కొబ్బరి నూనెలో ఆ పదార్థాలు కలిపి రాస్తే జుట్టు రాలడం ఆగిపోతుంది

ప్రతి ఒక్కరి అందంలో కురులు కీలక పాత్ర పోషిస్తాయి. ముఖ్యంగా మహిళలు. ప్రతి మహిళ అందమైన, నలుపు, మందపాటి జుట్టును కోరుకుంటుంది. అయితే, బిజీ లైఫ్‌స్టైల్, ఒత్తిడి, దుమ్ము, కాలుష్యం కారణంగా జుట్టు మీద ఎక్కువ ప్రభావం ఉంటుంది. జుట్టు రాలిపోవడం, చుండ్రు, దురద, పల్చని వెంటుక్రలు వంటి సమస్యలు ఎదుర్కొంటున్నారు. ఇక, చాలా మంది మహిళలు ఇంటి చిట్కాల నుంచి మార్కెట్లో దొరికే రకరకాల ప్రొడక్ట్స్ వాడుతుంటారు. అయినా, జుట్టు పెరగక ఇబ్బందులు పడుతున్నారు.

మార్కెట్లో దొరికే ప్రొడక్ట్స్‌లో రసాయనాలు ఎక్కువగా ఉంటాయి. ఇవి జుట్టును బలహీనపరుస్తాయి. జుట్టు నిర్జీవంగా మారుతుంది. దీంతో జుట్టు రాలిపోతుంది. అందుకే వెంట్రుకలు బాగా పెరగడం కోసం సహజ పద్ధతుల్నే ఫాలో అవ్వాలంటున్నారు నిపుణులు. ఇక, జుట్టు ఆరోగ్యంలో కొబ్బరి నూనె ప్రభావవంతంగా పనిచేస్తుంది. కొబ్బరి నూనెను బాగా అప్లై చేస్తే జుట్టు ఒత్తుగా పెరుగుతుంది. కొబ్బరి నూనెలో కొన్ని పదార్థాల్ని కలిపి రాస్తే జుట్టు రాలడం ఆగి ఒత్తుగా పెరుగుతుందని ఆయుర్వేద నిపుణులు అంటున్నారు. ఆ పదార్థాలేంటో ఇక్కడ తెలుసుకుందాం.

జుట్టుకు కొబ్బరి నూనె చేసే మేలు

​కొబ్బరి నూనెలో సహజ లక్షణాలు పుష్కలంగా ఉంటాయి. ఈ లక్షణాలు జుట్టు, చర్మ ఆరోగ్యానికి ఎంతో మేలు చేస్తాయి. కొబ్బరి నూనెలో యాంటీ ఫంగల్, యాంటీ బ్యాక్టీరియల్, యాంటీ ఆక్సిడెంట్ లక్షణాలు ఎక్కువగా ఉంటాయి. ఈ లక్షణాలు జుట్టును ఇన్ఫెక్షన్ల నుంచి రక్షిస్తాయి. జుట్టును మృదువుగా చేస్తాయి. కొబ్బరి నూనె జుట్టు మూలాల్ని బలోపేతం చేస్తుంది. జుట్టు రాలడం ఆపి.. బాగా పెరిగేలా సాయపడుతుంది. కొబ్బరి నూనెలో కొవ్వు ఆమ్లాలు ఉంటాయి. ఇవి జుట్టుకు తగిన తేమను అందించడమే కాకుండా మెరుపును ఇస్తాయి. కానీ, కొబ్బరి నూనెను కొన్ని సహజ పదార్థాలతో కలిపినప్పుడు జుట్టు పెరుగుదలను మరింత వేగవంతం చేస్తుంది. ఆ సహజ పదార్థాలేంటో తెలుసుకుందాం.

మెంతులు, కొబ్బరి నూనె

​మెంతులు జుట్టుకు చాలా ప్రభావవంతమైన ఇంటి నివారణ. మెంతుల్లో ఉండే ప్రోటీన్లు, నికోటినిక్ ఆమ్లం జుట్టును బలోపేతం చేస్తాయి. జుట్టు పెరుగుదలకు సహాయపడతాయి. కొబ్బరి నూనెలో మెంతి గింజల పొడి కలిపి జుట్టు మూలాలకు రాయండి. 30-40 నిమిషాలు అలాగే ఉంచి, తర్వాత తలస్నానం చేయండి. ఇలా చేయడం వల్ల జుట్టు పెరుగుదల వేగవంతం అవుతుంది. అంతేకాకుండా జుట్టుకు మెరుపును ఇస్తుంది.

ఉసిరి, కొబ్బరి నూనె

జుట్టు ఆరోగ్యానికి ఉసిరి బెస్ట్ ఆప్షన్ అంటారు నిపుణులు. ఇందులో జుట్టు పెరుగుదలను ప్రోత్సహించే విటమిన్ సి, యాంటీఆక్సిడెంట్లు ఉంటాయి. కొబ్బరి నూనెతో ఉసిరి పొడి కలిపి జుట్టు మూలాలకు రాయండి. ఉసిరి నూనె జుట్టు నల్లగా ఉంచేలా చేస్తుంది. అంతేకాకుండా జుట్టు రాలడాన్ని కంట్రోల్ చేస్తుంది.

వెల్లుల్లి, కొబ్బరి నూనె

వెల్లుల్లిలో సల్ఫర్ మూలకం ఉంటుంది. ఇది జుట్టు పెరుగుదలకు ప్రయోజనకరంగా ఉంటుంది. వెల్లుల్లిని కొద్దిగా నలిపి, కొబ్బరి నూనెతో కలిపి జుట్టు మూలాలకు రాయండి. ఇది జుట్టు పెరుగుదలను వేగవంతం చేస్తుంది. అంతేకాకుండా జుట్టును బలంగా మారుస్తుంది. దీంతో జుట్టు రాలడం ఆగిపోతుంది.

కలబంద, కొబ్బరి నూనె

కలబందలో యాంటీ ఇన్ఫ్లమేటరీ లక్షణాలు ఉన్నాయి. ఇవి తల దురద, మంట నుంచి ఉపశమనాన్ని అందిస్తాయి. అంతేకాకుండా కలబంద జుట్టు ఆరోగ్యాన్ని ప్రోత్సహిస్తుంది. ఇందుకోసం కొబ్బరి నూనెలో కలబంద జెల్ కలిపి జుట్టు రాసుకోవాలి. ఆ తర్వాత తలపై ఓ గంట పాటు అలాగే ఉంచుకోవాలి. ఇలా చేయడం వల్ల జుట్టు బాగా పెరుగుతుంది. అంతేకాకుండా జుట్టు మృదువుగా, మెరిసేలా మారుతుందని ఆయుర్వేద నిపుణులు అంటున్నారు.