రూ. 10 వేల సిప్‌తో ఒకేసారి చేతికి రూ. 6.75 కోట్లు

ఎస్బీఐ లార్జ్ అండ్ మిడ్‌క్యాప్ ఫండ్.. ఇది ఒక ఓపెన్ ఎండెడ్ ఈక్విటీ పథకం. ఇది ఎక్కువగా లార్జ్ అండ్ మిడ్ క్యాప్ స్టాక్స్‌లో ఇన్వెస్ట్ చేస్తుంటుంది. ఇక ఈ మ్యూచువల్ ఫండ్ స్కీమ్ తాజాగా.. 32 సంవత్సరాల మైలురాయిని అధిగమించింది. సుదీర్ఘ కాలం కొనసాగుతున్న కొన్ని మ్యూచువల్ ఫండ్లలో ఇదొకటి అని చెప్పొచ్చు. ఇక స్కీమ్ ప్రారంభం దగ్గర నుంచి చూస్తే.. సగటున 13.33 శాతం చొప్పున రిటర్న్స్ అందించడం విశేషం. దీంతో ఇందులో పెట్టుబడులు పెట్టి దీర్ఘకాలం కొనసాగించిన వారి మంచి రాబడే అందింది. ఈ స్కీమ్ 1993, ఫిబ్రవరి 28న లాంఛ్ అయింది. మూడేళ్లు, ఐదేళ్లు, పదేళ్లు, 20 సంవత్సరాలు.. ఇలా సగటున మంచి రాబడే అందిస్తూ వచ్చింది.

ఐదేళ్ల కాలంలో చూసినట్లయితే సగటున వార్షిక ప్రాతిపదికన 19.15 శాతం CAGR రిటర్న్స్ అందించింది. ఇదే మూడేళ్ల కాలంలో చూస్తే 15.55 శాతం చొప్పున రాబడి అందించింది. ఏడాది వ్యవధిలో అయిదే 11.75 శాతం రిటర్న్స్ వచ్చాయి. ఇక నిఫ్టీ లార్జ్ మిడ్‌క్యాప్ 250 టీఆర్ఐ ఈ పథకం పనితీరుకు కొలమానంగా ఉంది. ఈ సమయంలో ఈ ఇండెక్స్ రిటర్న్స్ సగటున 20.75 శాతం, 16.77 శాతం, 11.03 శాతంగా ఉన్నాయి.

ఇంకా ఎస్బీఐ లార్జ్ అండ్ మిడ్‌క్యాప్ ఫండ్ 15 సంవత్సరాల్లో చూస్తే సగటున 15.6 శాతం, పదేళ్లలో చూస్తే 15.57 శాతం, ఐదేళ్లలో 18.44 శాతం, మూడేళ్లలో 13.65 శాతం రాబడి వచ్చింది. ఈ క్రమంలోనే ఈ స్కీమ్ ప్రారంభంలో ఎవరైనా రూ. లక్ష ఒకేసారి ఇన్వెస్ట్ చేసినట్లయితే ఫిబ్రవరి నాటికి అది రూ. 54.84 లక్షలు అయ్యేది.

ఈ ఫండ్ నికర ఆస్తుల విలువ 2025, జనవరి 31 నాటికి చూస్తే రూ. 28,681 కోట్లుగా ఉంది. సౌరభ్ పంత్ ఈ ఫండ్ మేనేజర్‌గా ఉన్నారు. 2016 సెప్టెంబర్ నుంచి ఈయన కొనసాగుతున్నారు. ఇక లంప్ సమ్ కాకుండా.. నెలకు రూ. 10 వేల చొప్పున సిప్ విధానంలో ఈ పథకం ప్రారంభంలో ఇన్వెస్ట్ చేస్తూ వస్తున్నట్లయితే ఇక్కడ 15.71 శాతం సీఏజీఆర్ చొప్పున ఏకంగా రూ. 6.75 కోట్ల మేర రాబడి అందించింది. ఇక్కడ మీ పెట్టుబడి రూ. 36.2 లక్షలు అవుతుంది. ఇక లాంగ్ టర్మ్ క్యాపిటల్ అప్రిసియేషన్ కోసం ఈ పథకం బెస్ట్ అని నిపుణులు చెబుతున్నారు.