ఔరంగాజేబ్‌ను ప్రేమించే వాళ్లంతా ఇళ్లలో సమాధులు కట్టుకోండి

ఒరంగాజేబ్ సమాధిని మహారాష్ట్ర నుంచి తొలగించాలని అక్కడి ప్రభుత్వాన్ని కోరారు మాజీ ఎంపీ, బీజేపీ నాయకురాలు నవనీత్ రాణా. అలాగే ఎవరికైనా ఔరంగాజేబ్‌పై ప్రేమ ఉంటే.. ఆయన సమాధిని వారి ఇళ్లలోనే నిర్మించుకోవాలంటూ వివరించారు. ఇటీవలే ఔరంగాజేబ్‌ను పొగుడుతూ.. సమాజ్ వాదీ పార్టీ మహారాష్ట్ర విభాగం అధ్యక్షుడు అబు అజ్మీ చేసిన వ్యాఖ్యలపై తీవ్ర ఆగ్రహం వ్యక్తం చేశారు. ఆయన లాంటి వాళ్లకు అసలు చరిత్రే తెలియదని.. ఒకసారి వెళ్లి ఛావా సినిమా చూస్తే కాస్తైనా మహారాష్ట్ర గురించి తెలుస్తుందని అన్నారు. ఆ పూర్తి వివరాలు మీకోసం.

మార్చి 3వ తేదీ సోమవారం రోజు సమాజ్ వాదీ పార్టీ మహారాష్ట్ర విభాగం అధ్యక్షుడు అబు అజ్మీ ఓ కార్యక్రమంలో మాట్లాడుతూ.. ఔరంగాజేబ్ క్రూరుడు కాదని చెప్పారు. ఆయన కూడా అనేక ఆలయాలను కట్టించారని చెప్పుకొచ్చారు. ఔరంగాజేబును పొగుడుతూ కామెంట్లు చేయడంతో.. బీజేపీ నాయకులు అంతా ఆగ్రహం వ్యక్తం చేస్తున్నారు. మీలాంటి వాళ్లను ఎన్నికల్లో గెలిపించి ఐదేళ్లపాటు అసెంబ్లీలో కూర్చోబెట్టిన రాష్ట్రాన్ని ఛత్రపతి శివాజీ మహారాజ్, ఆయన కుమారుడు శంభాజీ మహారాజ్ పరిపాలించారని గుర్తు పెట్టుకోవాలంటూ బీజేపీ నాయకురాలు నవనీత్ రాణా వివరించారు.

అబు అజ్మీ లాంటి వాళ్లకు అసలు చరిత్రే తెలియదని.. ఇలాంటి వాళ్లు ఛావా సినిమా చూస్తే కాస్తైనా మహారాష్ట్ర గురించి తెలుస్తుందన్నారు. అప్పుడే మన రాజుపై ఔరంగాజేబ్ ఎన్ని ఆకృత్యాలకు పాల్పడ్డారో తెలుస్తుందని విమర్శించారు. అలాగే మహారాష్ట్ర నుంచి ఔరంగాజేబ్ సమాధిని తొలగించాలని అక్కడి ప్రభుత్వాన్ని కోరారు. ఎవరైనా అతడిని ప్రేమించే వాళ్లుంటే.. సమాధిని తీసుకెళ్లి వాళ్ల ఇళ్లలో పెట్టుకోవాలని చెప్పుకొచ్చారు. అంతేకాకుండా మహారాష్ట్రలోని ఔరంగాబాద్ నగరం పేరును మార్చి శంభాజీ మహారాజ్ పేరు పెట్టాలని డిమాండ్ చేశారు.

ప్రస్తుతం ఈమె చేసిన వ్యాఖ్యలు నెట్టింట తెగ వైరల్ అవుతుండగా.. ఒక్కొక్కరూ ఒక్కో విధంగా స్పందిస్తున్నారు. నవనీత్ రాణాకు మద్దతు తెలుపుతూ.. అబు అజ్మీపై ఆగ్రహం వ్యక్తం చేస్తున్నారు. తాజాగా దీనిపై మహారాష్ట్ర డిప్యూటీ సీఎం ఏక్‌నాథ్ షిండే కూడా స్పందించారు. అబూ అజ్మీ వెంటనే క్షమాపణలు చెప్పాలని.. లేదంటే ప్రభుత్వం ఆయనపై చట్టపరమైన చర్యలు తీసుకుంటుందని హెచ్చరించారు. ఛత్రపతి శంభాజీ మహారాజ్‌ను ఔరంగాజేబ్ చిత్రహింసలకు గురి చేసిన విషయాన్ని మరోసారి గుర్తు చేశారు.