ఈ లక్షణాలు కనిపిస్తే శరీరంలో రక్తం తక్కువ ఉందని అర్థం

ఈ రోజుల్లో చాలా మంది రక్తహీనత సమస్యతో బాధపడుతున్నారు. ముఖ్యంగా మహిళల్లో ఈ సమస్య ఎక్కువగా కనిపిస్తుంది. శరీరంలో చాలినంత బ్లడ్ కౌంట్ లేకపోతే... అది.. రక్తహీనత (ఎనీమియా)కు దారితీసే ప్రమాదం ఉంది. దేహంలో తగినంత ఐరన్‌ లేకపోవడం, విటమిన్ లోపం కూడా రక్తహీనతకు ప్రధాన కారణాలు. దేశంలోప్రస్తుతం ఎనీమియా కేసులు నానాటికి పెరుగుతూనే ఉన్నాయి. సరైన పోషకాహారం లేకపోవడమే రక్తహీనతకు దారితీస్తాయి. చిన్నపిల్లల్లో కూడా ఈ సమస్య పెరుగుతోంది.

ఒత్తిడి, పీరియడ్స్ సమయంలో అధిక రక్తస్రావం కూడా రక్తహీనతకు కారణాలు. శరీరంలో రక్తం లేకపోవడం వల్ల చేతులు, కాళ్లు, చర్మంపై వివిధ లక్షణాలు కనిపిస్తాయి. అంతేకాకుండా ముఖం మీద కూడా కొన్ని లక్షణాలు కనిపిస్తాయి. ముఖంపై కనిపించే కొన్ని లక్షణాలు రక్తహీనతకు సంకేతాలు కావచ్చు. ఈ లక్షణాలు కనిపిస్తే వెంటనే అలర్ట్ అవ్వొచ్చు. ఇంతకీ ఆ లక్షణాలేంటో ఇక్కడ తెలుసుకుందాం.

ఐరన్ లోపాన్ని నివారించడానికి మార్గాలు

ఐరన్ లోపం వల్ల రక్తహీనత వస్తుంది. ఇది మహిళల్లో ఎక్కువగా కనిపిస్తుంది. మీరు కూడా ఈ లక్షణాలు గమనించినట్లయితే ఆలస్యం చేయకుండా వైద్యుణ్ని సంప్రదించండి. అంతేకాకుండా, శరీరంలో రక్తాన్ని, ఐరన్ లెవల్స్ పెంచే ఫుడ్స్‌ని ఆహారంలో భాగం చేసుకోండి. బెల్లం, ఖర్జూరం, పప్పులు, ఎండుద్రాక్షలతో పాటు ఆపిల్, నేరుడు వంటి పండ్లను ఎక్కువగా తీసుకోండి.

మొటిమలు, పిగ్మంటేషన్

ఈ రోజుల్లో చాలా మంది మొటిమలు, పిగ్మంటేషన్ సమస్యతో బాధపడుతున్నారు. అయితే, రక్తహీనత వల్ల ఈ చర్మ సమస్యలు రావచ్చంటున్నారు నిపుణులు. శరీరంలో తగినంత ఐరన్ లేకపోవడం వల్ల ముఖంపై మొటిమలు, పిగ్మంటేషన్ ఎక్కువగా కనిపించే అవకాశం ఉంది.

డార్క్ సర్కిల్స్

కొందరు సరిగ్గా నిద్రపోకపోవడం వల్ల, ఫోన్లలో గంటల తరబడి ఉండటం వల్ల ముఖం మీద డార్క్ సర్కిల్స్ కనిపిస్తాయి. అయితే, మీరు టైంకి నిద్రపోతూ, ఫోన్ అంతగా పట్టించుకోకపోయినా కళ్ల చుట్టూ నల్లటి వలయాలు కనిపిస్తే మాత్రం జాగ్రత్త. శరీరంలో తగినంత రక్తం లేకపోవడం వల్ల కళ్ల చుట్టూ డార్క్ సర్కిల్స్ కనిపిస్తాయి. డార్క్ సర్కిల్స్ రక్తహీనతకు ప్రధాన లక్షణం. వెంటనే వైద్యుణ్ని సంప్రదించండి.

పొడి చర్మం

చాలా మంది పొడి చర్మం సమస్యతో బాధపడుతుంటారు. అది సీజన్ మార్పు వల్ల కూడా కావచ్చు. అయితే, సీజన్‌తో సంబంధం లేకుండా చర్మం పదే పదే పొడిగా మారుతుంటే మాత్రం జాగ్రత్త పడాలి. శరీరంలో రక్తం లేకపోవడం వల్ల కూడా ఇలా జరగవచ్చు. ఐరన్ స్థాయిలు తక్కువగా ఉంటే చర్మం పొడిబారడం పెరుగుతుంది. అంతేకాకుండా చర్మం దురదగా కూడా ఉండవచ్చు. అందుకే ఈ లక్షణాల్ని నిర్లక్ష్యం చేయకండి.

చర్మం తెల్లబడటం

​రక్తహీనతకు ప్రధాన కారణం శరీరంలో తగినంత ఐరన్ లేకపోవడం. ఐరన్ లోపం వల్ల చర్మం రంగు మారుతుంది. రక్తం లేకపోవడం వల్ల ముఖం తెల్లగా మారుతుంది. అంటే పాలిపోయే ప్రమాదముంది. ముఖం తెల్లగా ఉంటే ఈ లక్షణాన్ని లైట్ తీసుకోవద్దు. వెంటనే వైద్యుణ్ని సంప్రదించి తగిన పరీక్షలు చేయించుకోవాలి.