధమై.. తొలుత బ్యాంకుల్లో ఈ నోట్లను మార్చుకునేందుకు లేదా డిపాజిట్ చేసేందుకు ప్రజలకు అవకాశం కల్పించింది. దీని కోసం ముందుగా 2023, సెప్టెంబర్ 30 వరకు అవకాశం కల్పించారు. తర్వాత మరోసారి అక్టోబర్ 7 వరకు గడువు పొడిగించారు.

ఇక అప్పటినుంచి మాత్రం బ్యాంకుల్లో వీటిని మార్చుకునేందుకు వీల్లేదు. కేవలం దేశవ్యాప్తంగా ఉన్న ఆర్బీఐ 19 ప్రాంతీయ కార్యాలయాల్లోనే మార్చుకునేందుకు వెసులుబాటు కల్పించింది. హైదరాబాద్‌లోని ఆర్బీఐ ప్రాంతీయ కార్యాలయంలో కూడా వీటిని మార్చుకోవచ్చు. ఈ క్రమంలోనే ఇప్పటివరకు 98.18 శాతం నోట్లు వెనక్కి వచ్చినట్లు ఆర్బీఐ స్పష్టం చేసింది. ప్రజల దగ్గర ఇంకా రూ. 6471 కోట్ల రూ. 2 వేల నోట్లు ఉన్నట్లు వెల్లడించింది. ఇది మొత్తం సర్క్యులేషన్లో 1.82 శాతానికి సమానం.

ఆర్బీఐ ప్రాంతీయ కార్యాలయాలతో పాటుగా... రీజనల్ ఆఫీసులకు చేరుకోలేని వారు పోస్టల్ డిపార్ట్‌మెంట్ ద్వారా ఆయా కార్యాలయాలకు పంపొచ్చని తెలిపింది. ఇక ప్రాంతీయ కార్యాలయాలు హైదరాబాద్ సహా బెంగళూరు, అహ్మదాబాద్, ముంబై, నాగ్‌పుర్, ఢిల్లీ, పట్నా, తిరువనంతపురం, చెన్నై, ఛండీగఢ్, భువనేశ్వర్, భోపాల్, భేల్‌పుర్, కాన్పుర్, జైపూర్, గువాహటి, లక్నో, కోల్‌కతా, జమ్మూల్లో ఉన్నాయి. చివరగా తెలుసుకోవాల్సిన అత్యంత ముఖ్యమైన విషయం ఏంటంటే.. రూ. 2 వేల నోట్లు ఉపసంహరించుకుంటున్నా.. ఇప్పటికీ చట్టబద్ధ కరెన్సీగా (లీగల్ టెండర్) కొనసాగుతుందని ఆర్బీఐ స్పష్టం చేసింది. అంటే వీటిని రద్దు చేయలేదని ఇప్పటికీ చెల్లుబాటులోనే ఉన్నట్లు పేర్కొంది.